Śmierć Makieja: ruka Maskvy, pomsta Łukašenki ci prosta infarkt?
Uładzimira Makieja zaličvali da libieralnaha kryła łukašenkaŭcaŭ, jon byŭ adzinym u ciapierašniaj viarchušcy, chto čas ad času havaryŭ pa-biełarusku.
Ministram zamiežnych spraŭ Biełarusi jon pracavaŭ z 2012 hoda. Da taho jon čatyry hady, u tym liku padčas pahromu 2010-ha, uznačalvaŭ Administracyju prezidenta. A jašče pierad tym vosiem hadoŭ, z sakavika 2000 hoda, byŭ pamočnikam Alaksandra Łukašenki. Pamočnikam jon staŭ paśla źniknieńnia apanientaŭ Łukašenki ŭ 1999-m. Heta byŭ čałaviek, jaki viedaŭ, kudy išoŭ i što rabiŭ.
Makiej mieŭ reputacyju čałavieka prabiełaruskaha — u tych ramkach, u jakich biełaruskaść dazvalajecca ŭ prarasijskim režymie. U kožnym razie, jon nie naležaŭ da fašysckaha kryła łukašenkaŭcaŭ. Adnak pry hetym byŭ słužaka i słužbist, jaki ni ŭ čym nie adychodziŭ ad hienieralnaj linii i zrabiŭ šmat dla ŭmacavańnia režymu asabistaj ułady i vyniščeńnia ŭsiaho niezaležnaha.
Aficyjnaj viersijaj śmierci Makieja staŭ infarkt. Jaho ničoha nie pradviaščała, što, možna być upeŭnienymi, vykliča šmatlikija teoryi zmovy.
Uładzimir Makiej sa svaim aparatnym dośviedam moh by być klučavoj postaćciu ŭ pracesie vyznačeńnia pierajemnika ŭ vypadku raptoŭnaha adychodu samoha Alaksandra Łukašenki. I jon byŭ daloka nie samym prarasijskim elemientam u ciapierašniaj minskaj viarchušcy. Adpaviedna, mnohija mohuć bačyć za takoj raptoŭnaj śmierciu ruku Maskvy.
I Makiej byŭ kiraŭnikom viedamstva, dziasiatki supracoŭnikaŭ jakoha ŭ 2020-m pierajšli na bok naroda, kali amal usie dyppradstaŭnictvy zaśviedčyli masavaje hałasavańnie ludziej za Śviatłanu Cichanoŭskuju — paśla čaho łukašenkaŭcy vymušanyja byli z hańbaj dla siabie admianić hałasavańnie na zamiežnych učastkach. Alaksandr Łukašenka maje reputacyju čałavieka, jaki nikomu ničoha nie daruje. Adpaviedna, inšyja mohuć bačyć u śmierci pomstu.
Ale ludzi časam pamirajuć prosta ad infarktaŭ. Nakolki viadoma «Našaj Nivie», Uładzimir Makiej pamior u siabie doma, i pakul usio sapraŭdy pakazvaje na infarkt.
Čytajcie taksama:
Stała viadomaja imaviernaja pryčyna śmierci Makieja
Jak Makiej pravioŭ svoj apošni tydzień
Cichanoŭskaja vykazałasia pra śmierć Makieja
Ciapier čytajuć
Capkała i Bałkuniec atakavali litoŭskaha palityka, jaki dapamahaŭ biełarusam paśla 2020‑ha i spryčyniŭsia da spravy, jakuju zavioŭ prakuror u Haazie28
Kamientary