Klaščy vosieńniu: dzie chavajucca, čym niebiaśpiečnyja i jak abaranić dziaciej

Pačatak vosieni adznačajecca chvalaj aktyŭnaści klaščoŭ. Jak praviła, jany sustrakajucca až da listapada, a ŭ niekatoryja hady miedyki fiksavali adzinkavyja vypadki ŭkusaŭ navat u śniežni. Pakul tempieratura pavietra budzie nie nižej za +5°S, adpačyvać na pryrodzie treba, uličvajučy vierahodnaść sustrečy z hetymi členistanohimi.

Ciapier u vysokaj travie i na kustach raspaŭsiudžanyja nimfy — heta drobnyja klaščy pamieram 0,5—1 mm. Adnak jany hetak ža sama pieranosiać Łajm-barelijoz i kleščavy encefalit, jak i darosłyja asobiny.

«U svaim cykle raźvićcia klešč prachodzić niekalki etapaŭ: jajka, ličynka, nimfa i darosłaja asobina. Nimfa — heta padrastajučaje pakaleńnie, takija klaščy mienšyja pa pamierach, i ich składana zaŭvažyć», — raskazała žurnalistam entamołah supraćepidemičnaha adździaleńnia adździeła epidemijałohii Minskaha haradskoha centra hihijeny i epidemijałohii Halina Młynarčyk.

Antybijotyki treba pryniać u pieršyja 72 hadziny paśla ŭkusu

Samyja niebiaśpiečnyja chvaroby, jakija moža pieradać klešč, — kleščavy encefalit i Łajm-barelijoz. I kali ad pieršaha možna pryščapicca, to ad Łajm-barelijozu vakcyny pakul niama.

Kab bakteryja Łajm-barelijozu vyklikała zachvorvańnie ŭ čałavieka, pavinna prajści 72 hadziny paśla ŭkusu.

«Tolki praz 72 hadziny mohuć źjavicca pieršyja prykmiety — heta mihrujučaja plama. Jana moža być ad bledna-ružovaha koleru da jarka-čyrvonaha i siniušnaha. Plama pastajanna raście, dasiahajučy 15, 20 i navat 30 santymietraŭ. U jaje centry moža być praśviatleńnie. Subjektyŭna jana časta siabie nijak nie prajaŭlaje: čałaviek nie adčuvaje ni bolu, ni smyleńnia, ni śvierbu», — adznačyła doktarka-infiekcyjanistka, zahadčyca adździaleńnia «boksavy izalatar» Haradskoj kliničnaj infiekcyjnaj balnicy stalicy Taćciana Klańnickaja.

Kali paśla ŭkusu klašča svoječasova nie źviarnucca da ŭrača i nie pačać prymać antybijotyki ŭ pieršyja 72 hadziny, chvaroba moža raźvicca dalej i zakranuć sustavy, niervovuju i sardečna-sasudzistuju sistemu. Pryčym u čałavieka mohuć źjavicca niazvykłyja hałaŭnyja boli, jakija nie zdymaje nivodzin lekavy srodak.

Jak zaścierahčy dziaciej

Paśla ŭkusu klašča dzieciam, jak i darosłym, mohuć pryznačyć antybijotyk ad Łajm-barelijozu. Pry hetym karektnuju dozu raźličvaje piedyjatr, zychodziačy z vahi dziciaci. Kab zaścierahčy małodšych ad ukusaŭ, pry vychadzie na prahułku ich treba apranać pa pryncypie «čarapicy».

«Heta značyć, što štoniki treba zapravić u škarpetki, a koftačku — u štoniki abo kałhotki. My nasłojvajem adno na druhoje: źvierchu koftačka z manžetami, chustka, šapačka — i dzicia ŭžo hetym zaścierahajecca», — raskazała doktarka-infiekcyjanistka, zahadčyca arhanizacyjna-mietadyčnaha adździeła Haradskoj dziciačaj infiekcyjnaj kliničnaj balnicy Minska Alina Savienka.

Padčas prahułki treba vykarystoŭvać repielenty suprać klaščoŭ. Pryčym heta pavinny być aptečnyja srodki ź instrukcyjaj pa vykarystańni.

Na skury čałavieka klaščy lubiać ciopłyja i suchija miescy. Heta moža być prastora za vušami, šyjnyja, padmyšačnyja, pachavyja, padkalennyja, łokcievyja składki i mižpalcavyja pramiežki. Tamu paśla prahułki dzicia važna ahledzieć va ŭsich hetych miescach. Pry hetym treba źviarnuć pilnuju ŭvahu i na vałasianuju častku hałavy.

«Byŭ vypadak, kali chutkaja pryviezła prosta z dačy dziaŭčynku z padazreńniem na pnieŭmaniju. Pnieŭmanija paćvierdziłasia, spatrebiłasia špitalizacyja, a ŭ pryjomnym adździaleńni ŭ abaviazkovym paradku prachodziać ahlad na piedykuloz. U dziaŭčynki na hałavie byli kosy z kalarovymi stužkami, ź jakimi jana chadziła paŭleta. Kali kasički rasplali, ja znajšła klašča, jaki tam byŭ paru sutak», — adznačyła Alina Savienka.

• 1
• 0
• 0
• 0
• 2
• 0
• 0
• 0