Raman Hałoŭčanka padpisaŭ rasparadžeńnie «Ab arhanizacyi pachavańnia ministra zamiežnych spraŭ Respubliki Biełaruś Makieja U.U.», paviedamlaje BiełTA.
Zhodna z dakumientam, stvoranaja kamisija, kudy ŭvajšli pradstaŭniki roznych viedamstvaŭ. Arhanizacyja pachavańnia daručanaja Minharvykankamu. Na Minabarony ŭskładzieny abaviazak zabiaśpiečyć cyrymoniju raźvitańnia ŭ Centralnym Domie aficeraŭ.
Raźvitvacca z Makiejem buduć u aŭtorak, 29 listapada. Pačatak cyrymonii ŭ minskim Domie aficeraŭ — u 10.00. A pachavany Makiej budzie na Uschodnich mohiłkach u Minsku.
Pra niečakanuju śmierć 64-hadovaha Uładzimira Makieja paviedamili ŭčora. Jaje pryčynaj, jak miarkujecca, staŭ infarkt, choć raptoŭnyja śmierci čynoŭnikaŭ takoha ŭzroŭniu i ŭ takich palityčnych abstavinach, jakija jość ciapier u Biełarusi, nie abychodziacca biez kanśpirałahičnych padazreńniaŭ. Jakija dadatkova ŭmacoŭvajucca na dziva strymanaj reakcyjaj na śmierć adnoj z klučavych postaciej biełaruskaj palityčnaj sistemy ciaham apošnich paŭtara dziasiatka hadoŭ z boku dziaržaŭnych ŚMI i prapahandystaŭ.
Tak, hałoŭnaje prapahandysckaje vydańnie navat nie źmiaściła infarmacyi pra śmierć Makieja siarod hałoŭnych navin, inšyja ŚMI taksama pisali pra jaje niašmat i ahulnymi słovami.
Kamientary