U Disney stvaryli štučny intelekt, jaki lohka «małodzić» abo «staryć» akcioraŭ
U kampanii Disney raspracavali sistemu štučnaha intelektu, jakaja, zdajecca, značna palahčaje praces stvareńnia vizualnych efiektaŭ, kali patrabujecca, kab akcior vyhladaŭ bolš maładym abo stałym u scenie. Niahledziačy na toje, što mastaki pa-raniejšamu zmohuć rabić karekciroŭki ŭručnuju, kab pierakanacca, što efiekt vyhladaje maksimalna realistyčna, pryłada štučnaha intelektu moža pakłapacicca pra bolšuju častku ciažkaj pracy. Engaget paviedamlaje: štučnamu intelektu spatrebicca ŭsiaho piać siekund, kab prymianić efiekt stareńnia da adnaho kadra.
Štučnaje sastarvańnie akciora zvyčajna źjaŭlajecca darahim i pracajomkim pracesam, jaki patrabuje ad mastakoŭ prahladu sceny kadr za kadram, kab uručnuju źmianić źniešni vyhlad piersanaža. U minułym rabilisia sproby aŭtamatyzavać praces z dapamohaj niejronnych sietak i mašynnaha navučańnia, ale najlepšy vynik atrymlivaŭsia ŭ asnoŭnym tolki dla nieruchomych vidarysaŭ.
Novaje ž rašeńnie ad Disney prapanuje «pieršy praktyčny, całkam aŭtamatyčny i hatovy da vytvorčaści mietad sastarvańnia tvaraŭ na videa».
Kamanda raspracoŭščykaŭ napisała, što było b niemahčyma navučyć niejronnuju sietku FRAN (face re-aging network) na asnovie danych realnych ludziej.
Dla hetaha spatrebilisia b pary malunkaŭ, jakija pakazvali b abjekt z adnolkavym vyrazam tvaru, pozaj, aśviatleńniem i fonam u dvuch roznych uzrostach.
Zamiest hetaha daśledčyki stvaryli bazu danych ź niekalkich tysiač vypadkova zhienieravanych tvaraŭ. Jany sastaryli hetyja sintetyčnyja tvary z dapamohaj isnujučych pryład mašynnaha navučańnia, a zatym pieradali vyniki hetaha pracesu ŭ FRAN.
Niejronnaja sietka moža praanalizavać zdymak hałavy i pradbačyć, jakija častki tvaru buduć zakranuty stareńniem, a zatym jana prymianiaje efiekty marščyn abo razhładžvańnia skury na aryhinalnym tvary. Daśledčyki śćviardžajuć, što taki padychod dazvalaje FRAN sastaryć akciora, zachavaŭšy jaho identyčnaść i źniešnaść, navat kali hałava ci tvar ruchajucca abo źmianiajecca aśviatleńnie ŭ kadry.
Raspracoŭka takoj pryłady moža pamienšyć nahruzku na mastakoŭ pa vizualnych efiektach i paskoryć tvorčy praces. U dadatak heta moža dapamahčy prajektam, jakija nie majuć biudžetu błakbastaraŭ, nie vyjści za ramki vyznačanych sum. Naprykład, značnaja častka biudžetu kinastužki The Irishman Marcina Skarseze (jakaja, pa paviedamleńniach, składała 200 miljonaŭ dołaraŭ) pajšła na toje, kab Robiert De Nira, Al Pačyna i Džo Piešy ŭ asobnych scenach vyhladali maładziejšymi.
«Dyśniej» starajecca sastaryć vykanaŭcaŭ u svaich prajektach, u pryvatnaści, Marka Chemiła ŭ «Zornych vojnach». A kali nastupnym letam Charysan Ford vierniecca ŭ roli Indyjany Džonsa, jon taksama budzie vyhladać krychu maładziejšym. Novaja pryłada Disney pavinna ŭ budučyni paskoryć pracu nad takimi prajektami.
Kamientary