Jakija inavacyi i technałohii zdavalisia šmatabiacalnymi, ale ŭ 2022 hodzie spynili svajo isnavańnie? Ad iPod da Blackberry OS
Vydańnie Wall Street Journal skłała śpis tych vynachodak i inavacyj, jakija, niahledziačy na stvorany ažyjataž u pačatku svajho isnavańnia, nie apraŭdali siabie i ŭ 2022 hodzie syšli na spačyn. Unizie koratka pra ich.
1. Meta Portal (2018—2022)
Niahledziačy na krutyja funkcyi ź videazvankami, Portal tak i nie atrymaŭ masavaj papularnaści — navat padčas marafonaŭ Zoom i bumu videamiesiendžaraŭ, źviazanych z Covid-19. Paśla taho, jak Facebook pieratvaryŭsia ŭ Meta i skancentravaŭsia na svaim asnoŭnym biznesie i raźvićci mietasuśvietu, kampanija kančatkova admoviłasia ad hetaha praduktu.
2. Snap Pixy (2022—2022)
Pakietaŭ małaka chapaje na bolš praciahły čas, čym maleńkaha žoŭcieńkaha drona Pixy — na fota— i videazdymki. Jašče pa vychadzie Pixy byŭ na vyšyni, ale nie prajšło i hoda, jak jaho vytvorca Snapchat apynuŭsia ŭ ciažkim finansavym stanoviščy i prypyniŭ prajekt.
3. iPod (2001—2022)
Paśla dvuch dziesiacihodździaŭ ekspłuatacyi iPod Apple abviaściła ŭ traŭni 2022-ha, što spyniaje vypusk jaho apošniaj madeli — iPod Touch. Pryčyna takoha rašeńnia — biessensoŭnaść na fonie isnavańnia Iphone i inšych pryład dla patokavaj pieradačy muzyki.
4. Google Stadia (2019—2022)
Zapuščany kampanijaj Google vobłačny servis videahulniaŭ, pa hrandyjoznaj zadumcy, pavinien byŭ źmianić hiejm-industryju. Ale zamiest hetaha Stadia nie zavajavała papularnaści ŭ karystalnikaŭ i nie vypuściła na svajoj płatformie nivodnaj papularnaj videahulni.
5. Amazon Cloud Cam (2017—2022)
Cloud Cam, adna ź pieršych u liniejcy Amazon videakamier chatniaj biaśpieki, padklučanaja da sistemy razumnaha doma Alexa, była chutka vycieśnienaja svaimi bolš paśpiachovymi anałahami Ring i Blink (taksama ad Amazon). U vyniku Cloud Cam byŭ źniaty z vytvorčaści i ŭsim jaho ŭładalnikam Amazon prapanavaŭ zamianić madel na bolš sučasny Blink Mini.
6. Kindle Newsstand (2011—2022)
Adnoj sa sprobaŭ Amazon padahreć ažyjataž vakoł svajho płanšeta Fire było stvareńnie Kindle Newsstand — servisu padpiski na haziety i časopisy. Praź dziesiać hadoŭ vyśvietliłasia, što ludzi addajuć bolš pieravahi sapraŭdnym časopisam albo internet-ŚMI.
7. BlackBerry OS (1999—2022)
4 studzienia 2022 hoda kampanija BlackBerry spyniła absłuhoŭvańnie svajho prahramnaha zabieśpiačeńnia, na jakim pracujuć jaje staryja, ale vielmi nadziejnyja pryłady — druhija pa značnaści smartfony ŭ historyi. Telefony BlackBerry na bazie Android usio jašče praciahvajuć pracavać, adnak rašeńnie kampanii aznačaje kaniec cełaj epochi supierbiaśpiečnych pryład.
Bližejšym časam buduć vyzvaleny bolš za 150 palitźniavolenych39
Kamientary