Biełaruś nie maje namieru pavialičvać sumu zapazyčańniaŭ u Rasii, a sprabuje damaŭlacca ab refinansavańni isnujučych daŭhoŭ. Pra heta ŭ intervju telekanału «Biełaruś 1» raspavioŭ ministr finansaŭ Biełarusi Juryj Sielivierstaŭ.
Pavodle jaho słoŭ, ciapier atrymlivać pazyki na jeŭrapiejskich rynkach Biełaruś nie moža z-za sankcyj, a z asnoŭnym daŭhavym partnioram — Rasijaj (na jaje dolu prypadaje prykładna 70% usich źniešnich zapazyčańniaŭ) prapracoŭvajucca rašeńni ab refinansavańni daŭhoŭ.
«U nas jość abaviazacielstvy pahašeńnia daŭhoŭ pierad Jeŭrazijskim fondam stabilizacyi i raźvićcia, jość tyja kredyty, jakija my brali ŭ vyhladzie miždziaržkredytaŭ u Rasii pry roznych abstavinach. Jość rašeńni, što my možam zajmać dla biudžetu na rasijskaj fondavaj biržy naŭzamien jeŭrapiejskich instytutaŭ, jakija ŭžyli suprać nas sankcyi. Havorka idzie nie ab pavieličeńni zapazyčańniaŭ, a ab refinansavańni tych daŭhoŭ, jakija ŭ nas užo byli, — nie 100%, ale ŭ niejkaj častcy, kab nam lahčej było ich pahašać, a taksama absłuhoŭvać našy abaviazacielstvy», — skazaŭ Sielivierstaŭ.
Pry hetym užo dasiahnuta damoŭlenaść ab tym, što płaciažy ŭ pahašeńnie absłuhoŭvańnia zapazyčanaści pa ŭsich dziaržkredytach Biełarusi z sakavika 2022-ha pa krasavik 2023 hoda ŭ ahulnaj sumie $1,4 młrd pieranosiacca na pieryjad z 2028-ha pa 2033 hod.
U žniŭni minułaha hoda Miensk damoviŭsia z Maskvoj ab novym kredycie prykładna na $1,5 młrd dla realizacyi impartazamiaščalnych prajektaŭ. Častka sumy na stvareńnie vytvorčaściej užo pieraličanaja.
Pavodle spravazdačy Suśvietnaha banka, Biełaruś — najbujniejšy daŭžnik Rasii pa stanie na 2021 hod. Na kaniec 2019 hoda Minsk byŭ pavinien Maskvie $8,1 młrd, ale za dva hady doŭh vyras da $8,5 młrd.
Ciapier čytajuć
«Vajna ŭsio śpiša». Biełaruskim udzielnikam hiej-prajda ŭ Vilni pahražali raspravaj ad imia biełaruskich vajaroŭ za vykarystańnie bieła-čyrvona-biełaha ściaha102
Kamientary