Daśledčyki nie da kanca razumiejuć upłyŭ mienstrualnaha cykła na imunnuju sistemu, ale ekśpierty kažuć, što jość pryčyny, pa jakich niekatoryja žančyny mohuć adčuvać siabie kiepska.
Ci słabieje imunnaja sistema žančyny ŭ peŭny čas mienstrualnaha cykła? I ci praŭda, što kali vy zachvorvajecie, to heta adbyvajecca amal zaŭsiody niepasredna pierad mienstruacyjaj?
Ekśpierty kažuć, što pakul niedastatkova danych, kab heta paćvierdzić, ale jość niekatoryja namioki na toje, što heta moža być praŭdaj.
Novyja daśledavańni pakazvajuć, što padčas krytyčnych dzion imunnaja sistema žančyn moža vahacca, časam uzmacniajučy simptomy chraničnaha zachvorvańnia abo navat pravakujučy ŭźniknieńnie jaho novych simptomaŭ, jakija niekatoryja žančyny mohuć pryniać za prykmiety novaj chvaroby.
Naprykład, niepasredna pierad mienstruacyjaj niekatoryja žančyny adznačajuć simptomy, jakija zvyčajna asacyirujucca z hrypam, naprykład, łamota ŭ ciele, niedamahańnie i navat lichamanka. Hety tak zvany «pieryjadyčny hryp» nie vyklikajecca sapraŭdnym patahienam, kaža doktar Tarane Šyrazian, hiniekołah u N.Y.U. Langone Health. Taki stan moža być vynikam imunnaj reakcyi čałavieka na naturalny praces, kali matka pazbaŭlajecca jajcakletki.
Harmony taksama mohuć być vinavatymi va ŭźniknieńni takich simptomaŭ. Niepasredna pierad avulacyjaj uzrastaje ŭzrovień luteinizujučaha harmonu. Kali pačynajecca mienstruacyja, jaho ŭzrovień rezka padaje, u vyniku čaho žančyna moža adčuvać stomlenaść, uzdućcie žyvata, hałaŭnyja boli i młosnaść. Niekatoryja žančyny prachodziać praz takija ahresiŭnyja simptomy kožny cykł.
U 2018 hodzie ŭ supracoŭnictvie z mabilnym dadatkam dla adsočvańnia mienstruacyj Clue daśledčyki taksama adznačyli, što ŭ žančyn ź niekatorymi zachvorvańniami, naprykład, z zapalenčymi zachvorvańniami kišečnika, epilepsijaj i aŭtaimunnymi rasstrojstvami, simptomy takich chvarob časam uzmacnialisia padčas avulacyi, stan žančyny palapšaŭsia prykładna praz tydzień i znoŭ paharšaŭsia padčas nastupnaj mienstruacyi.
Inšyja daśledavańni pakazali, što ad 19 da 40 % žančyn, jakija pakutujuć ad astmy, adznačajuć bolš intensiŭnyja i častyja prystupy jaje niepasredna pierad abo padčas miesiačnych.
Niekatoryja nievialikija daśledavańni śviedčać, što žančyny z raśsiejanym sklerozam i vaŭčankaj taksama adčuvali ŭzmacnieńnie simptomaŭ niepasredna pierad abo padčas mienstruacyi.
Evalucyjnaja funkcyja mienstrualnaha cykła zaklučajecca ŭ tym, kab dać žančynam mahčymaść zaciažaryć. Kali apładnieńnie ŭsio ž adbyvajecca, niekatoryja častki imunnaj sistemy pryhniatajucca, kab arhanizm nie pazbaŭlaŭsia płoda.
Padčas mienstrualnaha cykła jaječniki vydzialajuć estrahien i prahiesteron, jakija pa-roznamu ŭpłyvajuć na imunnuju sistemu ŭ zaležnaści ad častki cieła. Ale estrahien i prahiesteron sami pa sabie nie mohuć być pryčynami asłableńnia imunnaj sistemy, bo ŭ pacyjentaŭ, jakija atrymlivajuć dadatkovyja dozy harmonaŭ padčas peŭnych miedycynskich pracedur abo, naprykład, padčas kantrolu nad začaćciem, prajaŭleńnia niehatyŭnych simptomaŭ nie nazirajecca.
Biez kančatkovych danych navukoŭcy nie mohuć dać dakładnych rekamiendacyj i prahnozaŭ nakont šancaŭ kankretnaj žančyny adčuvać niedamahańnie ŭ zaležnaści ad cykła. To-bok daktary nie mohuć skazać taksama, ci isnuje ŭsio ž bolšaja vierahodnaść zachvareć na prastudu abo na inšyja infiekcyjnyja chvaroby niepasredna pierad abo padčas mienstruacyi, tamu što bolš padrabiaznyja daśledavańni prosta nie pravodzilisia.
Ale daktary rajać nie ihnaravać toje, što vy pastajanna adčuvajecie siabie drenna ŭ peŭny momant cykła. Vy možacie pryniać miery, kab abaranić svajo zdaroŭje pierad mienstruacyjaj: pierakanajciesia, što vaša dyjeta zbałansavanaja, vy dastatkova śpicie i myjecie ruki nie mienš za 20 siekund. Kožnaja žančyna lepš za inšych viedaje svajo cieła.
Kamientary