«Dziela Łeśli» — film, naminavany na «Oskar», jaki amal nichto nie bačyŭ

Kali ŭ studzieni stali viadomyja naminanty na «Oskar», šmat chto ŭ Halivudzie ździviŭsia, ubačyŭšy vykanaŭcu hałoŭnaj roli ŭ filmie «Dziela Łeśli» Andrea Rajzbara ŭ śpisie pretendentak na najlepšuju žanočuju rolu, — pobač z bolš čakanymi imionami Any de Armas, Kiejt Błanšet, Mišel Uiljams i Mišel Jea.

U paraŭnańni ź inšymi naminavanymi stužkami, «Dziela Łeśli» nie ŭdzielničała ŭ štohadovym «pijar-machaviku» «Oskara», što ŭklučaje admysłovyja pakazy, sustrečy z vybarcami i prasoŭvańnie filma dla šyrokaj aŭdytoryi. U pačatkovym prakacie film sabraŭ tolki 27 tysiač dalaraŭ.

Adnak niečakana rekłamnaj kampanijaj kinaraboty stała toje, što jana trapiła ŭ «sarafannaje radyjo» znakamitaściaŭ.

Pa miery taho, jak u minułym miesiacy nabližaŭsia apošni termin padačy zajavak dla vyłučeńnia na «Oskar», rola spadaryni Rajzbara stała centram uvahi litaralna ŭ apošniuju chvilinu, kali joj pačali davać nievierahodna vysokija adznaki kalehi sa śpisu najlepšych, u tym liku pieramožcy «Oskara» Kiejt Uinślet, Šarliz Teron i Hvinet Pełtroŭ. Na pakazach «Dziela Łeśli» i ŭ vodhukach u sacyjalnych sietkach jany chvalili jaje akciorskuju ihru jak adnu z samych vybitnych za doŭhi čas.

«Andrea pavinna vyjhrać usie isnujučyja ŭznaharody i ŭsie tyja, što jašče nie prydumanyja», — napisała Hvinet Pełtroŭ u instahramie dla členaŭ Akademii i jaje 8,2 miljona padpisčykaŭ. Mia Feroŭ, Sara Połsan i inšyja haračyja prychilniki stužki apublikavali varyjanty hetaha paviedamleńnia, uklučajučy frazu «maleńki film z hihanckim sercam».

«Ja mała pišu pra filmy ci akciorskuju ihru», — pačynaje Edvard Nortan svajo paviedamleńnie ŭ tvitary, pryśviečanaje ihry Rajzbara, jakuju jon potym apisvaje jak «całkam addanuju, emacyjna hłybokuju, fizična pakutlivuju» i «pazbaŭlenuju luboj pierfarmatyŭnaj łuchty».

Hetyja vysokija acenki vyklikali tryvohu ŭ kinaakademii, jakaja pačała vyśviatlać, ci parušali ludzi, blizkija da stvaralnikaŭ filma, abmiežavańni na atrymańnie hałasoŭ niepasredna ad členaŭ žury. Dniami arhanizacyja zajaviła, što hetaja taktyka «abmiarkoŭvajecca z adkaznymi bakami naŭprost», ale ŭsio, što adbyvajecca, nie admienić naminacyju spadaryni Rajzbara.

Nienaŭmysny pabočny efiekt hetaj šumichi — u tym, što ludzi sapraŭdy zacikavilisia, što ŭjaŭlaje saboj film — pretendent na «pahanuju aviečku».

Pavialičyć

Film «Dziela Łeśli» źniaŭ Majkł Morys, scenaryj napisaŭ Rajan Binaka. Stužku možna adnieści da žanru svabodnaj dramy, jakaja nie prycharošvaje realnaść i ruchavik jakoj — centralny piersanaž. Takija raboty doŭhi čas byli typovymi na fiestyvalach nakštałt South by Southwest (SXSW), dzie film debiutavaŭ u 2022-m. Takija stužki, aryjentavanyja na darosłych, ciažej pradać studyjam i, jak praviła, ich adrazu vypuskajuć u ličbavym farmacie. Na adnym z pakazaŭ arhanizatarka apisała «Dziela Łeśli» jak «adzin z tych filmaŭ, jakija vymirajuć».

Łeśli — žančyna-adščapienka ŭ maleńkim miastečku na zachadzie Techasa, dzie miascovyja žychary viedajuć jaje pa tym, što jana pramatała džek-pot u łatareju, a taksama pa jaje niaprostych adnosinach z synam. U niejkim sensie film ujaŭlaje saboj hruby partret pjanicy, u jakoj jość tolki paciorty ružovy čamadan, što zachoŭvaje reštki jaje raniejšaha žyćcia.

Bujnyja zorki raniej užo daśledavali zmročnuju temu ałkahalizmu ŭ takich filmach, jak «Pakidajučy Łas-Viehas» (Nikałas Kiejdž) i «Zorka naradziłasia» (Bredli Kupier siarod inšych). Mis Rajzbara — anhlijskaja aktrysa, najbolš viadomaja hledačam pa artchausnych dramach («Biordmen» Alechandra Hansalesa Injarytu, «Načnyja źviary» Toma Forda), avanturnych žanravych karcinach («Uładalnik» Brendana Kronenbierha) i prestyžnych telesieryjałach («Radavod», «Vaka»).

Siarod akcioraŭ druhoha płanu «Dziela Łeśli» — Oŭen Cih, jaki ihraje syna Łeśli Džejmsa. Majučy stabilnaje žyćcio ŭ inšym horadzie, jon z aściarohaj dazvalaje svajoj maci zastacca ŭ svajoj kvatery — uźjadnańnie, jakoje niepaźbiežna idzie naŭskasiak.

Znajomy mnohim akcior Styvien Rut ihraje bajkiera pa imieni Dač — jon biare Łeśli da siabie nasupierak žadańniu inšaj byłoj siabroŭki, Nensi, jakuju sa stalovaj naśmieškaj ihraje Elisan Dženi.

Mark Maran, što dapamoh pryciahnuć uvahu da «Dzieli Łeśli», uziaŭšy intervju ŭ spadaryni Rajzbara ŭ svaim padkaście WTF, vykonvaje jašče adnu z hałoŭnych rolaŭ — Suini, dobrasardečnaha miascovaha žychara, uładalnika tannaha matela. Suini idzie suprać zdarovaha sensu, kali prapanoŭvaje Łeśli pracu — prybirać pakoi. Padčas razmoŭ za viačerami, razahretymi ŭ mikrachvaloŭcy, pamiž imi naradžajecca aściarožny davier, adnak dla Łeśli heta ciažki čas prymireńnia sa svajoj zaležnaściu.

Chonki-tonk pieśni Doli Partan, Džordža Džonsa i Uejłana Dženinhsa supravadžajuć akciorskuju ihru Rajzbara, u tym liku ŭ miascovym bary, dzie razhortvajucca samyja niepradkazalnyja sceny. Pierad zakryćciom bara paviedamleńnie pieśni Vili Nelsana adlustroŭvajecca na tvary Łeśli z kožnym radkom, u tym liku: «Vy ŭpeŭnienyja, što heta — toje miesca, dzie vy chočacie być?»

Liryka śviedčyć pra zruch da vyratavańnia dla Łeśli, ale hetaje vyratavańnie nie budzie lohkim.

• 9
• 0
• 1
• 1
• 1
• 0
• 2
• 0