Juryju Čyžu dali try z pałovaj hady pazbaŭleńnia voli. Ale nie pasadzili

Na ŭvachodzie va ŭsich užo pa tradycyi zapisvali pašpartnyja danyja. U kułuarach suda kazali, što na praces da sudździ Valeryja Jeśmana «čakajecca šmat narodu». Choć, pa praŭdzie kažučy, ludziej sabrałasia nie vielmi šmat — krychu bolš za dziasiatak razam z prakuroram i advakatami.

Juryj Čyž pryjšoŭ za 10 chvilin da pačatku pracesu. U sinim harnitury, z uśmieškaj i biez sumki, jakuju zvyčajna biaruć z saboj abvinavačvanyja na abviaščeńnie prysudu tak by mović na ŭsialaki niepryjemny vypadak.

Uładzimir Japryncaŭ u sud nie pryjšoŭ. Jaho advakat taksama.

Zdymki ŭ budynku suda kateharyčna zabaranili. Pra heta niekalki razoŭ u kalidory i ŭžo ŭ zale abviaściła ŭsim prysutnym supracoŭnica suda.

Pryčym u kalidory suda zabaranili navat aŭdyjazapis — ubačyŭšy dyktafon, milicyjant adrazu zapatrabavaŭ jaho prybrać. Ździvilisia navat advakaty.

Jak paviedamlałasia, Čyža abvinavačvali ŭ lehalizacyi srodkaŭ, atrymanych złačynnym šlacham, a taksama ŭ machlarstvie.

Praces pa hučnaj spravie prachodziŭ u zakrytym režymie: pra heta paprasiŭ dziaržabvinavaŭca, matyvavaŭšy tym, što ŭ pastanovie ab pryciahnieńni Čyža ŭ jakaści abvinavačvanaha i ŭ materyjałach kryminalnaj spravy majecca infarmacyja dla słužbovaha karystańnia, jakaja nie moža padlahać razhałošvańniu.

Tamu padrabiaznaściaŭ pa spravie niašmat — na žal, usio samaje cikavaje zastałosia za začynienymi dźviaryma. Viadoma tolki, što niekatoryja sudovyja pasiadžeńni prachodzili biez Uładzimira Japryncava i jaho advakata.

Juryj Čyž znachodziŭsia pad vartaj dvojčy: z 11 sakavika pa 14 vieraśnia 2016 hoda i z 15 sakavika 2021 pa 9 vieraśnia 2022 hoda.

Pa niekatorych raniej vystaŭlenych abvinavačvańniach jon byŭ pamiłavany.

Jak vynikaje z prysudu, jaki začytaŭ sudździa Valeryj Jeśman, ad adbyćcia ŭ kałonii Juryja Čyža vyzvalili — užyli amnistyju i zaličyli ŭ termin pakarańnia toje, što jon užo adsiedzieŭ.

Bieź źmien pakinuli zabaronu na vyjezd z krainy — da ŭstupleńnia sudovaha rašeńnia ŭ zakonnuju siłu. Takim čynam, Čyž pakul nievyjazny.

U sudzie prahučała, što hrošy Čyža, kanfiskavanyja padčas pieratrusaŭ, zachoŭvalisia na depazitnym rachunku KDB, ciapier ich možna budzie zabrać. Havorka nie pra miljony dalaraŭ — sumy nazyvalisia nievialikija.

Majomaść biznesoŭca taksama vyzvalili ad aryštu.

Jak Juryj Čyž adreahavaŭ na prysud?

«Kali adnym słovam vykazać, to čas projdzie — raźbiaromsia, — skazaŭ jon «Narodnaj voli». — Heta rašeńnie — tolki adpraŭny punkt dla mianie. Mahčymaść dalej zajmacca svaimi spravami. A napieradzie jašče čakaje niamała, adnaŭlać šmat čaho daviadziecca».

Źjazdžać ź Biełarusi Juryj Čyž nie maje namieru. I nie tolki tamu, što ciapier jašče časova nievyjazny.

«Tut šmat spraŭ», — kaža jon.

• 4
• 0
• 4
• 4
• 2
• 1
• 2
• 0