U Siryi vybuchnuli bujnyja pratesty paśla mocnaha padaražańnia paliva

U niadzielu, 13 vieraśnia, siryjski ŭrad abviaściŭ pra pavyšeńnie koštu dyzielnaha paliva na 40%, a bienzinu — na 28%. Ułady nazvali heta časovaj mieraj, źviazanaj z rostam suśvietnych cen na naftu i naftapradukty. Jašče adnoj pryčynaj stała spynieńnie na madernizacyju naftapierapracoŭčaha zavoda ŭ Banijasie — najbujniejšaha z dvuch takich pradpryjemstvaŭ u Siryi.

Ministr enierhietyki Siryi Machamied al-Bašyr paviedamiŭ, što kraina ciapier zdabyvaje tolki kala 102 tysiač baralaŭ nafty ŭ sutki, a spažyvaje kala 325 tysiač. Tamu Siryi davodzicca impartavać paliva.

Žychary krainy aścierahajucca, što padaražańnie bienzinu i dyziela pryviadzie da rostu cen praktyčna na ŭsie tavary i pasłuhi. U adkaz jany pačali vychodzić na vulicy, palić aŭtamabilnyja šyny i pierakryvać trasy.

U paniadziełak paviedamleńni pra pratesty pastupali z Chamy, Chan-Šejchuna i Maarat-en-Numana, raźmieščanych kala šašy, jakaja praz Alepa viadzie da tureckaj miažy. Akcyi taksama adbyvalisia ŭ Azazie i Al-Babie ŭ rajonie Damaska, a taksama ŭ Racy, Dejr-ez-Zory, Chasacy i inšych haradach uschodu krainy. Pratesty prajšli i ŭ Kamyšły na paŭnočnym uschodzie Siryi, u rajonach, nasielenych siryjskimi kurdami.

Słužba pravierki faktaŭ Bi-bi-si paćvierdziła sapraŭdnaść videazapisaŭ biesparadkaŭ na dvuch pamiežnych punktach — adzin ź ich znachodzicca na miažy ź Irakam, druhi — na miažy z Turcyjaj.

Karespandent AFP u Kamyšły paviedamiŭ, što na vulicy vyjšli sotni ludziej. Jany trymali płakaty z nadpisami «Nie palitycy hoładu!» i «Nie pavyšeńniu cenaŭ na paliva!», a taksama skandavali: «Paliva — dla naroda!»

Asabliva vostra nastupstvy padaražańnia adčuli taksisty. Taksist z Damaska pa imieni Machamied raskazaŭ Reuters, što napiaredadni zaliŭ u mašynu 10 litraŭ bienzinu za 185 tysiač starych siryjskich funtaŭ, a za ceły dzień zarabiŭ 225 tysiač. Paśla vyliku koštu paliva ŭ jaho zastałosia tolki 20—25 tysiač funtaŭ. Paśla denaminacyi, praviedzienaj u Siryi ŭ pačatku 2026 hoda, heta adpaviadaje 200—250 novym funtam — mienš za dva dalary.

Inšy damaski taksist, Imad Abu-Ras, zajaviŭ, što paśla bienzinu i dyziela pačnuć daražeć harodnina i pradukty charčavańnia. Jon raskazaŭ, što maje piaciora dziaciej i štodnia jamu nieabchodna kuplać piać pačkaŭ chlebnych aładak. Kali ich cana vyraście da dzieviaci tysiač starych siryjskich funtaŭ za pačak, tolki na chleb dla siamji spatrebicca kala 40 tysiač funtaŭ u dzień, abo prykładna miljon funtaŭ u miesiac. Heta kala 76 dalaraŭ.

Ekanamisty taksama ličać abhruntavanymi aściarohi nasielnictva nakont dalejšaha rostu cen. Siryjski ekanamist Chasan Murad adznačyŭ, što prablema padaražańnia paliva nie zvodzicca tolki da koštu litra bienzinu abo dyziela. Jana zakranaje vydatki na transpartavańnie, ceny na pradukty charčavańnia, pakupnickuju zdolnaść nasielnictva, prybytkovaść pradpryjemstvaŭ, zaniataść i inviestycyi.

Pavodle jaho słoŭ, rost cen na paliva moža paŭpłyvać i na ahulnuju zdolnaść siryjskaj ekanomiki adnavicca i vyjści ź ciapierašniaha kryzisu.

• 1
• 0
• 2
• 0
• 0
• 0
• 0
• 0