Zialenski zajaviŭ, što Rasija za apošni čas dvojčy sprabavała atakavać dronami jahony samalot
Prezident Ukrainy Uładzimir Zialenski zajaviŭ, što Rasija dvojčy za apošnija niekalki tydniaŭ sprabavała atakavać jaho prezidencki samalot bieśpiłotnikami. Pra heta jon raskazaŭ u intervju CBS News, apublikavanym 15 vieraśnia.
Pavodle słoŭ Zialenskaha, pieršy incydent adbyŭsia padčas jaho znachodžańnia ŭ Małdovie.
«U Małdovie znachodziŭsia moj prezidencki samalot, i mienavita tamu jany atakavali Małdovu», — skazaŭ ukrainski prezident.
Zialenski taksama paviedamiŭ, što jašče adzin padobny vypadak adbyŭsia, kali jon viartaŭsia va Ukrainu praz Kišynioŭ. Pavodle jaho słoŭ, u pavietranuju prastoru Małdovy znoŭ zajšoŭ adzin abo dva bieśpiłotniki. Raniej pra hety druhi incydent nie paviedamlałasia.
Prezident Ukrainy ličyć, što takija dziejańni byli častkaj rasijskaj stratehii zapałochvańnia jaho i inšych zamiežnych lidaraŭ.
Pieršy viadomy incydent adbyŭsia 8 vieraśnia. Zialenski razam z žonkaj prylacieŭ u Narviehiju, kab uziać udzieł u pachavańni karala Charalda i pravieści pieramovy z premjer-ministram Narviehii Jonasam Haram Ściore. Paźniej Ściore raskazaŭ, što padčas vyletu prezidenckaha samalota z Małdovy bieśpiłotnik ledź nie sutyknuŭsia ź im.
Pasoł Małdovy ŭ ZŠA Uładzisłaŭ Kulminski dapuściŭ, što rasijski dron moh naŭmysna zalacieć u pavietranuju prastoru Małdovy mienavita ŭ toj momant, kali samalot Zialenskaha znachodziŭsia ŭ aeraporcie Kišyniova. Adnak jon padkreśliŭ, što pakul rana śćviardžać, što cellu bieśpiłotnika była niepasredna ataka na prezidenta Ukrainy.
Krynicy ŭ Ofisie prezidenta Ukrainy raniej paviedamlali, što samalot Zialenskaha i rasijski dron adnačasova nie znachodzilisia ŭ pavietry. Ukrainski bok sačyŭ za palotam bieśpiłotnika i čakaŭ, pakul jon źniknie z radaraŭ, paśla čaho samalot moh praciahnuć ruch.
10 vieraśnia ahienctva Associated Press paviedamiła, što dron upaŭ prykładna za 160 kiłamietraŭ ad aeraporta Kišyniova. Paśla padzieńnia ŭźnikli čatyry pažary, ale ludzi nie paciarpieli.
Ułady Małdovy na peŭny čas zakryli pavietranuju prastoru krainy, kab harantavać biaśpieku samalotaŭ, jakija znachodzilisia ŭ niebie. U vyniku byli zatrymanyja try rejsy, u tym liku samalot ź Zialenskim.
Paźniej Ministerstva abarony Małdovy paviedamiła, što pracu aeraporta faktyčna paralizavaŭ bieśpiłotnik typu Shahed. Taksama było ŭstanoŭlena, što hety BPŁA zachodziŭ u pavietranuju prastoru Rumynii.
Samalot Zialenskaha nie byŭ cellu drona, pavietranaje sudna znachodziłasia na ziamli ŭ Kišyniovie
Samalot Zialenskaha, jaki vylataŭ z Małdovy ŭ Narviehiju, ledź nie trapiŭ pad udar drona
Pieršaja zamiežnaja avijakampanija spyniła paloty ŭ Rasiju paśla papiaredžańnia Zialenskaha pra niebiaśpieku ŭ niebie
Małady biełarus nie chacieŭ siadzieć u Rasii za narkotyki, tamu prydumaŭ, jak chutka vyjści z kałonii — i vyjšaŭ na ŭkrainskija pazicyi pad Pakroŭskam44
Kamientary