Aleksin i były biełaruski deputat trymali miljony jeŭra ŭ šviejcarskim banku
Biełaruski rasśledavalnicki centr vyvučyŭ danyja ŭciečki ab klijentach bujnoha šviejcarskaha banka Credit Suisse. Siarod ich akazałasia niekalki cikavych proźviščaŭ. Rasśledavalniki ličać, što hetyja ludzi mahli skarystacca sakretnaściu šviejcarskaj bankaŭskaj sistemy dla sumnieŭnych metaŭ.
U studzieni 2012 u šviejcarskim banku Credit Suisse źjaviŭsia rachunak na nienazvanuju kampaniju biełaruskaha biznesmiena ŭdačy Alaksieja Aleksina. U lipieni na im naličvałasia bolš za $36 młn.
Zdaryłasia heta ŭ razhar schiemy z rastvaralnikami i razbaŭlalnikami, ideju jakoj prypisvajuć Aleksinu. U 2012 hodzie Rasija spyniła schiemy z rastvaralnikami, a praz dva hady Aleksin zakryŭ rachunak u Credit Suisse.
Aleksin admoviŭ rasśledavalnikam u kamientaryi.
Były deputat Pałaty pradstaŭnikoŭ i kolišni hiendyrektar «Biełaruśkalija» (zajmaŭ hetaje kresła z 1992 pa 2001 hod) Piotr Kałuhin u 2008-m adkryŭ rachunak u šviejcarskim banku Credit Suisse dla nienazvanaj firmy.
Na toj momant jon aficyjna nie pracavaŭ ni ŭ adnoj kampanii ŭ Biełarusi — byŭ tolki deputatam Pałaty pradstaŭnikoŭ. Praz hod i siem miesiacaŭ na hetym rachunku źjavicca amal $1,3 młn.
Z dapamohaj Kibierpartyzan rasśledavalniki vyśvietlili, što dachod Kałuhina za siem hadoŭ — z 2003 pa 2009 hady — skłaŭ kala $87 tysiač. Heta ŭ 15 razoŭ mienš, čym suma na jaho šviejcarskim rachunku.
U 2009 hodzie Kałuhin pačaŭ pracavać u «Šachtaśpiecbudzie» — byłym padraździaleńni «Biełaruśkalija», jakoje stała pryvatnym pradpryjemstvam. Pryčym pryznačeńnie Kałuhina adbyłosia napiaredadni vialikaha prajekta.
U studzieni 2010 hoda Biełaruś damoviłasia ab budaŭnictvie ŭ Turkmienistanie Harłyckaha horna-abahačalnaha kambinata koštam blizu $1 młrd. Hienieralny padradčyk prajekta, kampanija «Biełharchimpram», uziaŭ na subpadrad «Šachtaśpiecbud». Praz dva miesiacy na šviejcarskim rachunku Kałuhina źjavilisia tyja samyja $1,3 młn.
Pa tłumačeńni źviarnulisia naŭprost da Piatra Kałuhina, ale ŭ telefonnaj razmovie vyrazna prakamientavać pytańni jon nie zmoh.
Budaŭnictva kompleksu abiarnułasia skandałam. Pavodle źviestak ŚMI, turkmienskija ŭłady abvinavacili Biełaruś u nienaležnym vykanańni kantraktu i padali isk u arbitražny instytut handlovaj pałaty Stakholma, šyroka viadomy jak Stakholmski arbitraž. Škodu jany acanili ŭ $900 młn. U Biełarusi hetyja abvinavačvańni adkinuli i padali sustrečny isk na $400 młn. Ab zaviaršeńni razboru dahetul nie paviedamlałasia, ale kalijny kambinat u Turkmienistanie ŭsio ž taki zdali ŭ ekspłuatacyju. Adbyłosia heta ŭ 2017 hodzie, choć zapusk płanavaŭsia dvuma hadami raniej.
Uvieś hety čas Piotr Kałuhin pracuje ŭ «Šachtaśpiecbudzie». Na jaho zapisany nievialiki dom u Słuckim rajonie, na jaho žonku — čatyrochpakajovaja kvatera kala Kamsamolskaha voziera ŭ Minsku i dvuchpaviarchovy katedž la Salihorskaha vadaschovišča.
Svoj rachunak u šviejcarskim banku Kałuhin zakryŭ u žniŭni 2014 hoda.
Padrabiaźniej z rasśledavańniem možna aznajomicca pa spasyłcy.
Kamientary