Rodnyja žurnalista Siarhieja Sacuka sustrelisia ź im u izalatary: palitviazień narakaje na fizičny stan

Jak raskazaŭ Biełaruskaj asacyjacyi žurnalistaŭ Alaksandr Sacuk, rodny brat palitviaźnia, viestku pra toje, što prysud pieršaj instancyi pakinuli ŭ sile, Siarhiej uspryniaŭ spakojna. Adzinaje, ździviła, što apielacyjny razhlad byŭ zakrytym, choć u Minskim haradskim sudzie praces prachodziŭ u adkrytym režymie.

Na dumku Siarhieja Sacuka, heta moža śviedčyć, što sudździam prosta niama čym abvierhnuć atrymanyja ŭ apielacyjnaj zajavie dokazy jaho nievinavataści. Kudy bolš zasmuciŭsia navinoj pra toje, što za niekalki dzion da razhladu skarhi zatrymali jaho advakata — voś heta zdałosia žurnalistu padazronym.

«Siarhiej kazaŭ, što padaŭ sudu ŭsie nieabchodnyja i dakładnyja dokazy svajoj nievinavataści. Adnak ni pryviedzienyja arhumienty, ni pakazańni śviedak nie byli navat razhledžanyja i ŭličanyja pry vyniasieńni prysudu, a vierdykt zasnavany tolki na zdahadkach i dapuščalnaści! Niachaj heta, padkreśliŭ jon, budzie ciapier na ich sumleńni!», — pierakazaŭ słovy brata Alaksandr Sacuk.

Svajaki zaniepakojenyja, što na spatkańni ŭ Siarhieja Sacuka byŭ chvaravity vyhlad — ciomnyja kruhi pad vačyma, aciokły tvar, razmaŭlaŭ u nos, bo hajmaryt niama čym lačyć.

«Spytali pra nastupstvy, jakija jon raniej uzdymaŭ u listach — prablemy z sercam, mocnyja boli i častyja mihalnyja arytmii, źviazanyja ź išemičnaj chvarobaj serca. Padčas rehularnaha pryjomu lekavyja preparaty dapamahali, jašče možna było tryvać, ale ciapier leki prosta nie dajuć. Patrebnaje abśledavańnie jamu tam zrabić nie mohuć. My ŭsie chvalujemsia, pakolki arytmija nadzvyčaj niebiaśpiečnaja, pryvodzić nie tolki da patałohij, a časta i da raptoŭnaj śmierci, tak što heta nie žarty. U jaho žonki taksama surjoznaja sardečnaja patałohija, z pryčyny jakoj maje hrupu invalidnaści».

Alaksandr Sacuk pryznaje, što brat vielmi stamiŭsia, ale ducham usio roŭna nie padaje.

«Prosta jak by vyhareŭ znutry — praz toje, što vakoł adbyvajecca. Dziakujučy šmatlikim pierasialeńniam pa kamierach nasłuchaŭsia šmat historyj pra złamanyja losy ludziej. Kaža, što za dva miesiacy prajšło stolki ludziej, kolki na Vaładarcy i za hod nie było! Słuchaješ kožnaha, i prosta hublaješsia, nie razumieješ, u jakoj takoj nierealnaj krainie znachodzišsia. Skazaŭ, što adčuvaje vostruju patrebu vycisnuć uvieś hety bol ź siabie, skinuć hetuju nošu».

Bližejšym časam Siarhieja Sacuka pavinny vypravić u adnu z kałonij dla adbyćcia pakarańnia. Jak śviedčyć praktyka, zvyčajna heta adna z ustanoŭ toj vobłaści, kudy viaźnia vypraŭlajuć u SIZA da razhladu apielacyi. 

Žurnalista zatrymali 8 śniežnia 2021 hoda, u jaho doma praviali vobšuk, potym adbyŭsia dopyt u Śledčym kamitecie — ź niejkich pryčyn pravaachoŭniki padniali staruju spravu pavodle č. 2 art. 430 Kryminalnaha kodeksa («Atrymańnie chabaru»). Siarhieja Sacuka ŭziali pad vartu i źmiaścili ŭ SIZA №1 Minska.

Užo tam da zhadanaha artykuła dadalisia jašče dva: art. 130 KK (raspalvańnie varožaści) i art. 426 KK (pieravyšeńnie ŭłady ci słužbovych paŭnamoctvaŭ).

Razhlad spravy pačaŭsia 23 vieraśnia 2022 hoda ŭ Minskim haradskim sudzie. Abvinavačańnie zaprasiła dla Siarhieja Sacuka 8 hadoŭ pazbaŭleńnia voli, praź miesiac ad pačatku pasiadžeńniaŭ sudździa Śviatłana Bandarenka pahadziłasia z prapanovaj prakurora i pakarała žurnalista pazbaŭleńniem voli na zapatrabavany termin u kałonii va ŭmovach uzmocnienaha režymu i štrafam u ekvivalencie 16 tysiač rubloŭ.

U listapadzie Siarhieja Sacuka pieraviali ź minskaha SIZA ŭ mahiloŭskuju turmu №4. Sioleta 10 lutaha Viarchoŭny sud nie zadavoliŭ apielacyju i pakinuŭ u sile prysud pieršaj instancyi.

• 0
• 0
• 0
• 0
• 0
• 0
• 3
• 0