Prapahandystka z puła Łukašenki pačała pracavać jašče i psichołaham

Kaciaryna Krutalevič spačatku skončyła fakultet fiłasofii i sacyjalnych navuk BDU. Chacieła trapić na jurfak, ale nie atrymałasia, bo sumniavałasia, što zdaść ispyt pa matematycy. Tamu pajšła tudy, kudy byli šansy pastupić. Kaža, što na pieršych kursach pracavała aficyjantkaj, pierakładčycaj, razdavała fłajery.

Žurnalisckuju karjeru pačynała na radyjo ANT. Raspaviadaje, što ŭ efir jaje vypuścili na paŭhoda paźniej za astatnich praz toje, što byli pytańni pa hołasie. Paźniej Kaciaryna trapiła na telebačańnie, pracavała jak reparciorka — šlach da miesca viadučaj telenavin zaniaŭ u Krutalevič bolš za 10 hadoŭ.

Pavialičyć

Jak šmat u kaho z prapahandystaŭ, karjera Krutalevič pajšła ŭharu paśla 2020 hoda. Užo ŭ 2021 hodzie Kaciaryna atrymała padziaku ad Łukašenki. A potym i prapanovu pierajści z ANT na BT, jakuju paličyła pryvabnaj.

Na novym miescy pracy Kaciaryna čas marnavać nie stała. U 2022 hodzie zapuściła aŭtarski prajekt «Dakrucim z Krutalevič». Tearetyčna žančyna źbirałasia razburać fejki i vykryvać manipulacyi ŭ ŚMI i błohieraŭ, ale faktyčna stała raspaŭsiudžvać naratyvy biełaruskaj prapahandy.

Kaciaryna taksama adna ź viadučych prahramy «Čas pieršaha» na BT, dzie raspaviadajuć pra budni Łukašenki.

U intervju žančyna kaža pra jaho z zachapleńniem: maŭlaŭ, i pracuje toj šmat, i dziaciej cudoŭna vychavaŭ, i ŭ chakiej hulaje… Chvalujecca, ci śpić Łukašenka chacia b pa šeść hadzin za sutki.

Pavialičyć

Na tych ža, chto ŭ 2020 hodzie chacieŭ pieramien, Kaciaryna hladzić pabłažliva.

Raniej pracu na prapahandu Kaciaryna sumiaščała z praviadzieńniem treninhaŭ pa kamunikacyi (naprykład, dla Bresckaha abłvykankama) i kursaŭ pa stvareńni asabistaha brendu.

Pavialičyć

Sioleta Krutalevič atrymała dypłom psichołaha ŭ BDPU imia Maksima Tanka. Heta była nie paŭnavartasnaja vyšejšaja adukacyja, a pierapadrychtoŭka. Ciapier Kaciaryna aktyŭna zaprašaje na asabistyja kansultacyi.

Kolki ž kaštuje terapija ŭ prapahandystki z łukašenkaŭskaha puła? Za 60 chvilin Kaciaryna prosić 120 rubloŭ.

I voś ź jakimi pytańniami jana prapanoŭvaje źviartacca: prablemy ź dziełavoj kamunikacyjaj, składanaści ŭ publičnych vystupach, kali čałavieku składana adstojvać siabie (jak na pracy, tak i ŭ siamji). Hatova pracavać i z tymi, chto zabłytaŭsia ŭ žyćci i ŭvieś čas tryvožycca ci nie adčuvaje ščaścia.

Na zaniatki Kaciaryna zaprašaje taksama padletkaŭ, jakija adčuvajuć stres, samotnaść, tryvohu.

Sama Krutalevič pryznajecca, što bolš za ŭsio joj cikava pracavać z kryzisnaj psichałohijaj i kirunkam dasiahnieńniaŭ.

Raniej inšaja prapahandystka łukašenkaŭskaha puła Natalla Stelmach taksama raptoŭna vyrašyła «lekavać dušy» — ale zusim pa-inšamu. Jana z mužam źjechała ŭ Mieksiku, dzie ciapier arhanizoŭvaje šamanskija abrady z narkatyčnymi hrybami i žabami. Patencyjnym udzielnikam abiacajuć hłybokuju ŭnutranuju transfarmacyju, vyzvaleńnie ad emacyjnych błokaŭ i traŭm, a taksama ačyščeńnie ad nazapašanaha stresu i napružańnia.

• 0
• 2
• 1
• 8
• 0
• 1
• 7
• 0