Rasijskija ŭłady źbirajucca da 2030 hoda dałučyć Biełaruś — ŚMI atrymali dostup da dakumienta Kramla
Žurnalisty atrymali dostup da ŭnutranaha dakumienta rasijskich uładaŭ pad nazvaj «Stratehičnyja mety Rasijskaj Fiederacyi ŭ Biełarusi», zhodna ź jakim Rasija źbirajecca da 2030 hoda akupavać Biełaruś. U rasśledavańni ŭdzielničaŭ kansorcyum žurnalistaŭ z Süddeutsche Zeitung, WDR, NDR, Yahoo News, Delfi Eesti, centra «Daśje», Expressen, Independent, Frontstory, «Biełaruskaha rasśledavalnickaha centra» i VSquare, piša «Novaja hazieta. Jevropa».
Dakumient datujecca letam 2021 hoda i źmiaščaje 17 staronak. U im pieraličanyja palityčnyja, abaronnyja, handlovyja i sacyjalnyja mety rasijskich uładaŭ u Biełarusi. Jany padzielenyja na try katehoryi — karotkaterminovyja (da 2022 hoda), siarednieterminovyja (da 2025 hoda) i dalokaterminovyja (2030 hod).
U dakumiencie razhledžana ŭsio, što źviazana z abjadnańniem krain, śćviardžajuć žurnalisty. Sam dakumient jany nie publikujuć.
Naprykład, u im havorycca, što reforma Kanstytucyi — jaje ŭ Biełarusi prymuć u lutym 2022 hoda — pavinna być zavieršanaja ŭ adpaviednaści z rasijskimi intaresami, a zakony respubliki — «harmanizavanyja» z zakonami RF.
Jašče adnoj metaj zjaŭlajecca «zabieśpiačeńnie pieravažnaha ŭpłyvu Rasijskaj Fiederacyi ŭ halinie sacyjalnaj palityki, handlu, ekanomiki, navuki, adukacyi i kultury».
Akramia hetaha, rasijskija ŭłady źbirajucca spraścić praceduru vydačy rasijskich pašpartoŭ biełaruskim hramadzianam «u metach stvareńnia prasłojki rasijan, zacikaŭlenych u intehracyi, i biznes-kołaŭ, aryjentavanych na rasijski rynak» — takuju stratehiju Rasija vykarystoŭvała ŭ Paŭdniovaj Asiecii, Abchazii, a taksama ŭ akupavanaj častcy Ukrainy.
Taksama da 2030 hoda płanujecca adkryć u Biełarusi punkty zdačy Adzinaha dziaržaŭnaha ekzamiena.
Vonkavyja ekśpierty, jakija taksama vyvučyli dakumient, ličać jaho sapraŭdnym.
«Pa svajoj źniešniaj formie dakumient nahadvaje standartny dakumient rasijskaj biurakratyi abo palityčnaha kiravańnia», — skazaŭ namieśnik dyrektara Stakholmskaha centra ŭschodniejeŭrapiejskich daśledavańniaŭ (SCEEUS) Marcin Krah.
Takoje ž mierkavańnie vykazali pradstaŭniki zachodnich śpiecsłužbaŭ, jakim žurnalisty pakazali dakumient. «Źmiest dakumienta absalutna praŭdapadobny i adpaviadaje tamu, što my taksama bačym», — prakamientavaŭ nienazvany supracoŭnik raźviedki.
«Mety Rasii ŭ dačynieńni da Biełarusi tyja ž, što i ŭ dačynieńni da Ukrainy. Tolki ŭ Biełarusi jana raźličvaje na prymus, a nie na vajnu.
Jaje kančatkovaj metaj pa-raniejšamu zjaŭlajecca masavaja inkarparacyja», — zajaviŭ Majkł Karpientar, ambasadar ZŠA ŭ Arhanizacyi pa biaśpiecy i supracoŭnictvie ŭ Jeŭropie.
Ciapier čytajuć
Historyja ŭ EHU — heta histfak vašaj mary. Jeŭrapiejski dypłom z navučańniem na biełaruskaj movie pry intensiŭnym vyvučeńni anhlijskaj. I poŭnaja svaboda11
Kamientary
USIE ŬŽO AKUPAVANA I SKONČANA