ZŠA chutkimi tempami rychtujuć Ukrainu da viasnovaha kontrnastupleńnia

Ministr abarony ZŠA Łojd Ościn u sieradu paśla virtualnaha pasiadžeńnia šmatnacyjanalnaj kantaktnaj hrupy pa pytańniach abarony Ukrainy zajaviŭ, što «Ukraina nie moža hublać času».

«My pavinny chutka i poŭnaściu vykanać našy abiacańni, — skazaŭ Ościn, — Heta ŭklučaje ŭ siabie dastaŭku našaj braniatechniki na pole boju i zabieśpiačeńnie taho, kab ukrainskija sałdaty jak maha chutčej atrymali padrychtoŭku, zapasnyja častki i techničnuju padtrymku, nieabchodnuju im dla vykarystańnia hetych novych sistem».

Z nabližeńniem viasny amierykanskija aficyjnyja asoby ŭsio bolš zaniepakojenyja tym, što va Ukrainie pamianšajecca kolkaść bojeprypasaŭ, srodkaŭ supraćpavietranaj abarony i daśviedčanych sałdat.

Pientahon zajaŭlaje, što niezaležna ad stratehii Kijeva na poli boju, ZŠA chočuć, kab ukrainskija sałdaty mieli zbroju, nieabchodnuju dla praciahu baraćby.

Rasija miesiacami abstrelvała krainu rakietami, imknučysia nie tolki vyklikać razbureńni, ale i źniasilić zapasy supraćpavietranaj abarony Ukrainy. Ukrainskija sałdaty raskazvajuć pra vostry niedachop asnoŭnych bojeprypasaŭ, u pryvatnaści minamiotnych min i artyleryjskich snaradaŭ. Pavodle acenak amierykanskich aficyjnych asob, za hod vajny zahinuła bolš za 100000 ukrainskich vajskoŭcaŭ, u tym liku samych vopytnych sałdat.

U materyjale zaznačajecca, što abodva baki niasuć vialikija straty ŭ bitvie za Bachmut. Rasija ŭžo dzieviać miesiacaŭ akružaje horad, pieratvarajučy jaho ŭ ruiny.

Ukrainskija vojski admaŭlajucca zdavacca, a prezident Uładzimir Zialenski nastojvaje na tym, što abarona Bachmuta zjaŭlajecca klučavoj dla ŭtrymańnia inšych uschodnich haradoŭ.

Amierykanskija ž aficyjnyja asoby bolš skancentravanyja na padrychtoŭcy Ukrainy da vialikaha viasnovaha nastupu dla viartańnia terytoryj, jaki, jak jany čakajuć, pačniecca ŭ mai.

Sotni zachodnich tankaŭ i braniatechniki, jakaja moža ŭzvodzić masty i dazvalać vojskam pierapraŭlacca praz reki, nakiroŭvajucca va Ukrainu dla nastupleńnia.

Amierykanskija i jeŭrapiejskija partniory taksama dasyłajuć vielizarnuju kolkaść bojeprypasaŭ i 155-mm snaradaŭ, jakija Ukraina vyznačyła jak najbolš važnuju patrebu.

U lutym bolš za 600 ukraincaŭ zaviaršyli 5-tydniovuju prahramu padrychtoŭki ŭ Hiermanii, jakaja ŭklučała ŭ siabie bazavyja navyki, takija jak stralba, a taksama miedycynskuju padrychtoŭku i instruktaž pa manieŭravańni na bajavych mašynach «Bredli» i braniatransparciorach «Strajkier» amierykanskaj vytvorčaści. Ciapier hetyja siły viarnulisia na pole boju, i druhaja partyja z sotniaŭ dadatkovych sałdat ciapier prachodzić navučańnie pa hetaj prahramie.

Za začynienymi dźviaryma amierykanskija aficyjnyja asoby patrabujuć ad Kijeva ekanomić artyleryjskija bojeprypasy i vieści bolš prycelny ahoń. Asabliva ŭ Bachmucie, dzie abodva baki raschodujuć bojeprypasy chutkimi tempami.

Pa słovach amierykanskich čynoŭnikaŭ, Kijeŭ jašče nie vyznačyŭsia sa stratehijaj, ale ŭ jaho jość, pa sutnaści, dva varyjanty: prasoŭvacca na poŭdzień praz Chierson da Kryma abo ruchacca na ŭschod sa svajoj paŭnočnaj pazicyi, a zatym na poŭdzień, adrezaŭšy rasijski suchaputny most.

Pieršy varyjant nie źjaŭlajecca realistyčnym, kažuć čynoŭniki, pakolki Rasija akapałasia ŭ svajoj abaronie na ŭschodnim bierazie Dniapra, a Ukraina nie maje dastatkovaj kolkaści čałaviečych resursaŭ dla paśpiachovaj desantnaj apieracyi suprać takoha rodu sił. Druhi varyjant bolš vierahodny, havorać čynoŭniki.

• 24
• 0
• 0
• 0
• 1
• 1
• 2
• 0