U Ministerstvie abarony Złučanych Štataŭ Amieryki ličać, što va ŭkrainskaj armii jość dobryja šancy pravieści paśpiachovaje kontrnastupleńnie hetaj viasnoj, piša UNIAN.
U chodzie pasiadžeńnia Kamiteta Sienata ZŠA pa ŭzbrojenych siłach kiraŭnik Pientahona Łojd Ościn paćvierdziŭ słovy sienatara-respublikanca Rodžera Vikiera, što va Ukrainy ciapier pieravaha, ale na poli boju adbyvajecca žorstkaja baraćba. Pavodle jaho słoŭ, u apošni čas nazirajucca dosyć značnyja bajavyja dziejańni ŭ rajonie Bachmuta.
«Ukraincy nanieśli rasijanam značnyja straty, i rasijanie vyčarpali zapasy braniravanych mašyn takim čynam, što nichto nie moh hetaha ŭjavić. Tamu ciapier my bačym, što Rasija biarecca za tanki T-54 i T-55 u suviazi z tym uzroŭniem strat, jaki nanieśli ŭkraincy», — skazaŭ Ościn.
Ministr abarony ZŠA patłumačyŭ: raskansiervacyja starych savieckich tankaŭ śviedčyć pra toje, što patencyjał Rasii ŭ vajnie słabieje. Taksama ŭ jaje ŭźnikajuć prablemy ź niedachopam artyleryjskich bojeprypasaŭ i inšych srodkaŭ, praz što Rasija vymušanaja źviartacca pa dapamohu ŭ Iran i Paŭnočnuju Kareju.
«Ja dumaju, što my viasnoj pabačym uzmacnieńnie bajavych dziejańniaŭ jak umovu dla palapšeńnia manieŭraŭ. Z ulikam taho, što my zrabili i praciahvajem rabić, — ja dumaju, što va Ukrainy budzie realna dobry šaniec…», — skazaŭ Ościn.
Sienatar Vikier udakładniŭ, ci vieryć Ościn, što Ukraina moža značna prasunucca ŭ pieryjad ad siońnia i da zimy.
«Ja vieru, što jość šaniec, i my ŭsio robim, što možam, kab zabiaśpiečyć, kab u ich byli mahčymaści być paśpiachovymi», — skazaŭ Ościn.
Ciapier čytajuć
Stajać na adnoj nazie z knihaj na hałavie ŭ pamiać pra błakadu Leninhrada. Čynoŭniki zapuścili vielmi dziŭny čelendž da 9 Maja23
Kamientary