Pomnik viadomym akcioram Jaromienkam prybrali ź ich mahiły paŭtara hoda tamu. Jaho demantaž nie ŭzhadnili z rodnymi. I jon dahetul zastajecca ŭ Teatry imia Janki Kupały.
Na adsutnaść nadhrobka na mahile słavutych akcioraŭ źviartajuć ŭvahu naviedniki niekropala. Na jaho miescy ciapier pustka. Staić tolki kryž pa Halinie Arłovaj, a na im pačeplenyja šyldy z datami žyćcia akcioraŭ, što byli kumirami svaich pakaleńniaŭ.
Narodnaja artystka Biełarusi Halina Arłova pamierła ŭ 2021 hodzie. Jana maci Mikałaja Jaromienki-małodšaha i žonka Mikałaja Jaromienki-starejšaha.
Jak vyśvietliła «Naša Niva», pomnik Jaromienkam byŭ demantavany ŭ 2021 hodzie.
«Dyrektar Kupałaŭskaha teatra skazaŭ, što Halinu Arłovu treba chavać pobač z mužam i synam. Tamu było vyrašana razabrać pomnik. Ciapier jon na terytoryi Teatra imia Janki Kupały. Ale praces jaho viartańnia na miesca raściahnuŭsia», — raskazali nam.
Rašeńnie ab demantažu pomnika nie było ŭzhodniena z rodnymi niabožčykaŭ, tamu jany admovilisia finansavać jaho restaŭracyju. Nieraźbiarycha z pytańniem, adkul brać srodki, zaciahnuła pracu i viartańnie pomnika na miesca.
Ministr kultury Anatol Markievič rasparadziŭsia skarystacca hrašyma z fondaŭ Teatra imia Janki Kupały.
U teatry zapeŭnivali, što restaŭracyjnyja pracy z pomnikam praciahvajucca i achviaravańniaŭ ad hramadzian nie patrabujecca.
Na viernutym pomniku Jaromienkam budzie paznačana i Halina Arłova.
Mikałaj Jaromienka-starejšy pamior u Minsku 30 červienia 2000 hoda 84-hadovym ad sardečnaha prystupu. Ën narodny artyst Biełarusi, u jaho darobku dziasiatki rolaŭ u teatry i kino. Palityčna jon byŭ addanym łukašenkaŭcam, za što jaho paśla kanstytucyjnaha pieravarotu 1996 hoda pryznačyli na siniekuru ŭ Saviet Respubliki pieršaha sklikańnia.
Mikałaj Jaromienka-małodšy pamior u Maskvie 27 maja 2001 hoda ŭ 52-hadovym vieku ad insultu. Z 1976 hoda byŭ akcioram rasijskaj kinastudyi imia Horkaha. Słavutym jon staŭ paśla adnoj z hałoŭnych rolaŭ u savieckim bajeviku «Piraty XX stahodździa», a taksama ŭ pryhodnickim sieryjale «U pošukach kapitana Hranta». Jak i ŭ baćki, u jaho dziasiatki rolaŭ u kino. U hod śmierci jon staŭ daradcam pa kultury pasolstva Biełarusi ŭ Maskvie.
Halina Arłova pamierła 21 žniŭnia 2021 hoda ŭ Minsku ŭ 92 hady. Jana narodnaja artystka Biełarusi. Usiu svaju akciorskuju karjeru adpracavała ŭ Kupałaŭskim teatry. Jana nie była viadomaj, jak muž i syn. Hałoŭnyja svaje roli adyhrała na teatralnaj scenie.
Jaromienki i Arłova pachavanyja na alei z mahiłami znanych biełaruskich akcioraŭ na Uschodnich mohiłkach.
«Naša Niva» — bastyjon biełaruščyny
PADTRYMAĆHladzicie taksama:
U Nacyjanalny akademičny teatr imia Janki Kupały nabrali akcioraŭ z Rasii
«Kvitkoŭ było nie kupić!» Što za śpiektakl z anšłaham prezientavali «Kupałaŭcy»
Nichto nie viedaŭ jaje sapraŭdnaha imia. Tajamnica Haliny Makaravaj
Ciapier čytajuć
«Heta šlach adzinočki». Biełarus bolšuju častku žyćcia pravodzić u vandroŭkach — naviedaŭ užo amal 500 abjektaŭ JUNIESKA2
Kamientary