«Pryznańnia mała. Pavinna być pakarańnie». Dva byłyja vahnieraŭcy raskazali na kamieru pra svaje złačynstvy
Prajekt Gulagu.net apublikavaŭ pakazańni dvuch byłych rasijskich źniavolenych Azamata Ułdarava i Alaksieja Savičava, jakija vajavali va Ukrainie ŭ składzie hrupoŭki «Vahnier». I Ułdaraŭ, i Savičaŭ byli pamiłavanyja ŭkazam prezidenta Rasii. U «Vahniery» jany zajmali kamandnyja pasady.
Savičaŭ, jaki, pavodle jaho słoŭ, pravioŭ u miescach pazbaŭleńnia voli 30 hadoŭ, u pryvatnaści, raskazaŭ, što pry im byli rasstralanyja kala 70 byłych źniavolenych, jakija admaŭlalisia vykonvać zahady. Akramia taho, jon
pryznaŭsia, što ŭ studzieni 2023 hoda na terytoryi Bachmuta na zahad vyšejstajačych kamandziraŭ kinuŭ 30 hranat F-1 u jamu, zapoŭnienuju zabitymi i paranienymi ŭkraincami i rasijanami, a zatym zaliŭ pareštki prykładna 60 čałaviek bienzinam i padpaliŭ, kab źniščyć cieły.
Savičaŭ taksama padrabiazna raskazaŭ na kamieru pra zabojstva 10 padletkaŭ i bolš čym 20 biazzbrojnych ukraincaŭ pa rasparadžeńni kamandziraŭ, a taksama zahadzie «začyścić žyły dom» i zabić usich, chto znachodziŭsia ŭ im.
Ułdaraŭ, u svaju čarhu, zajaviŭ, što pa zahadzie zabivaŭ dziaciej u Saladary i Bachmucie. Pa słovach byłoha źniavolenaha, a paśla vahnieraŭca, «davali kamandu začyścić i źniščyć usich» — mužčyn, žančyn, pažyłych ludziej i dziaciej.
Jon raskazaŭ, jak zabiŭ dziaŭčynku ŭ Saladary. «Joj piać—šeść hadoŭ, a ja streliŭ, ty razumieješ, kantrolny», — raskazaŭ jon.
Abodva najmity paviedamili pra šmatlikija straty hrupoŭki Vahniera, a Ułdaraŭ zajaviŭ, što byŭ śviedkam taho, jak svajakam zahinułych vahnieraŭcaŭ vydajuć pustyja cynkavyja truny dla pachavańnia, u tym liku ŭ Rastoŭskaj vobłaści. I Ułdaraŭ, i Savičaŭ śćviardžajuć, što kamandavańnie «Vahniera» pahražaje najmitam «abnuleńniem», heta značyć, zabojstvam, za razmovy z žurnalistami i raskryćcio jakoj-niebudź infarmacyi ab tym, što adbyvałasia ŭ zonie bajavych dziejańniaŭ.
Adkazvajučy na navadnyja pytańni žurnalista, abodva taksama zajavili, što ŭpeŭnienyja ŭ tym, što zasnavalnik PVK Jaŭhien Pryhožyn vykonvaje rasparadžeńni Uładzimira Pucina, i rasśledavać złačynstvy, učynienyja ŭ zonie bajavych dziejańniaŭ, u Rasii nie buduć.
Całkam videaśviedčańni Azamata Ułdarova i Alaksieja Savičava možna pahladzieć tut. Praŭda, paćviardžeńnia ich słovam ź inšych krynic pakul što niama.
Ofis hienprakurora Ukrainy raspačaŭ pravierku infarmacyi, raspaŭsiudžanaj u videa. Publikacyju taksama prakamientavaŭ kiraŭnik ofisa prezidenta Ukrainy Andrej Jarmak. «Adnaho pryznańnia mała. Pavinna być pakarańnie. Žorstkaje i spraviadlivaje. I jano abaviazkova budzie», — zajaviŭ jon.
Pryhožyn zaklikaŭ abo abviaścić pra zakančeńnie «SVA», abo raspačać baraćbu z unutranymi vorahami
Turcyja dapamahała Biełarusi i Rasii abychodzić mižnarodnyja sankcyi i abmiarkoŭvała handal zbrojaj z PVK «Vahnier» — BRC
U Rasii znajšli ŭžo siem mohiłak, na jakich masava chavajuć zahinułych vahnieraŭcaŭ
Ciapier čytajuć
Bijołah Siarhiej Šeleh, jakoha asudzili na 8,5 hoda za danaty, paśla raptoŭnaha vyzvaleńnia maryć i dalej dapamahać biełarusam. Jaho fiłasofija natchniaje4
Kamientary