Kitaj stvaraje zbroju, skiravanuju na pierachop kantrolu nad spadarožnikami — FT
Zhodna z sakretnymi dakumientami CRU, što vyciekli ŭ internet, novaja kitajskaja zbroja budzie značna pieraŭzychodzić lubyja rasijskija mahčymaści ŭ dadzienym kirunku.
Kitaj znachodzicca ŭ pracesie stvareńnia novaj składanaj kibierzbroi, jakaja zmoža pierachaplać kantrol nad lubymi spadarožnikami hramadzianskaha i vajskovaha pryznačeńnia. Pra heta 21 krasavika paviedamiła vydańnie Financial Times sa spasyłkaj na adzin sa źlitych amierykanskich sakretnych dakumientaŭ.
Dakumient, padrychtavany Centralnym raźviedvalnym upraŭleńniem ZŠA (CRU) u hetym hodzie, śviedčyć ab namierach Kitaja «adklučać, časova vykarystoŭvać abo zachoplivać» varožyja spadarožniki dla ŭłasnaha daminavańnia na budučym poli boju.
Adznačajecca, što mahčymaści novaj kitajskaj zbroi buduć značna pieraŭzychodzić lubyja rasijskija anałahi, jakija, naprykład, niadaŭna sprabavali abrynuć sistemu Starlink Iłana Maska ŭ kaśmičnaj prastory nad Ukrainaj.
«Kitajskaja zbroja nakiravana na imitacyju sihnałaŭ, jakija varožyja spadarožniki atrymlivajuć ad svaich apierataraŭ, padmanam prymušajučy ich albo całkam pierajści pad svoj kantrol, albo vyvieści ich z ładu ŭ vyrašalnyja momanty boju. Havorka idzie ab parušeńni mahčymaści zachodnich spadarožnikaŭ (jakija časta latajuć i pracujuć cełaj hrupaj) źviazvacca adzin z adnym i pieradavać sihnały na Ziamlu», — piša Financial Times sa spasyłkaj na źlity dakumient CRU.
Vydańnie taksama źviartaje ŭvahu, što nazva i terminy vytvorčaści dadzienaj zbroi ŭ dakumiencie nie paznačany.
Nahadajem, što heta nie adziny źlity dakumient ZŠA, u jakim havorka idzie pra Kitaj. Naprykład, niadaŭna takim čynam stała viadoma ab niepubličnych vajennych znosinach pamiž kitajskimi čynoŭnikami i pradstaŭnikami rasijskaj PVK «Vahnier».
Taksama vyśvietliłasia, što Kitaj u vypadku napadu na Tajvań na praciahu niekalkich dzion zmoža całkam zabiaśpiečyć sabie panavańnie ŭ niebie nad vostravam.
Ciapier čytajuć
Ukraina ŭpieršyniu adkazała na rasijskija ataki na składy «Novaj pošty» simietryčnymi ŭdarami pa chabach «Vajłdbieryz». Padmaskoŭny zhareŭ daščentu1010
Kamientary