Złučanyja Štaty daduć Polščy vosiem viertalotaŭ Apache, pakul Polšča nie atrymaje ŭłasnyja mašyny, zajaviŭ polski ministr nacyjanalnaj abarony Maryjuš Błaščak u piatnicu paśla sustrečy ź ministram abarony ZŠA Łojdam Ościnam u Pientahonie.
«Armija ZŠA daść nam viertaloty Apache sa svaich ułasnych resursaŭ, jašče da padpisańnia kantrakta na nabyćcio 96 viertalotaŭ. Heta vielmi važny patencyjał, tamu ja ŭdziačny dziaržsakrataru Ościnu za hetaje rašeńnie», — skazaŭ Błaščak padčas pres-bryfinhu la pomnika vajaram marskoj piachoty ZŠA ŭ Arlinhtanie, štat Vašynhton.
Jak jon rastłumačyŭ, suchaputnyja siły ZŠA pieradaduć Polščy vosiem mašyn, praź niekalki tydniaŭ pačniecca navučańnie polskich piłotaŭ, i, vierahodna, u nastupnym hodzie viertaloty adpraviacca na ŭschod Polščy dla ŭmacavańnia, jak kažuć palaki, «Bresckaj bramy», to-bok miažy ź Biełaruśsiu.
«Čamu Apache važnyja? Tamu što jany vydatna pracujuć z «Abramsami», tamu što jany pojduć na ŭschodni fłanh NATA, u 18-ju miechanizavanuju dyviziju, u 1-ju bryhadu VPS, kab razam z «Abramsami» zakryć «Bresckuju bramu», zrabić ź jaje nieprachodnuju płacinu», — skazaŭ kiraŭnik Minabarony.
U minułym hodzie Polšča vykazała žadańnie atrymać 96 viertalotaŭ AH-64 Apache, ale data mahčymych pastavak pakul nieviadomaja. Nabyćcio mašyn Polščaj pavinny jašče zaćvierdzić Kanhres i Dziarždepartamient.
Ciapier čytajuć
«Adny vierać, što viernucca, inšyja — nie». Jak pracuje biełaruskaja škoła ŭ Polščy1
Kamientary