U Turcyi z 1 listapada abmiažujuć vykarystańnie sacyjalnych sietak dziećmi. Adpaviedny narmatyŭny akt Upraŭleńnia kibierbiaśpieki pry administracyi prezidenta Turcyi apublikavali 10 kastryčnika ŭ dziaržaŭnym vieśniku Resmi Gazete.
Zhodna z dakumientam, sacyjalnyja sietki nie zmohuć vykonvać svaje pasłuhi dzieciam maładziejšym za 15 hadoŭ. Dla karystalnikaŭ va ŭzroście ad 15 da 18 hadoŭ płatformy pavinny stvaryć asobny režym z uzmocnienymi mierami biaśpieki i abarony pryvatnaści. Pravierku ŭzrostu va ŭžo stvoranych i aktyŭnych akaŭntach nieabchodna budzie zakončyć da 31 sakavika 2027 hoda.
Uzrost karystalnikaŭ buduć paćviardžać praz ahulnanacyjanalnuju sistemu dziaržaŭnych pasłuh e-Devlet z dapamohaj śpiecyjalnaha identyfikatara.
Akaŭnty padletkaŭ ad 15 da 18 hadoŭ apryjory buduć zakrytymi. Im zabaroniać vieści žyvyja tranślacyi, atrymlivać piersanalizavanuju rekłamu i karystacca asobnymi miechanizmami rekamiendacyi kantentu.
Sacyjalnyja sietki taksama nie zmohuć rekamiendavać niepaŭnaletnim inšyja akaŭnty na padstavie sabranych pra ich danych. Profili samich padletkaŭ nielha budzie prapanoŭvać inšym karystalnikam.
Akramia taho, uzmocniać abaronu asabistych danych niepaŭnaletnich. Płatformam zabaroniać sinchranizavać dziciačyja akaŭnty z telefonnymi knihami, śpisami kantaktaŭ, adrasnymi knihami elektronnaj pošty, a taksama pieralikami siabroŭ i padpisak u inšych prahramach i na inšych płatformach. Im taksama nielha budzie atrymlivać dostup da hetych krynic i apracoŭvać atrymanyja adtul danyja.
Narmatyŭny akt abaviazvaje sacyjalnyja sietki raspracavać i dać baćkam i apiekunam instrumienty kantrolu za akaŭntami dziaciej, ich naładami, časam vykarystańnia płatformaŭ, hieałakacyjaj, płatnymi apieracyjami i inšymi funkcyjami.
Uviadzieńnie padobnych abmiežavańniaŭ na sacsietki dla dziaciej ciapier abmiarkoŭvajecca i ŭ krainach Jeŭrasajuza, a Vialikabrytanija heta ŭžo zrabiła raniej.
Ciapier čytajuć
Mama Baženy Jaremič, jakaja rychtuje pryhažuń dla Łukašenki, kupiła elitny katedž koštam $837 tysiač28
Kamientary