Ministerstva sielskaj i lasnoj haspadarki Finlandyi rychtuje ŭkaz ab rejestry katoŭ, jaki musić ustupić u siłu ŭ pačatku 2026 hoda. Zadumany rejestr maje stać anałahičnym uviedzienamu niadaŭna rejestru sabak: žyvioły čypirujucca, i infarmacyja pra ich zanosicca ŭ śpiecyjalny katałoh.
Ideja skiravanaja na sadziejničańnie bolš adkaznamu ŭtrymańniu katoŭ, spraščeńnie ich identyfikacyi i praduchileńnie pašyreńnia papulacyi paŭdzikich žyvioł, piša Yle.fi.
Pa słovach ekśpierta finskaha Minsielhasa Ansi Vielinha, katoŭ kidajuć čaściej, čym sabak.
Zhodna z danymi Asacyjacyi abarony žyvioł SEY, u Finlandyi ciapier naličvajecca kala 20 000 biazdomnych katoŭ. I kali pałova ź ich traplaje ŭ prytułki, to kala 10 000 — heta paŭdzikija žyvioły, jakija žyvuć zhrajami.
Kali takija žyvioły nie kastryravany i nie sterylizavany, to ŭ vyniku ich razmnažeńnia źjaŭlajucca katy, za jakich uvohule nichto nie adkazvaje.
Ciapier nichto nie viedaje, kolki nasamreč katoŭ u Finlandyi. Pavodle aficyjnaj statystyki, ich krychu mienš za 600 000, ale realna moža być i bolš za miljon. Dziela taho i patrebny zadumany rejestr.
Nahlad nad vykanańniem novaha ŭkaza budzie rabić Finlandskaje ahienctva charčavańnia (Ruokavirasto). Kali kot nie budzie zarehistravany paśla źmieny zakona, to da ŭładalnika mohuć być užytyja sankcyi, naprykład, štrafy.
Kamientary