Prezidentam Łatvii abrali Edhara Rynkieviča. Jon nie raz sustrakaŭsia ź Cichanoŭskaj
31 maja deputaty Siejma Łatvii abrali prezidentam Łatvii šmathadovaha ministra zamiežnych spraŭ Edhara Rynkieviča.
Jaho vyłučyła premjerskaja partyja «Novaje adzinstva».
«Za» prahałasavali 52 deputaty, suprać — 35. Rynkievič byŭ abrany ŭ tym liku dziakujučy hałasam apazicyi — pradstaŭnikam Sajuza zialonych i sialan i «prahresiŭnych». Za Pilensa prahałasavali 25 deputataŭ, suprać — 62, piša Delfi.
Prezidenta ŭ Łatvii na čatyry hady vybiraje parłamient.
Aproč Rynkieviča, byli taksama vyłučanyja kandydatury Ułdzisa Pilensa i Eliny Pinta. Kab vyjhrać vybary, treba było nabrać 51 hołas. Paśla druhoha tura vybyła Elina Pinta, i ŭ trecim tury zastalisia Pilens i Rynkievič.
Padtrymać Rynkieviča pryjšoŭ u parłamient premjer krainy Kryšjanis Karyńš.
U svajoj pramovie ŭ Siejmie Rynkievič skazaŭ, što siońnia tym maleńkim chłopčykam i dziaŭčynkam, jakija tolki marać zavajavać miedali na čempijanacie śvietu abo stać prezidentam, zdajecca, što heta, napeŭna, małaažyćciaŭlalna. Ale nasamreč — usio mahčyma.
Premjer-ministr Kryšjanis Karyńš zajaviŭ, što Łatvija atrymała vydatnaha, mocnaha i dziaržaŭna nastrojenaha prezidenta.
«Vinšuju z abrańniem na pasadu prezidenta! Dziakuj za ŭkład u zamiežnuju palityku i biaśpieku dziaržavy! Praciahniem pracavać, kab Łatvija stała macniejšaj!», — adznačyŭ palityk.
Latvija šodien ir ieguvusi izcilu, spēcīgu un valstiski domājošu valsts vadītāju! Apsveicu @edgarsrinkevics ar ievēlēšanu Valsts prezidenta amatā! Paldies par līdzšinējo devumu valsts ārpolitikā un drošībā! Turpināsim darbu stiprākai Latvijai! pic.twitter.com/J4ORyg3Ag2
***
Edhar Rynkievič naradziŭsia ŭ Jurmale ŭ 1973 hodzie. U 1995 hodzie abaraniŭ stupień bakałaŭra na historyka-fiłasofskim fakultecie Łatvijskaha ŭniviersiteta. U tym ža hodzie atrymaŭ siertyfikat u halinie palitałohii i mižnarodnych adnosin Univiersiteta Hroninhiena (Niderłandy). U 2000 hodzie abaraniŭ stupień mahistra va Univiersitecie nacyjanalnaj abarony ZŠA. Akramia rodnaj łatyšskaj, vydatna vałodaje anhlijskaj i ruskaj movami, dobra — francuzskaj.
Pačynaŭ karjeru žurnalistam Łatvijskaha radyjo, užo tady, u 1993-1994 hady, śpiecyjalizavaŭsia na temie zamiežnaj palityki i mižnarodnych adnosin.
Z 1995 hoda pačałasia karjera Rynkieviča ŭ Ministerstvie abarony: jon byŭ dyrektaram Departamienta abaronnaj palityki. Z 1997 pa 2008 hod — dziaržsakratar Ministerstva abarony. Hetaja pasada faktyčna pryraŭnoŭvajecca da namieśnika ministra. Ministr u Łatvii — zvyčajna palityčny staŭlenik, dziaržsakratar — prafiesijanał.
Z 2008 pa 2011 hod — kiraŭnik kancylaryi prezidenta Vałdzisa Zatlersa. Z 2011 hoda — ministr zamiežnych spraŭ va ŭradzie Vałdzisa Dambroŭskisa.
Z tych časoŭ — niaźmienny kiraŭnik MZS u roznych uradach.
6 listapada 2014 hoda Edhar Rynkievič ździejśniŭ kaminh-aŭt i staŭ pieršym palitykam u historyi Łatvii, jaki adkryta pryznaŭ svaju homaseksualnuju aryjentacyju. Pryznańnie Rynkieviča było zbolšaha pazityŭna ŭspryniata łatvijskimi palitykami i žurnalistami.
Pa vynikach apošnich vybaraŭ u Siejm Rynkievič staŭ adnym z samych papularnych palitykaŭ krainy, atrymaŭšy 35 072 plusy vybarščykaŭ. U premjer-ministra Kryšjanisa Karyńša — 35 013 plusaŭ.
24 maja 2021 hoda padčas čempijanatu śvietu pa chakiei ŭ Ryzie razam z meram łatvijskaj stalicy Marcińšam Stakisam źniaŭ čyrvona-zialony dziaržaŭny biełaruski ściah i zamianiŭ jaho na bieł-čyrvona-bieły ściah. Biełaruskija prapahandysty tady mocna raźjušylisia.
Sveicu @edgarsrinkevics ar ievēlēšanu Valsts prezidenta amatā! Kopā par drošu, demokrātisku un modernu valsti! pic.twitter.com/1a1bH3pK2g
Marcińš Stakis apublikavaŭ siońnia tvit dvuchhadovaj daŭniny. Na fota Rynkievič źleva, Stakis — sprava
Rynkievič nieadnarazova sustrakaŭsia sa Śviatłanaj Cichanoŭskaj i pradstaŭnikami biełaruskich demakratyčnych sił.
Fota z fejsbuka Franaka Viačorki
Kamientary