Starbucks zapłacić zvolnienaj biełaj supracoŭnicy 25,6 miljona dalaraŭ pa spravie ab rasavaj dyskryminacyi
Šenan Filips, byłaja rehijanalnaja mieniedžarka kampanii Starbucks, była zvolnienaja paśla taho, jak u 2018 hodzie ŭ adnym ź jaje filijałaŭ u Fiładelfii aryštavali dvuch ciemnaskurych čałaviek, što pryviało da masavych pratestaŭ. Pry hetym jaje čarnaskury kaleha zachavaŭ pracu.
Sud prysiažnych pryjšoŭ da vysnovy, što faktaram u jaje zvalnieńni stała jaje rasavaja prynaležnaść, i heta parušyła antydyskryminacyjnyja zakony, jak piša Bi-bi-si.
Fiederalnaje žury suda ŭ Ńju-Džersi vyznačyła, što Starbucks parušyła fiederalnyja hramadzianskija pravy Šenan Filips, a taksama zakon štata Ńju-Džersi, jaki zabaraniaje dyskryminacyju pa prykmiecie rasy, prysudziŭšy joj 600 000 dalaraŭ u jakaści kampiensacyi za škodu i 25 miljonaŭ dalaraŭ u jakaści štrafnych sankcyj.
Incydent u kaviarni
Incydent adbyŭsia ŭ filijale Starbucks u Fiładelfii ŭ 2018 hodzie, kali adnamu z dvuch ciemnaskurych mužčyn, jakija znachodzilisia ŭ kaviarni, nie dazvolili skarystacca prybiralniaj, bo jon ničoha nie kupiŭ.
Mužčyny zajavili, što pryjšli na dziełavuju sustreču i kahości čakajuć. Kali jany admovilisia pakinuć ustanovu, supracoŭniki, jak paviedamlajecca, vyklikali palicyju, jakaja nadzieła na ich kajdanki i vyvieła z kaviarni.
Ich aryšt źniali na videa, a paźniej apublikavali ŭ sacyjalnych sietkach, što pryviało da pratestaŭ. Starbucks zakryła ŭsie svaje 8000 kaviarniaŭ u ZŠA na adzin dzień, kab pravieści treninh dla supracoŭnikaŭ, pryśviečany tamu, jak zmahacca z praduziataściu, u tym liku rasavaj.
Rehijanalnuju mieniedžarku kampanii Šenan Filips zvolnili, a ciemnaskury mieniedžar adździaleńnia, dzie adbyŭsia incydent, zachavaŭ svaju pracu.
U 2019 hodzie Filips padała ŭ sud na Starbucks, abvinavaciŭšy kampaniju ŭ niezakonnym zvalnieńni i niespraviadlivym pakarańni biełych supracoŭnikaŭ.
Jaje advakaty śćviardžali, što kiraŭnictva Starbucks šukała kazła adpuščeńnia, jakoha možna było b zvolnić, kab pakazać, što nieabchodnyja zachady zroblenyja.
Ciapier čytajuć
Andreja Pavuka, jaki trapiŭ u Litvie ŭ moŭny skandał, zvolnili21
Kamientary