Niekatoryja kišačnyja mikroby mohuć papiaredžvać pra chvarobu Alchiejmiera zadoŭha da źjaŭleńnia pieršych simptomaŭ
Niadaŭnija daśledavańni pakazali, što peŭnyja mikroby čaściej sustrakajucca ŭ ludziej ź vielmi rańnimi prykmietami zachvorvańnia, što adkryvaje šlach da mahčymaha novaha mietadu dyjahnostyki chvaroby, na jakuju pakutujuć miljony ludziej pa ŭsioj płaniecie.
Mikrabijom kišačnika — heta sukupnaść mikrobaŭ, siarod jakich bakteryi, virusy i hrybki ŭ kišačniku. Najaŭnaść roznych papulacyj mikrobaŭ ličycca važnaj dla našaha zdaroŭja ŭ cełym. Adnak pry peŭnych abstavinach u kišačnym mikrabijomie mohuć taksama ŭtrymlivacca mikroby, što škodziać našamu zdaroŭju.
Pry chvarobie Alchiejmiera ŭ hałaŭnym mozhu anamalna nazapašvajucca dva białki: beta-amiłoid i tau-białok. Heta pryvodzić da charakternaj straty pamiaci i paharšeńnia kahnityŭnych zdolnaściaŭ, źviazanych z chvarobaj, pryčym z časam simptomy robiacca ŭsio macniejšymi.
Viadoma, što beta-amiłoid i tau-białok pačynajuć nazapašvacca zadoŭha da źjaŭleńnia simptomaŭ chvaroby Alchiejmiera. Jakraz na hetaj stadyi, viadomaj jak «dakliničnaja stadyja», daśledčyki ŭbačyli źmieny ŭ mikrabijomie kišačnika: tak, u paddoślednych, jakija majuć prykmiety dakliničnaj chvaroby Alchiejmiera, adroźnieńni ŭ kišačnym mikrabijomie byli źviazanyja akurat z nazapašvańniem abodvuch vyšej zhadanych białkoŭ u hałaŭnym mozhu.
Daśledčyki vyjavili, što ŭklučeńnie danych pra kišačny mikrabijom palepšyła zdolnaść dakładna dyjahnastavać dakliničnuju chvarobu Alchiejmiera z dapamohaj ałharytmu mašynnaha navučańnia.
Ideja analizu kišačnaha mikrabijomu (pa sutnaści prosty analiz kału pacyjenta) pryvabnaja dla daśledčykaŭ, bo heta mahło b stać nieinvaziŭnym i bolš dastupnym sposabam vyjaŭleńnia ryzyki raźvićcia zachvorvańnia na raniejšaj stadyi, dajučy čałavieku bolš času dla płanavańnia i padrychtoŭki ŭ budučyni. Da taho ž niekatoryja ź isnych dyjahnastyčnych testaŭ mohuć być niepryjemnymi, jak, naprykład, lumbalnaja punkcyja, abo abapiracca na darahija technałohii vizualizacyi (MRT), dostup da jakich, jak viadoma, nie zaŭsiody prosta atrymać.
The Conversation adznačaje, adnak, što palapšeńnie ŭ pravilnym pradkazańni zachvorvańnia, vyjaŭlenaje daśledavańniem, było ŭsio ž davoli ścipłym. I chacia analiz danych kišačnych mikrabijomaŭ moža dapoŭnić sučasnyja mietady dyjahnostyki dakliničnaj chvaroby Alchiejmiera, jon pakul nie moža zamianić ich całkam.
Niečakanaja znachodka
Niečakana niekatoryja ź mikraarhanizmaŭ, jakija raniej ličylisia karysnymi dla zdaroŭja čałavieka, vyjavilisia źviazanymi z prykmietami dakliničnaj chvaroby Alchiejmiera. Naprykład, bakteryja Faecalibacterium prausnitzii (F. prausnitzii), jak było vyjaŭlena ŭ papiarednim daśledavańni, čaściej sustrakajecca ŭ kišačnym mikrabijomie ludziej biez chvaroby Alchiejmiera, čym u chvorych.
Navukoŭcy pakul nie mohuć zrazumieć pryčynu hetaha. Adnym z tłumačeńniaŭ moža być rańniaja stadyja zachvorvańnia: važna pryznać, što nie va ŭsich, chto maje prykmiety dakliničnaj chvaroby Alchiejmiera, razaŭjecca sama chvaroba. A na poźnich stadyjach mohuć adbycca źmieny mikrabijoma kišačnika, naprykład strata toj ža F. prausnitzii.
Pakul aŭtary daśledavańnia nie majuć nijakich dokazaŭ niepasrednaj pryčynna-vynikovaj suviazi kišačnaha mikrabijomu z raźvićciom chvaroby. Ale kali suviaź budzie vyznačanaja ŭ dalejšych daśledavańniach, heta moža adkryć zachaplalnuju mahčymaść taho, što budučyja mietady lačeńnia hetaj žachlivaj chvaroby mohuć być nakiravanyja na mikroby ŭ našym kišačniku.
Ci patrebnaja biełaruskaja mova tym, chto razmaŭlaje pa-rusku? Azaronak zadaŭsia takim pytańniem na STB, a vypusknik Akademii MUS prapanavaŭ zamianić uroki fakultatyvami4444
Kamientary