U Biełaviežskaj puščy šukali biełuju pichtu, a znajšli dreva jašče bolš redkaje
Vyvučajučy historyju farmiravańnia lasnych ekasistem Biełaviežskaj puščy, śpiecyjalisty navukovaha adździeła Nacyjanalnaha parku «Biełaviežskaja pušča» znajšli archiŭny zapis ab najaŭnaści ŭ Broŭskim laśnictvie ŭčastka z kulturami biełaj pichty (Abies alba) i pajšli šukać jaho na miascovaści. Ale sapraŭdnaja znachodka była jašče bolš dziŭnaja, paviedamlajecca na sajcie ŭstanovy.
Materyjały paślavajennaha lesaŭparadkavańnia 1951 hoda śviedčyli pra najaŭnaść učastka biełaj pichty pamieram 0,2 ha z 10-hadovymi drevami vyšynioj na momant abśledavańnia 2-3 m.
Dahetul było viadoma, što ŭ mižvajenny čas polskija leśniki zajmalisia stvareńniem u Biełaviežskaj puščy ekśpierymientalnych kultur z vykarystańniem ekzatyčnych draŭnianych parod. Z taho času ŭ spadčynu zastalisia chvoi viejmutavy (Pinus strobus) i pichtavaja pasadka ŭ adnym ź laśnictvaŭ. A padčas praviadzieńnia palavych daśledavańniaŭ było vyrašana naviedać i toj učastak lesu, pra jaki išła havorka ŭ dakumiencie. Jon raźmieščany za rakoj Naraŭ, nasuprać siadziby Broŭskaha laśnictva.
Akazałasia, što taksatary lesaŭparadkavalnaha tresta z dalokaj Vołahdy, jakija paśla vajny pravodzili toje abśledavańnie, pamylilisia, bo pry abśledavańni zahadkavaha ŭčastka nijakich śladoŭ rostu na im pichty znojdziena nie było. Heta zvyčajny źmiešany les z chvoi, asiny, biarozy, jełki i alešyny, jaki ŭtvaryŭsia na miescy sucelnaj vysiečki kala 80—90 hadoŭ tamu.
U toj ža čas u niekatorych jełak była dziŭnaja struktura kary. Jana była nie takaja ćviordaja i niby pakrytaja korkavym płastom. A pakolki adno z dreŭ było niadaŭna pavalena vietram, to možna było biez prablem razhledzieć ihlicu. Joj dreva taksama adroźnivałasia ad pichty i jełki — ihlica była miakkaja i niekalučaja.
Tady i stała zrazumieła, što tut kaliści byli pasadžany drevy inšaha paŭnočnaamierykanskaha ekzota — psieŭdatsuhi (Pseudotsuga menziesii), ci, jak jaje nazyvajuć na radzimie, Duhłasavaj pichty.
Psieŭdatsuha raście ŭ vilhotnych lasach Kalifornii, heta adno z samych vysokich dreŭ u śviecie — dasiahaje stamietrovaj vyšyni. U pryrodzie jano žyvie da 1000 hadoŭ.
Praŭda, u Biełaviežskaj puščy drevy psieŭdatsuhi, uzrost jakich składaje amal 90 hadoŭ, vyhladajuć zusim drenna, značna sastupajučy ŭ pamierach miascovym vidam. Chutčej za ŭsio, abaryhiennyja vidy akazalisia bolš ustojlivymi va ŭmovach Biełaviežskaj puščy. Jany paprostu abahnali psieŭdatsuhu ŭ chutkaści rostu, što pryviało da jaje zacianieńnia i dalejšaj pryhniečanaści.
Vidavočna, što ŭ hetym miescy psieŭdatsuha prajhrała kankurencyju miascovym parodam dreŭ, tamu ŭ dalejšym jana pastupova vypadzie sa składu drevastoju.
Ciapier čytajuć
Vaziŭ nataŭcaŭ u Afhanistan i skidvaŭ humanitarku ŭ Sudanie, a potym trapiŭ u turmu pa danosie siabra z Ukrainy2
Kamientary