U Litvie pražyvaje ŭžo da 60 tysiač biełarusaŭ. Ale va ŭładaŭ krainy jość zaściaroha
Vialikaja kolkaść biełarusaŭ pryjechała ŭ Litvu paśla pačatku represij uvosień 2020 hoda, a taksama paśla poŭnamaštabnaha ŭvarvańnia Rasii va Ukrainu.
Razam z tym niezrazumieła, kolki dakładna biełarusaŭ i rasijan pryjechała ŭ Litvu paśla ŭvarvańnia Rasii va Ukrainu. «Heta 55 000 biełarusaŭ i mienš za 20 000 rasijan», — skazaŭ staršynia parłamienckaha Kamiteta nacyjanalnaj biaśpieki i abarony Łaŭrynas Kaščunas.
Departamient mihracyi śćviardžaje, što vydaŭ dazvoł prykładna anałahičnaj kolkaści biełarusaŭ, ale rasijan pakazvaje ŭdvaja mienš, piša Delfi.lt.
Hramadzianam Rasii vydadziena da 8000 dazvołaŭ na žycharstva ŭ Litvie i viz z pačatku vajny da siońniašniaha dnia.
U vypadku z hramadzianami Biełarusi — ich kala 60 000», — skazała kiraŭnik Departamienta mihracyi Evielina Hudzinskajcie.
Pa danych departamienta, nieabaviazkova ŭsie biełarusy zastalisia ŭ krainie, jany mahli źjechać u inšyja krainy ES.
«Dakładnuju kolkaść my nie možam nazvać, bo hetyja ludzi pryjazdžajuć i źjazdžajuć. Toje, što jany pryjechali, nie značyć, što jany znachodziacca ŭ Litvie i ciapier», — zaŭvažyła Hudzinskajcie. Usie, chto atrymaŭ dazvoł na žycharstva ŭ Litvie, abaviazanyja dekłaravać miesca žycharstva. Pavodle źviestak Centra rejestra, letaś pa stanie na 24 lutaha dazvoł na žycharstva ŭ Litvie mieli 17 200 rasijan i 32 700 biełarusaŭ. Ciapier hetyja ličby takija: 20 300 rasijan i 55 300 biełarusaŭ.
Adnak siarod ludziej, jakija pryjazdžajuć dziela biaśpieki ŭ Litvu, jość i tyja, chto ŭjaŭlaje pahrozu krainie. Za paŭhoda praz pahrozu nacyjanalnaj biaśpiecy ŭ Litvu nie ŭpuścili 1000 rasijan i biełarusaŭ.
«Biełarusam nie dazvolili ŭjezd 800 razoŭ, a rasijanam — 150, heta sa śniežnia minułaha hoda da siońniašniaha dnia», — skazała Hudzinskajcie.
Samy vialiki patok rasijan i biełarusaŭ jechaŭ u Litvu, kali nie było strohich pravierak, da śniežnia 2022 hoda.
Taksama litoŭskaja raźviedka paviedamlaje, što nazirajecca pošuk srodkaŭ dla taho, kab unieści razład pamiž uciekačami z Rasii i Biełarusi i litoŭcami.
Jość ludzi, jakija kažuć, što pahrozu moža ŭjaŭlać i staŭleńnie rasijan, biełarusaŭ da Litvy abo da historyi Litvy.
«Jość takaja daktryna lićvinizmu, zhodna ź jakoj VKŁ — dziaržava biełarusaŭ, a nie litoŭcaŭ. I tut źjaŭlajucca niuansy, staŭleńnie da niezaležnaści Litvy, jaje roli, da Vilni», — skazaŭ Kaščunas.
Kamientary