Pres-sakratarka Biełaha doma pryznałasia, što nie zdała ekzamien na atrymańnie licenzii advakata
Keci Zakaryja, jakaja prystupiła da pracy ŭ Biełym domie ŭ paniadziełak, raniej zajaŭlała, što zajmałasia jurydyčnaj praktykaj da prychodu ŭ palityku. Tramp taksama pradstaŭlaŭ jaje jak advakatku.
Novaja pres-sakratarka Biełaha doma Keci Zakaryja pryznała, što nie zdała ekzamien na atrymańnie licenzii advakata. Jaje jurydyčnaja karjera da pryznačeńnia na pasadu hałoŭnaj pradstaŭnicy prezidenta ZŠA Donalda Trampa stała pradmietam pilnaj uvahi hramadskaści, piša Bi-bi-si.
Zakaryja, jakaja prystupiła da pracy ŭ Biełym domie ŭ paniadziełak, raniej zajaŭlała, što zajmałasia jurydyčnaj praktykaj da prychodu ŭ palityku. Tramp taksama pradstaŭlaŭ jaje jak advakatku.
U ZŠA vypuskniki jurydyčnych fakultetaŭ nie majuć prava zajmacca advakackaj dziejnaściu, pakul nie atrymajuć dopusk da praktyki ŭ adpaviednym štacie.
Padčas svajho pieršaha bryfinhu 13 kastryčnika ŭ adkaz na pytańnie žurnalista pra toje, u jakim štacie jana zdała ekzamien, nieabchodny dla atrymańnia statusu advakata ŭ ZŠA, Zakaryja ŭ prysutnaści Trampa skazała: «Kali ja pierajechała ŭ Kitaj».
U paźniejšaj zajavie dla presy Zakaryja paviedamiła, što «zajmałasia mižnarodnym tranzakcyjnym pravam, majučy ŭsie nieabchodnyja kvalifikacyi».
U Biełym domie nie ŭdakładnili, ci zdavała jana ekzamien na atrymańnie licenzii advakata ŭ jakim-niebudź sa štataŭ ZŠA abo inšych jurysdykcyjach.
U čaćvier Zakaryja ŭ intervju Fox News pryznała, što nie zdała ekzamien.
«Vy nie zdali ekzamien na atrymańnie licenzii advakata, tak?» — spytali jaje ŭ intervju, jakoje vyjšła pozna ŭviečary ŭ čaćvier u prahramie Hannity na telekanale Fox News..
«Tak», — adkazała Zakaryja viadučamu Šonu Chenici.
Kali Chenici ŭdakładniŭ, ci sprabavała jana zdać ekzamien paŭtorna, jana adkazała: «Nie, nie sprabavała».
U 2011 hodzie Zakaryja atrymała jurydyčnuju adukacyju va Univiersitecie Piepierdajn.
Paśla zakančeńnia vučoby jana pierajechała ŭ Kitaj, dzie pracavała jurystam u kitajskaj jurydyčnaj firmie.
Pavodle jaje słoŭ, joj dazvolili nazyvać siabie jurystam, ale paraili nie vykarystoŭvać słova «advakat».
Svoj pieršy bryfinh Zakaryja praviała 13 kastryčnika. Pavodle acenak mnohich žurnalistaŭ, jon akazaŭsia niaŭdałym. Vystup doŭžyŭsia kala 15 chvilin i składaŭsia pieravažna ź pieraličeńniaŭ dasiahnieńniaŭ Trampa.
Padčas ustupnaha słova jana amal nie adryvała vačej ad zahadzia padrychtavanaha tekstu na papiery i ŭ cełym hučała niepierakanaŭča.
Paśla hetaha jana dała mahčymaść zadać pytańni tolki trom žurnalistam, a zatym syšła. Tramp paśla vystupu skazaŭ, što, na jaho dumku, «jana vystupiła vielmi dobra».
U intervju Fox News Zakaryja zajaviła, što ŭ jaje było vielmi mała času na padrychtoŭku, ale jana ličyć, što spraviłasia z zadačaj.
Kamientary