Saładucha raspavioŭ, čamu pahadziŭsia «krucić huś» u chajpovaj rekłamie kazino
Śpiavak pierakonvaje: jon nie razumieŭ, što budzie rekłamavać bukmiekierskuju kantoru. Kaža, dumaŭ «Maksłajn» — niešta pra futbolny kłub. Ale ličyć, što heta tryumf rekłamy, kali navat Łukašenka aburyŭsia.
Pra toje, jak jon pahadziŭsia «krucić huś», Alaksandr Saładucha raspavioŭ u padkaście «Chata Chaŭs»:
«Zaprasiła mianie kampanija «Maksłajn» źniacca ŭ rekłamnym roliku. Pryčym ja navat nie viedaŭ, što ŭ ich, akazvajecca, jość kazino. Ja dumaŭ: voś zvyčajnaja niejkaja kampanija. Viedaŭ, što jość futbolny kłub, jaki letaś uziaŭ pieršaje miesca, vyjšaŭ ź pieršaj lihi adrazu ŭ vyšejšuju. Ja dumaŭ, što my budziem ich rekłamavać».
Adzinaje, što ździviła artysta, jaki aktyŭna zdymajecca ŭ rekłamie, heta toje, što rolik rabili daŭžej, čym zvyčajna. Tydzień, druhi, treci… Potym daviedaŭsia, što hety čas stvarali videa z dapamohaj štučnaha intelektu.
Ale, kali Saładucha narešcie pabačyŭ vynik, kaža, schapiŭsia za hałavu. Viersij rekłamy było niekalki — karotkaja i doŭhaja.
«Ale mabyć, heta, tryumf, rekłamy. Tak, što kali ŭžo kiraŭnik dziaržavy, naš prezident Alaksandr Ryhoravič na adnoj z narad u prysutnaści ŭsiaho kiraŭnictva krainy kaža: «Što vy tam huś krucicie, z ranicy da nočy?» Nu i pa inšych prajšoŭsia, «Fanbet» i hetak dalej… Niejak tak… Voś sapraŭdy ja čysta, atrymlivajecca, jak aktor, jak artyst, jakoha zaprasili… U mianie ŭsio hruntoŭna, u sensie, pa damovie, prapłacili mnie bieznajaŭnymi hanarar u ramkach damoŭlenaści z «Maksłajnam». Dy ja dumać nie dumaŭ… Ale adbyłosia… Chacia mnie ŭžo kazali i syny, i blizkaje asiarodździe, kiroŭcy maje: «Och, budzie horača!». Ja kažu: «Narmalna».
Pra toje, što nasamreč rekłamavaŭ kazino, Saładucha daviedaŭsia sa ŚMI. Jak jon kaža, ad «chłopcaŭ i dziaŭčat z taho bieraha, jakija čaho tolki nie pišuć».
«I ludzi tam nibyta hulajuć i prajhrajuć vialikija hrošy i kvatery. Ale ž prava kožnaha čałavieka hulać, nie hulać. Łahična ž, tak? Ja nie hulaju, maje syny taksama nie hulajuć».
Artyst pryznaje, što šumu atrymałasia zašmat. Ale kaža, što paśla chajpovaj rekłamy zamoŭ na vystupleńni ŭ jaho stała bolš. Chacia śćviardžaje, što jaho i tak «kraina razryvała».
Nahadajem: u rekłamie dla bukmiekierskaj kantory «Maksłajn» Alaksandr Saładucha byccam by vylataje z ekranu televizara i zabivajecca ab ścianu. Paśla čaho traplaje ŭ vielmi dziŭnuju kampaniju: futbalist Valer Hramyka, boh Zieŭs, mumija, Indyjana Džons…
Saładucha, blisnuŭšy svaimi lehiendarnymi vinirami, śpiavaje z huśsiu ŭ rukach niemudrahielisty tekst na matyŭ svajho chita «Vinahrad»:
«Ty kruti, kruti husia
S «Maksłajnom».
Ty kruti, kruti husia
Riealno.
Ty kruti, kruti husia
V onłajnie.
Ty kruti, kruti husia
S «Maksłajnom».
Treba dadać, što ŭ śfiery anłajn-kazino sapraŭdy isnuje ruskamoŭny vyraz «krucić husia» ŭ značeńni «krucić słoty». Ale jon małaviadomy. Masavaja moładzievaja aŭdytoryja viedaje vyrazy «dušyć huś», «ciahnuć huś», a časam i «krucić huś», jaki abaznačaje mužčynskuju masturbacyju.
Rekłama dajšła navat da Łukašenki, bo toj pačaŭ aburacca: «Što tvorycca ŭ krainie: u nas usie hetuju huś kruciać. Źviarnicie ŭvahu, Dźmitryj Mikałajevič [Kruty], surjozna hetym zajmiciesia», — daručyŭ Łukašenka».
Saładucha raspavioŭ, jak Łukašenka śpiavaŭ razam ź im «Čužuju miłuju»
«Hary ŭ piekle, hnida!» Jak Saładucha chadziŭ skardzicca ŭ KDB na narodnuju luboŭ
Alaksandr Saładucha pryznaŭsia ŭ lubovi da niatopavaha biełaruskaha futbolnaha kłuba
Žyćciovyja dramy Alaksandra Saładuchi: ad prafnieprydatnaha artysta da praŭładnaha miljaniera
Kamientary