«U imia pieramohi miru i humanistyčnych ideałaŭ». Uładzimir Kanaploŭ prosić dazvolić biełaruskim handbalistam hulać choć z Azijaj i Afrykaj
Staršynia Biełaruskaj fiederacyi handboła, kolišni blizki paplečnik Łukašenki Uładzimir Kanaploŭ nakiravaŭ list kiraŭniku Mižnarodnaj fiederacyi handboła (IHF) Chasanu Mustafie z prośbaj dazvolić zbornym i kłubam Biełarusi brać udzieł u mižnarodnych tavaryskich turnirach i matčach z kamandami Afryki, Azii i Blizkaha Uschodu.
Kanaplova, jak jon piša, zasmučaje taja akaličnaść, što kali ŭ niekatorych inšych mižnarodnych spartyŭnych fiederacyjach biełarusaŭ da spabornictvaŭ dapuskajuć, to ŭ handbole nie tak z-za dziejnaj zabarony, jakuju nakłała IHF.
«Svaim rašeńniem ad 4 sakavika 2022 hoda IHF faktyčna zabaraniła kamandam ź inšych krain hulać z našymi kłubami i zbornymi, choć sami spartsmieny z hetych krain hatovyja i chočuć hulać z nami», — smutkuje Kanaploŭ.
Miž tym, na jahonuju dumku, «akramia niehatyŭnych nastupstvaŭ dla biełaruskaha handboła, heta ni da čaho nie pryviało». A niehatyŭnyja nastupstvy takija, što moładź idzie zajmacca nie handbołam, a inšymi vidami sportu, u jakich mižnarodnyja fiederacyi nie takija pryncypovyja. A adchileńnie biełaruskich handbalistaŭ ad mižnarodnych spabornictvaŭ pryviało da taho, što
«my nie tolki zastalisia biez asnoŭnaha instrumienta papularyzacyi, ale i bieź istotnaj krynicy pryciahnieńnia finansavych aktyvaŭ z boku sponsaraŭ i kamiercyjnych partnioraŭ, što na siońnia pastaviła nas praktyčna na miažu vyžyvańnia».
Usio heta, jak kaža biełaruski spartyŭny čynoŭnik mižnarodnamu, «parušaje nie tolki ŭsie bazavyja pryncypy Mižnarodnaha alimpijskaha ruchu, ale i našy daŭnija, siabroŭskija stasunki».
«Asabista ja nikoli i ni pry jakich abstavinach tak nie zrabiŭ by. Nikoli nie pastupiŭsia b pryncypami prystojnaści i adkaznaści, navat kali b mnie heta pahražała adstaŭkaj abo zvalnieńniem z pasady», — maralna ciśnie na Chasana Mustafu Kanaploŭ.
U suviazi z hetym jon prosić vyvučyć praktyku pracy mienš pryncypovych fiederacyj i «nie rabić nas izhojami va ŭsioj spartyŭnaj supolnaści, kali my hetaha absalutna nie zasłuhoŭvajem».
Nivodny biełaruski handbalist, maŭlaŭ, ni ŭ jakich vajennych dziejańniach udziełu nie prymaje, i «ŭsie my vielmi škadujem pra toje, što adbyvajecca, pa-čałaviečy pieražyvajem i zyčym usim narodam tolki miru i roskvitu».
Dziela taho «ŭ imia pieramohi miru i humanistyčnych ideałaŭ, dla našaj ahulnaj budučyni» i z nadziejaj «na vaš aŭtarytet, mudraść, kałasalny prafiesijny dośvied i čałaviečaje razumieńnie» Kanaploŭ prosić kiraŭnika IHF «adklikać abo źniać isnyja zabarony, dazvoliŭšy kamandam z Afryki, Azii i Blizkaha Uschodu hulać z nami choć by ŭ mižnarodnych tavaryskich matčach i turnirach».
Biełarusaŭ dapuścili da Azijackich hulniaŭ, na jakich jany projduć kvalifikacyju da Alimpijady-2024. Ale jość dźvie ŭmovy
Biełarusy voźmuć udzieł u čempijanacie Jeŭropy jašče pa adnym cikavym vidzie sportu. Siarod udzielnikaŭ Nihieryja, Tanzanija i navat Niamieččyna
U Biełarusi praviali čempijanat Jeŭropy pa vielmi dziŭnym vidzie sportu
Ciapier čytajuć
Piać dzion, 60 udzielnikaŭ, saŭna, biljard i kryki adno na adnaho. Raskazvajem, jak prajšła zakrytaja «hulnia Mackieviča»57
Kamientary