Śmierć mužčyny na Akreścina: voś što viadoma i što zastajecca pad pytańniem
U CIP na Akreścina pamior viazień, imia jakoha Andrej Makarevič, jak paviedamiŭ «Novy čas». Infarmacyja pra hetaje zdareńnie dva tydni nazad pryjšła i ŭ «Našu Nivu», ale niekatoryja niestykoŭki i adsutnaść druhoj krynicy nie dazvalali być upeŭnienymi ŭ joj. Niekatoryja momanty dahetul niajasnyja. Raskazvajem toje, što viadoma nam.
Dva tydni tamu čytač paviedamiŭ «Našaj Nivie», što, kali jon siadzieŭ na Akreścina, tam raskazvali, što «12 červienia ŭ kamiery №13 pamior čałaviek, jakoha zvać Andrej Makarevič i jakomu było 56 hadoŭ». Hetuju infarmacyju viaźni pieradavali z vusnaŭ u vusny, z kamiery ŭ kamieru.
My znajšli vielmi padobnaha čałavieka, u jakoha na staroncy ŭ «Adnakłaśnikach» było šmat pierapostaŭ z «Chartyi-97». Hety mužčyna, pa infarmacyi z sacyjalnych sietak, niekali pracavaŭ u Departamiencie achovy MUS i žyŭ u Minsku. Paśla 1 červienia jon źnik z usich sacyjalnych sietak.
«Kibierpartyzany» paćvierdzili nam asobu hetaha mužčyny.
Žonka Makareviča tryvožna paviedamiła adnoj sa znajomych mužčyny, što «jon na dačy i ź im usio dobra». Inšyja znajomyja mužčyny nie viedali anijakaj aktualnaj infarmacyi.
U takoj situacyi my ŭstrymlivalisia ad publikacyi, šukali bolš dakładnyja śviedčańni.
Siońnia vydańnie «Novy čas», spasyłajučysia na ŭłasnuju krynicu, paviedamiła bolej pra hetaha viaźnia:
«Jon byŭ čałaviekam niehamanlivym, zaŭsiody siadzieŭ u kucie, pa bolšaj častcy ŭ kamiery spaŭ, ale mnie ŭdałosia ź im trochi pahutaryć. Pieršapačatkova jaho ŭziali za drobny kradziež: skraŭ jon pačak pielmieniaŭ i ci to chleb, ci to małako. Niešta takoje, kab prosta pajeści. Pracavaŭ jon ci mebielščykam, ci to abutak rabiŭ — niejkaja prostaja praca ŭ jaho była. Jon kazaŭ, što pracuje, ale hrošy skončylisia, i daviałosia jamu skraści ježy.
Jon naohuł nie pavinien byŭ da nas patrapić, takich drobnych zładziužak sadžajuć na 7-10 sutak u inšyja kamiery, da tak zvanych «pracoŭnych», kaho vyvodziać na pracu. Ale ŭ jaho ŭ telefonie znajšli niejkija reposty, i jon u vyniku siadzieŭ z nami pa palitycy».
Pa słovach surazmoŭcy «Novaha času», mužčyna byŭ astmatykam, tamu prasiŭ inhalatary, ale čas ad času ich nie vydavali:
«Dniom jon jašče siadzieŭ narmalna, adkašlivaŭsia, i hetak dalej. A nočču chrypieŭ tak, što ŭsia «chata» zasnuć nie mahła. Inhalatar jamu ŭsio ž addali. Potym da nas pieraviali lekara. Jon jaho pasłuchaŭ… Usie viedali, što Andreju stanaviłasia horš. U adnu noč my pračnulisia, jak byccam SPA pačało pracavać, tam nie toje što chrap, a niešta niezrazumiełaje było. Lekar damohsia dla jaho niejkich tabletak, jakija jamu niby dapamahali. My navat niekalki razoŭ prapanoŭvali Andreju vyklikać «chutkuju», kab jaho zabrali ź IČU, ale jon admaŭlaŭsia».
Mužčyna, jak piša «Novy čas», i tak pačuvaŭsia nie nadta, ale ŭ kamiery byŭ skraźniak, i ŭ adzin ź dzion usie ŭ kamiery zachvareli, a Makareviču stała horš:
«Heta było ŭ niadzielu: ja pračnuŭsia, chłopcy stajać, kryčać, «zvanicie ŭ knopku», — u kožnaj kamiery jość knopka vykliku «pradolnych». Akazałasia, što Andrej ustaŭ, schadziŭ u prybiralniu, pajšoŭ myć ruki i prosta la rakaviny ŭpaŭ.
Naš doktar sprabavaŭ jaho z «pradolnymi» adkačvać, — jon navat dobra pra «pradolnych» adhuknuŭsia, jany chacieli štučnaje dychańnie rabić. […]
Vyklikali «chutkuju», jana pryjechała amal imhnienna, chviliny praz try paśla vykliku. Ale adkačać Andreja nie ŭdałosia».
Varta nahadać, što palityčnych aryštavanych na Akreścina trymajuć u katavalnych umovach: pa čatyry čałavieki na adny nary, biez matracaŭ i paścieli, biez prava na atrymańnie pieradač, u kamierach nikoli nie vyklučajuć śviatło, unačy budziać. U arhanizacyi hetaha režymu ŭtrymańnia saŭdzielničajuć jak turemščyki, tak i turemnyja miedyki.
Kali vy viedajecie pra toje, što zdaryłasia na Akreścina, bolš, pišycie redaktaru «Našaj Nivy» ŭ TH, na [email protected] ci [email protected].
Albo pišycie asabista tym žurnalistam i redaktaram «Našaj Nivy», jakich vy viedajecie i jakim daviarajecie (lepš — u sihnał ci telehram).
Masavyja palityčnyja represii ŭ Biełarusi praciahvajucca z 2020 hoda, kali Alaksandr Łukašenka, miarkujučy pa źviestkach z učastkaŭ, dzie vybarčyja kamisii dazvolili naziralnikam sačyć za padlikam hałasoŭ, prajhraŭ Śviatłanie Cichanoŭskaj, ale nie addaŭ uładu.
Z 2022 hoda, paśla napadu Rasii na Ukrainu, biełarusaŭ pačali pieraśledavać i za antyvajennyja vykazvańni abo simpatyi da Ukrainy.
Za hety čas u krainie adbyłosia nie mienš za 50 tysiač palityčna matyvavanych zatrymańniaŭ, zaviedziena nie mienš za 12 tysiač palityčna-kryminalnych spraŭ i adkinutyja navat samyja bazavyja normy zakonnaści i marali.
«Naša Niva» — bastyjon biełaruščyny
PADTRYMAĆ
Kamientary