«U mianie jość dla ciabie viski». Brytanski ministr Ben Uoles raskazaŭ, jak pakpiŭ z Šajhu, a toj taho nie viedaŭ
U intervju vydańniu The Times ministr abarony Vialikabrytanii Ben Uoles raskazaŭ pra svoj tajemny žart ź ministra abarony Rasii Siarhieja Šajhu, elemientam jakoha było šatłandskaje viski.
Pavodle słoŭ Uolesa, jašče da pačatku vajny va Ukrainie, kali Łondan i Kijeŭ jašče nie patrapili ŭstalavać nadziejnuju šyfravanuju suviaź, jon damoviŭsia sa svaim ukrainskim kaleham Alaksiejem Reźnikavym zakadavać nazvy ŭzbrajeńniaŭ, jakija pastaŭlajucca Ukrainie, markami šatłandskaha viski — u pamiać pra svaju kolišniuju słužbu ŭ šatłandskaj hvardyi.
Tak supraćtankavyja rakiety NLAW stali ŭ pierapiscy nazyvacca Glenfiddich (adnasoładavaje viski z uschodu Šatłandyi), a supraćkarabielnyja rakiety Harpoon stali Islay.
«Ja prosta pisaŭ jamu: «U mianie jość dla ciabie viski» ci «Viski ŭžo ŭ darozie». My, dva ministry, prosta vybrali dla siabie kodavyja słovy», — raskazaŭ Uoles.
U siaredzinie lutaha, mienš čym za dva tydni da pačatku vajennych dziejańniaŭ, Uoles pryjechaŭ ź vizitam u Maskvu. U jakaści padarunka rasijskamu ministru Siarhieju Šajhu jon pryvioz butelku viski:
«My abmieńvalisia padarunkami, i ja padaryŭ jamu butelku Glenfiddich. Jon nie viedaŭ, što heta značyć. Taki byŭ žart».
Darečy, u hetym samym intervju Ben Uoles, jaki viadomy aktyŭnaj padtrymkaj Ukrainy ŭ jaje supracivie rasijskaj ahresii, paćvierdziŭ infarmacyju, što jon pryniaŭ rašeńnie pakinuć svaju pasadu ŭ najbližejšyja miesiacy. Paviedamleńni pra jaho rašeńnie pačali źjaŭlacca ŭ brytanskich miedyja z učarašniaha dnia.
Uoles skazaŭ, što pakinie svaju pasadu tady, kali premjer-ministr Ryšy Sunak budzie pravodzić čarhovyja pierastanoŭki va ŭradzie. Heta moža adbycca ŭ vieraśni.
Ciapier čytajuć
«Praca prapahandystaŭ naŭrad ci čyściejšaja za našu». Eks-palitviaźni adkryli ŭ Varšavie svoj klininh — jak pajšło?2
«Praca prapahandystaŭ naŭrad ci čyściejšaja za našu». Eks-palitviaźni adkryli ŭ Varšavie svoj klininh — jak pajšło?
«Sojevyja ekstremisty pavinny adpracavać misku kłubnic». Skardziŭsia na ŭmovy pracy ŭ KDB, a ciapier uciuchvaje treninhi siłavikam — chto taki Anton Šabunievič1818
Kamientary