Mnohija dobraachvotniki aburylisia tym, kamu dali ŭznaharody ad Cichanoŭskaj u Kijevie. Barkoŭski adkazaŭ

«Paškadavaŭ, što maju adzin i toj ža miedal ź niekatorymi»

27 maja Śviatłana Cichanoŭskaja ŭručała ŭznaharody va Ukrainie. Miedal Francyska Skaryny atrymała opiernaja śpiavačka Marharyta Laŭčuk, miedalami «Honar i hodnaść» uznaharodzili dobraachvotnikaŭ i vałancioraŭ, jakija dapamahajuć frontu: u śpis trapili «Niemiec», «Šmit», «Błanš», «Sonia», «Sievier», «Laśnik», «Marcin», «Akson», «Hamlet», «Kipiš», Dzianis Hierasimčyk. Jašče adzin miedal, «Za plonnuju pracu na karyść Biełarusi», uručyli biełaruskamu paetu i dobraachvotniku USU Siarhieju Pryłuckamu i šerahu ŭkrainskich palitykaŭ, aktyvistaŭ i hramadskich dziejačaŭ.

Ale ž sa śpisam pahadzilisia nie ŭsie. Naprykład, były biełaruski dobraachvotnik Alaksandr Kłačko napisaŭ u sacsietkach:

«Prahledzieŭšy śpis, ja zrazumieŭ niehatyŭnuju reakcyju častki znajomych mnie biełarusaŭ i navat troški paškadavaŭ, što maju adzin i toj ža samy miedal ź niekatorymi, chto atrymaŭ jaho ŭ Kijevie padčas vizitu Śviatłany Cichanoŭskaj.

Mahčyma, heta častka ŭznaharodžanych i maje na jaho prava — ja mahu hetaha i nie viedać. Ale ja dakładna viedaju, što jość tyja biełaruskija vałanciory, jakija zasłuhoŭvajuć mieć uznaharodu ŭ pieršuju čarhu».

Kamientujučy padzieju «NN», Kłačko nazyvaje imiony, na jaho dumku, samych zaŭvažnych biełaruskich vałancioraŭ va Ukrainie — heta Juraś Dziehciaroŭ, Taćciana Hacura-Javorskaja, Alena Žarkievič, Alaksiej Franckievič, Maryja Animija, Chielen Minskaja. Što da dastojnych vajaroŭ, Alaksandr prapanuje taki padychod:

«Bahata tych, chto na froncie z 2022 hoda, šmat kaho ź ich ja nie mahu nazyvać. Šmat i tych, pra kaho ŭžo i nie viedaju asabista, ale viedajuć ichnija kamandziry i pabracimy. Tut kožnaje padraździaleńnie musić nazvać najlepšych siarod svaich, kaho varta ŭznaharodzić u pieršuju čarhu. Šmat kaho možna było b ušanavać i paśmiarotna».

Alaksandr padkreślivaje, što nie admaŭlaje hetym ludziam va ŭznaharodach. Taja ž «Sievier» — byłaja kamandzirka miedyčnaj roty Pałka Kalinoŭskaha Nastaśsia Machamiet — zasłuhoŭvaje, na dumku Kłačko, nie toje što miedal, a to i orden.

«Ja baču inšych ukrainskich vałancioraŭ, jakija vartyja ŭznaharody ŭ pieršuju čarhu. Ale ich čamuści nie zaŭvažyli», — kaža Kłačko.

«Dastatkova ludziej, chto dastojny vialikaj udziačnaści za svoj uniosak, ale ich navat nie nazvali»

Pradstaŭnica «Bajsoła» va Ukrainie Maryja Animija, jakuju adznačyŭ Kłačko, taksama maje šmat pytańniaŭ da tych uznaharodaŭ. Dziaŭčyna prysutničała na cyrymonii i, jak piša ŭ fejsbuku, čakała pabačyć siarod uznaharodžanych dobrych aktyvistaŭ, ale atrymałasia nie tak.

U kamientary dla «Našaj Nivy» Maryja zaŭvažaje, što nielha niedaaceńvać pracu biełaruskich vałancioraŭ i dobraachvotnikaŭ, jakija dziejničajuć usie hady poŭnamaštabnaj vajny va Ukrainie:

«Na ŭznaharodžańni byli adznačanyja žurnalisty, pierakładčyki, piśmieńniki, kropkava dobraachvotniki i nivodnaha vałanciora, ni nivodnaha aktyvista! Mikita Zabuha ŭ formie nieisnujučaj armii i pahonach padpałkoŭnika (jakoj struktury i krainy?) atrymlivaŭ miedal jak dobraachvotnik Pałka Kalinoŭskaha i pradstaŭlaŭ usich dobraachvotnikaŭ. Na jakoj padstavie?»

Čytajcie taksama: Mikita Zabuha atrymlivaŭ uznaharodu ad Cichanoŭskaj u pahonach padpałkoŭnika. Jon raskazaŭ, jak tak

Mikita Zabuha (pazyŭny «Akson») byŭ siarod dobraachvotnikaŭ, jakija atrymali miedal «Honar i hodnaść». Na dumku Maryi, śpis uznaharodžanych, u jaki jon trapiŭ, varta było składać bolš staranna:

«Niaŭžo čałaviek, jaki pravioŭ na kantrakcie 6 miesiacaŭ i prydumaŭ sabie armiju, varty ŭvahi bolš, čym tyja, chto pracavaŭ u poli, chto atrymlivaŭ ranieńni i viartaŭsia ŭ stroj, nie vyłaziŭ z bajavych zadač, chto słužyć nie ŭ pałku, a ŭ inšych padraździaleńniach? Chto vaziŭ mašyny, chadziŭ znoŭ i znoŭ u mihracyjonku, zakuplaŭ ryštunak i ładziŭ bahata aśvietnickaj pracy?»

Viadoma, usio robicca nie dla miedaloŭ, kaža Maryja, ale jana nie bačyć sensu va ŭznaharodach, kali ich nie ŭručać dastojnym ludziam. Dziaŭčyna pryvodzić prykłady vartych inicyjatyvaŭ: centr «Łanka» pravaabaroncy Taćciany Hacury-Javorskaj, dzie prachodzili reabilitacyju vajary, inicyjatyva «Dzieja», chab «Sustreča» ŭ Kijevie, fond «Vilna Biłoruś».

Pavialičyć

«Jość dastatkova ludziej, chto piersanalna dastojny vialikaj udziačnaści za svoj uniosak i pracu, ale ich navat nie nazvali. Ciapier ja atrymała ŭmoŭna apraŭdalnyja paviedamleńni pra toje, što nie viedajuć ludziej, što niechta nie pryjšoŭ na ŭznaharodžańnie. Dyk pierad tym, kab niešta arhanizoŭvać, treba było daviedacca, spytać, i navat kali čałavieka niama na miescy, padziakavać jamu ŭsłych», — miarkuje dziaŭčyna.

Jak uznaharodzić tych, chto hetaha nie choča?

Kiraŭnik pradstaŭnictva Abjadnanaha pierachodnaha kabinieta (APK) pa nacyjanalnym adradžeńni Pavieł Barkoŭski byŭ siarod adkaznych za składańnie śpisu. Jon patłumačyŭ «Našaj Nivie» miechanizm vybaru ŭznaharodžanych.

Pavodle słoŭ Paŭła, zvyčajna śpisy na ŭznaharody składaje admysłovaja kamisija. Ale ŭ hety raz jana nie mahła pracavać, bo kamisija znachodzicca na ratacyi i pakul jašče nie zaćvierdžany jaje novy skład:

«Tamu ŭ hety raz daviałosia rabić pa sproščanaj pracedury. Byŭ šyroki śpis kandydataŭ, kaho mahli ŭznaharodzić, jaho nakidvali roznyja asoby i arhanizacyi, ź jakimi my kansultavalisia. Z hetaha śpisu rabiŭsia kančatkovy adbor.

[Kandydatury] vajskovych pieradusim kuryravaŭ Vadzim Kabančuk, pakolki jon profilny śpiecyjalist i razumieje heta. Jon viedaje niepubličnuju infarmacyju pa temie, jakuju nie viedajuć całkam pradstaŭniki APK. Što datyčyć cyvilnych asobaŭ, tut byli kansultacyi pieradusim pamiž pradstaŭnikami APK».

Barkoŭski raskazvaje, što ŭ vybary druhoj katehoryi ŭznaharodžanych staralisia trymacca bałansu pamiž pradstaŭnikami kultury, miedyja, pamiž dypłamatami i deputatami Rady. Čamu ž u śpisie amal nie akazałasia vałancioraŭ i aktyvistaŭ?

Pavialičyć

Z aktyvistami składana damovicca, kaža Pavieł:

«Adny chočuć prymać uznaharodu ad Kabinieta, inšyja nie chočuć, vystaŭlajucca niejkija ŭmovy. Usiamu hetamu vielmi ciažka dać rady ŭ karotki pieryjad padrychtoŭki, kali ŭsio heta vyrašajecca. Kali ŭznaharodzić adnych i nie ŭznaharodzić inšych, taksama pačynajecca chejt.

Z ulikam hetych abstavinaŭ i taho, što častka aktyvistaŭ uvohule nie zachacieła, kab ich uznaharodžvali, my vyrašyli pakul hetaje pytańnie pakinuć dla dalejšych kansultacyj».

Pavieł źviartaje ŭvahu, što luboha biełarusa možna prapanavać dla ŭznaharodžvańnia kamisii ab uznaharodach Kabinieta. Na sajcie pradstaŭnictva Kabinieta pa nacyjanalnym adradžeńni jość staronka, dzie možna padać takuju zajaŭku. Kožnuju takuju zajaŭku razhledziać na kamisii i adkažuć zajaŭniku.

Barkoŭski ŭpeŭnivaje, što ciapierašniaja cyrymonija nie była apošnim uznaharodžvańniem pa Ukrainie — jany ŭručajuć uznaharody niekalki razoŭ na hod. Tak što šansy ŭ tych, kaho ciapier nie adznačyli, jość:

«My čamuści vielmi raŭniva stavimsia da pośpiechaŭ inšych ludziej. Nam zdajecca, što našu pracu bolš abiasceńvajuć, a kahości bolš uźvialičvajuć. Ale ja chacieŭ by padkreślić, što tut niama bolš ci mienš talenavitych ci vartych uznaharodžvańnia.

Dumaju, što kožny, chto plonna pracuje na karyść Biełarusi i našu spravu, rana ci pozna zmoža atrymać tuju pačesnuju ŭznaharodu, na jakuju napracavaŭ. I tut nie treba pierajmacca, chto byŭ raniej ci paźniej. Treba rabić svajo, rabić pilna, i chtości vas prapanuje na ŭznaharodžvańnie, a astatnija abaviazkova padtrymajuć hetaje vyłučeńnie».

Maryja kaža, što ŭ budučym aktyvistaŭ sapraŭdy mohuć adznačyć — praŭda, pa-svojmu:

«U asabistaj kamunikacyi mnie skazali, što mohuć u budučym vypisać dypłomy vałancioram, ale «ŭznaharody zvyčajna dajuć bolš zasłužanym asobam». Tut biez kamientaroŭ prosta, zachavaju dypłamatyčny ton».

• 0
• 0
• 1
• 0
• 0
• 0
• 0
• 0