Aktyvist Ilja Dabratvor: Ja vyrašyŭ viarnucca ŭ Biełaruś u nastupny paniadziełak. Vaskrasienski skazaŭ, što ŭsio budzie dobra
Hramadski aktyvist i ŭ minułym supracoŭnik prarasijskaha resursu «Politrinh», jaki niekalki hadoŭ tamu vyjechaŭ u Polšču, raspavioŭ «Narodnaj Voli» pra svajo rašeńnie. Dva miesiacy tamu jon kančatkova razyšoŭsia z žonkaj, ź jakoj vychoŭvaŭ piaciarych dziaciej.
U Polšču Ilja Dabratvor vyjechaŭ z palityčnych pryčyn: jon bajaŭsia palityčnaha pieraśledu.
Zarablaŭ jon tym, što zdymaŭsia ŭ masoŭcy ŭ kino, pracavaŭ achoŭnikam na futbolnych matčach i kancertach, a taksama praktyčna kožny dzień taksavaŭ.
Stała taksama viadoma, što Ilja raźvioŭsia z žonkaj, ź jakoj pražyŭ šmat hadoŭ i ź jakoj vychoŭvaŭ piaciarych dziaciej.
Paśla hetaha aktyvist napisaŭ u sacyjalnych sietkach, što «mašyna złamałasia, i ja dakładna viedaju, kudy addam apošnija 100 złotych — na bilet da Minska».
Praź niejki čas Ilja ŭdakładniŭ svaju pazicyju nakont viartańnia ŭ Biełaruś: «Ja vyrašyŭ viarnucca. Dziakuj Juryju Vaskrasienskamu za takuju mahčymaść, pad jaho harantyi. U nastupny paniadziełak vyjazdžaju…»
Hety dopis Dabratvora vyklikaŭ cełuju chvalu samych roznych kamientaryjaŭ. Chtości paličyŭ, što hetaja infarmacyja — fejk, niechta ŭspryniaŭ jaje ŭsurjoz.
«Narodnaja Vola» źviarnułasia da samoha Ilji Dabratvora, kab toj prajaśniŭ situacyju nakont svajho viartańnia.
— Ja sapraŭdy vyrašyŭ viarnucca ŭ Biełaruś, — koratka paviedamiŭ surazmoŭca. — Płanuju zrabić heta ŭ paniadziełak, 24 lipienia, chacia płany mohuć źmianicca.
Tut šmat roznych niuansaŭ, jakija paŭpłyvali na hetaje rašeńnie.
— Što ź dziećmi?
— Dzieci zastajucca ŭ Polščy z maci, ź jakoj tydzień tamu my raźvialisia. A nie žyviom razam ź Inaj užo dva miesiacy.
— Stolki hadoŭ razam pražyli, u vas piaciora dziaciej…
— Tak atrymałasia, nie chaču heta navat kamientavać…
— Vy źviartalisia ŭ kamisiju pa razhladzie zvarotaŭ hramadzian Respubliki Biełaruś, jakija znachodziacca za miažoj?
— Nie, ja nie padavaŭ tudy zajavy.
— Niekatorych z tych, chto viartajecca dadomu, zatym zatrymlivajuć i sudziać…
— Ja hetaha nie bajusia.
— U svaim dopisie ŭ sacyjalnych sietkach vy napisali, što viartajeciesia ŭ Biełaruś pad harantyi Juryja Vaskrasienskaha. Jon na samaj spravie daŭ vam niejkija harantyi?
— Pa telefonie Vaskrasienski skazaŭ, što ŭ mianie ŭsio budzie dobra.
— Čym vy płanujecie zaniacca ŭ Biełarusi?
— Pakul nie viedaju. Spačatku treba viarnucca, a dalej užo niejkija płany składać.
— Pad Minskam u vas byŭ dom, u horadzie — kvatera. Što ź imi ciapier?
— Nakolki viadoma, jany znachodziacca pad aryštam. Ale ja ŭsio roŭna vyrašyŭ viarnucca…
«Narodnaja Vola» zadała niekalki pytańniaŭ i Juryju Vaskrasienskamu.
— Ci praŭda, što vy davali niejkija harantyi biaśpieki spadaru Dabratvoru, jaki žadaje viarnucca ŭ Biełaruś? U vas na heta jość niejkija aficyjnyja paŭnamoctvy?
— Ilja Dabratvor na samaj spravie źviarnuŭsia da mianie pa dapamohu. I, nakolki heta ŭ maich siłach, ja akazvaju sadziejničańnie pa viartańni Ilji dadomu.
Razam z tym chaču ŭdakładnić, što rašajučaje słova budzie za pravaachoŭnymi orhanami. Kali ŭ ich nie budzie nijakich pytańniaŭ da Dabratvora, to jon moža bieź pieraškod viarnucca.
— Adnym słovam, nijakich harantyj vy nie davali?
— Najbližejšaje pasiadžeńnie kamisii projdzie 20 lipienia, i, napeŭna, da hetaha času ja daviedajusia pazicyju pravaachoŭnikaŭ u dačynieńni da Dabratvora. Ale, nakolki mnie viadoma, u masavych biesparadkach udziełu jon nie braŭ. A za toje, što niedzie ŭdzielničaŭ, užo panios pakarańnie.
Ale Ilja skazaŭ, što i nasamreč choča dadomu, što jamu niama žyćcia na čužynie.
— A čamu jon nie źviartaŭsia z zajavaj u kamisiju?
— Standartny maršrut — heta i nasamreč zvarot u kamisiju, ale my z Dabratvoram viedajem adzin adnaho hadoŭ dvaccać. Tamu jon i paprasiŭ mianie vyvučyć pytańnie viartańnia ŭ abychod farmalnych pracedur. Ale, paŭtarusia, ja pakul nie viedaju kančatkovaj pazicyi siłavych struktur…
«Pra sustreču Łuku zaŭsiody prasili pieradać Pucinu». Šuster raskazaŭ, jak Łukašenka prapanoŭvaŭ svaje pasłuhi amierykancam9
Kamientary