U Ispanii za čatyry chviliny skrali Skarb Viljeny — unikalnyja załatyja vyraby bronzavaha vieku, adzinyja takija ŭ śviecie

Dziorzkaje rabavańnie adbyłosia pad ranicu 27 žniŭnia ŭ Muziei Viljeny, što ŭ ispanskaj pravincyi Alikante. Jak paviedamlaje vydańnie El País, złačyncy prademanstravali kiniematahrafičny ŭzrovień padrychtoŭki, pravioŭšy ŭsiu apieracyju mienš jak za čatyry chviliny.

Spačatku jany adciahnuli ŭvahu palicyi praz spracoŭvańnie sihnalizacyi ŭ municypalnym spartyŭnym kompleksie na ŭskrainie horada. Pakul palicyja imčała na falšyvy vyklik, rabaŭniki raźbili bakavyja vokny muzieja, prajšli skroź braniravanaje škło i ačyścili hałoŭnuju vitrynu.

Zdabyčaj maradzioraŭ staŭ tak zvany Skarb Viljeny — najbujniejšy zbor załatych vyrabaŭ epochi bronzy na Pireniejskim paŭvostravie i druhi pa značnaści va ŭsioj Jeŭropie paśla znachodak z hrečaskich Mikien.

Brytanskaja hazieta The Guardian udakładniaje, što skarb byŭ stvorany kala troch tysiač hadoŭ tamu i składajecca z masiŭnych załatych branzaletaŭ, čaš i dekaratyŭnych elemientaŭ. Čystaja vaha kaštoŭnaha mietału nabližajecca da dziesiaci kiłahramaŭ.

Razam z dahistaryčnymi artefaktami źnikli i try paźniejšyja karony miascovaj śviatyni Dzievy Maryi. Pry hetym srebranyja pasudziny i ŭnikalnyja artefakty ź mietearytnaha žaleza złamyśniki ŭ śpiešcy pakinuli na miescy.

Pavialičyć

U 1963 hodzie zvyčajny budaŭnik znajšoŭ u žviry dziŭny mietaličny pradmiet i addaŭ jaho kiraŭniku budoŭli z dumkaj, što heta prosta detal ad hruzavika. Tolki paśla taho, jak žonka inšaha rabočaha adniesła branzalet da juvielira, da spravy dałučyŭsia archieołah Chase Maryja Saler. Mienavita jon inicyjavaŭ raskopki ŭ pierasochłym rečyščy kala Viljeny, dzie i byŭ znojdzieny staražytny harščok ź nieźličonymi bahaćciami dahistaryčnaj elity.

Mer horada Fulchiensia Sierdan sa ślazami na vačach kanstatavaŭ žurnalistam, što strata — heta katastrofa dla ŭsiaho rehijona.

Rabavańnie ŭ Viljenie nie adzinkavy vypadak u krainie. Jak adznačaje ahienctva Euronews, u Ispanii heta ŭžo treci maštabny napad na histaryčnyja kalekcyi za apošnija čatyry miesiacy. Raniej vysokaprafiesijnyja hrupoŭki litaralna za paru chvilin abčyścili numizmatyčnyja zbory ŭ Badachosie i Albasete. Jeŭrapał bje tryvohu — u Jeŭropie źjavilisia novyja kryminalnyja sietki, jakija śpiecyjalizujucca vyklučna na kradziažy kulturnych artefaktaŭ i dziejničajuć ź biesprecedentnaj chutkaściu i hvałtam.

Pavialičyć

Hałoŭnaja strata dla Ispanii zusim nie ŭ hrašach ci ŭ imidžy. Kali karciny vybitnych mastakoŭ ci antyčnyja statui zvyčajna kraduć dziela pieraprodažu na čornym rynku ŭ pryvatnyja kalekcyi sapraŭdnych znaŭcaŭ, to vyraby z kaštoŭnych mietałaŭ časta čakaje kudy bolš prazaičny i varvarski los.

Isnuje vialikaja ryzyka, što ŭnikalnaja spadčyna jeŭrapiejskaj cyvilizacyi, jakaja ščaśliva pieražyła ŭ ziamli try tysiačahodździ i źmienu dziasiatkaŭ impieryj, budzie prosta raspłaŭlenaja ŭ źlitki dziela chutkaj nažyvy sučasnych maradzioraŭ. Pytańnie ciapier tolki ŭ tym, ci paśpieje ispanskaja palicyja apiaredzić płavilnuju pieč.

• 0
• 0
• 1
• 3
• 2
• 1
• 4
• 0