«Heta nie kampjutarnaja hulnia». Kiraŭnik Minabarony Ukrainy zajaviŭ, što kontrnastup USU adstaje ad hrafika, ale idzie pa płanie

Ministr abarony Ukrainy Alaksiej Reźnikaŭ pryznaŭ u intervju telekampanii SNN, što kontrnastup USU idzie nie tak chutka, jak płanavałasia, ale adznačyŭ, što «nie zaniepakojeny» vynikam apieracyi, bo jana raźvivajecca pa płanie, paviedamlaje Bi-bi-si.

Pavodle słoŭ Reźnikava, ujaŭleńnie pra toje, što nastup abaviazkova pavinien być chutkim, nie adpaviadaje rečaisnaści.

Kiraŭnik ukrainskaha abaronnaha viedamstva nazvaŭ niekalki pryčyn, ź jakich nastup USU raźvivajecca pavolniej, čym čakałasia, u tym liku niedachop bojeprypasaŭ, snaradaŭ i artyleryjskich sistem.

«Heta pytańnie SPA. Heta taksama pytańnie taho, što ŭ nas vielmi doŭhaja linija frontu. I suprać nas zmahajecca vialikaja kolkaść vorahaŭ. Tak što heta vajna. Heta nie kampjutarnaja hulnia», — zajaviŭ Reźnikaŭ telekampanii SNN u intervju, jakoje było zapisana ŭ minułyja vychodnyja.

Zachodnija ekśpierty ličać, što USU pačali nastupalnuju apieracyju ŭ pačatku červienia, adnak nie zmahli chutka prarvać abaronny linii rasiejskaj armii.

Ukrainskija vajskoŭcy zasiarodzili namahańni na troch asnoŭnych učastkach frontu, u tym liku ŭ rajonie Bachmuta, na miažy Danieckaj i Zaparožskaj abłaściej (kala vioski Vialikaja Navasiołka, dzie znachodziŭsia tak zvany «Uremieŭski vystup»), a taksama la horada Arechaŭ.

U vyniku pieršaj chvali nastupu ŭkrainskija vajskoŭcy stracili peŭnuju kolkaść techniki, u tym liku dadzienaj krainami Zachadu i pierahledzieli taktyku, kažuć analityki. Na ich dumku, ciapier USU sprabujuć bolš płanamierna vymatać rasiejskija vojski i skarystacca prabiełami ŭ abaronie, kali jany źjaviacca.

Pra toje, što nastup USU idzie pavolniej, čym płanavałasia, u intervju Bi-bi-si ŭ kancy červienia kazaŭ prezident Ukrainy Uładzimir Zialenski.

Reźnikaŭ zajaviŭ SNN, što «našy hienierały, našy kamandziry bačać realnuju situacyju na poli boju». «I znoŭ, pavinien paŭtaryć, hałoŭnaja kaštoŭnaść dla nas — heta žyćcio našych vajskoŭcaŭ», — padkreśliŭ ministr.

Pavodle słoŭ Reźnikava, ukrainskim vajskoŭcam davodzicca ŭručnuju rasčyščać sabie darohu, prasoŭvajučysia pa ściežkach u palach. Jak kaža ministr abarony, u rasiejcaŭ jość «surjoznyja achoŭnyja zony ź minami», i praź ich «vielmi ciažka prarvacca».

«My pavinny vykarystoŭvać našych vajskoŭcaŭ, sapioraŭ i ŭsio heta vielmi pavolna raźminiravać, kab padrychtavać kalidory dla sapraŭdnaha nastupalnaha ruchu», — skazaŭ Reźnikaŭ.

Jon dadaŭ, što ŭkrainskija vojski robiać dziejańni na roznych napramkach, kab nie dać rasiejcam razumieńnia ab nakiravańni asnoŭnaha ŭdaru.

U dačynieńni da ahulnaha chodu vajny Reźnikaŭ skazaŭ CNN, što da leta nastupnaha hoda jana skončycca pieramohaj Kijeva — i paśla hetaha Ukraina moža atrymać zaprašeńnie na ŭstupleńnie ŭ NATO.

• 4
• 0
• 0
• 1
• 0
• 0
• 0
• 0