Anłajn-marafon salidarnaści z palitviaźniami: jak paŭdzielničać i kudy pojduć srodki
29 lipienia biełaruskija niezaležnyja miedyja i pravaabarončyja inicyjatyvy arhanizujuć anłajn-marafon «Nam nie ŭsio adno!», kab sabrać hrošy dla palitviaźniaŭ i ich siemjaŭ. Raskazvajem, z čaho składajecca 12-hadzinnaja padzieja, chto atrymaje hrošy i jak uziać udzieł.
Marafon adbudziecca 29 lipienia z 10 ranku da 10 viečara pa minskim časie na šmatlikich niezaležnych jutub-kanałach. Inicyjatyva naležyć Volzie Harbunovaj, pradstaŭnicy pa sacyjalnaj palitycy Abjadnanaha pierachodnaha kabinieta, i jaje kamandzie. Volha tłumačyć, što kamanda pastajanna vyvučaje dośvied taho, jak u inšych krainach pracujuć z temaj palitviaźniaŭ, bo heta nie tolki biełaruskaja prablema: «U červieni prajšoŭ anłajn-marafon salidarnaści z palitviaźniami, jaki rabili rasijskija niezaležnyja miedyja. My zrazumieli, što jašče nie sprabavali takoha instrumientu».
Padzieju padtrymlivaje bolš za 20 niezaležnych miedyja, siarod jakich «Biełsat», «Lusterka», «Radyjo Svaboda», «Miedyjazona», kyky.org i inšyja. U marafonie ŭdzielničaje i «Naša Niva».
Volha raskazvaje pra toje, što možna budzie ŭbačyć na marafonie: «Budzie niekalki varšaŭskich studyj i adna vilenskaja, 12 hadzin marafonu raźmierkavanyja pamiž roznymi miedyja. Niechta zahadzia rychtavaŭ kantent, niechta budzie vychodzić u žyvy efir. Pabačym cikavych śpikieraŭ: heta buduć i palityki, i błohiery, muzyki, spartoŭcy. Asabista dla mianie važna, što budzie šmat ludziej z dośviedam źniavoleńnia, buduć svajaki palitviaźniaŭ i navat ich dzieci. Upeŭnienaja, što efir budzie žyvy, tvorčy i cikavy.
Kali adbyvajecca niešta strašnaje, my abjadnoŭvajemsia, i, mahčyma, heta toj instrumient, jaki dapamoža nam pakazać palitviaźniam hetaje jadnańnie».
Hrošy dla palitviaźniaŭ možna budzie danacić z 28 lipienia (piatnica) pa 30 lipienia (niadziela), zbor zakryvajecca ŭ 23:59 30 lipienia. Dapamohu buduć źbirać na adzin rachunak. Kab zadanacić, pierachodźcie na sajt salidarnasc.com.
Potym projdzie pieršaje pasiadžeńnie naziralnaj rady z pradstaŭnikoŭ miedyja, što realizoŭvajuć prajekt. Jany prymuć rašeńnie ab tym, jak raźmierkavać sabranyja srodki pamiž arhanizacyjami-ŭdzielnicami marafonu, a tyja, u svaju čarhu, zmohuć na sabranyja hrošy dapamahčy siemjam palitviaźniaŭ, ź jakimi pracujuć. Praź niejki čas (mierkavana, praz try miesiacy) naziralnaja rada vyvučyć spravazdačy arhanizacyj i ahučyć publičnuju zajavu pra toje, na što pajšli srodki.
Voś pra jakija arhanizacyi havorka:
- sacyjalny prajekt INeedHelpBY;
- prajekt dapamohi palitźniavolenym biełaruskam «Palitviazynka»;
- pravaabarončaja inicyjatyva dapamohi palitviaźniam Dissidentby;
- fond dapamohi biełarusam u Litvie RAZAM;
- inicyjatyva BY_help;
- Biełaruskaja asacyjacyja palitviaźniaŭ «DA VOLI»;
- Biełaruskaja rada kultury;
- fond miedycynskaj salidarnaści ByMedSol;
- Biełaruski fond spartyŭnaj salidarnaści;
- fond biełaruskaj salidarnaści BYSOL;
- dabračynny fond «Kraina dla žyćcia»;
- publičnaja dabračynnaja arhanizacyja Littouwin LIONS CLUB;
- Anarchičny čorny kryž — Biełaruś.
Volha raskazvaje:
«My źviarnulisia z prapanovaj paŭdzielničać u marafonie praktyčna da ŭsich biełaruskich pravaabarončych arhanizacyj i inicyjatyŭ. Prezientavali im ideju, jany padzialilisia z nami svaimi niezakrytymi na hety momant patrebami. Tak i skłaŭsia puł hetych arhanizacyj. Praanalizujem danyja ich patreb i tady budziem razumieć, u jakich praporcyjach naziralnaj radzie varta raźmierkavać pamiž fondami sabranyja srodki, hetyja praporcyi budziem im rekamiendavać».
Harbunova dadaje, što ŭdzielničajuć i tyja arhanizacyi, jakija dapamahajuć palitviaźniam niepublična, a taksama niekalki inicyjatyŭ, jakich nie nazyvajuć z pryčyn biaśpieki, bo jany znachodziacca na terytoryi Biełarusi.
Volha spadziajecca, što marafon dazvolić sabrać adčuvalnuju sumu hrošaj, kab dapamahčy ŭ pracy aktyvistam, fondam i pravaabaroncam, a praź ich i tysiačam palitźniavolenych razam ź siemjami.
«Emihravała niekalki socień tysiač biełarusaŭ. I navat kali 10% ad hetaj kolkaści ludziej zadanacić hrošy, ekvivalentnyja kubku kavy, atrymajecca adčuvalnaja suma, navat adzin jeŭra — heta važna. Taksama my viedajem, što rełakavałasia vielmi šmat biełaruskich kampanij, i časta sustrakaju mierkavańnie, što jany aścierahajucca afišavać svaju padtrymku palitviaźniaŭ i demakratyčnych sił. Ale padtrymka praz marafon ananimnaja, my nikomu nie dadzim infarmacyi pra toje, chto nam danaciŭ, i heta dobraja mahčymaść zadanacić dla tych, chto nie chacieŭ heta rabić publična.
Hałoŭnaje — kab ludzi, jakija znachodziacca ŭ Biełarusi, zrazumieli, što nam nasamreč nie ŭsio adno».
Arhanizatary padziei nahadvajuć pra miery biaśpieki — nie varta danacić z vykarystańniem rasijskich ci biełaruskich płaciežnych instrumientaŭ. Taksama, kali vy znachodziciesia ŭ Biełarusi, nie repościcie, nie łajkajcie i nie kamientujcie tranślacyju sa svaich piersanalnych akaŭntaŭ.
«Naša Niva» — bastyjon biełaruščyny
PADTRYMAĆJak u KDB visiać partrety nie Łukašenki, a Pucina, jak trapiŭ u «kamieru śmiarotnikaŭ» i jak staŭ śviedkam sproby ŭciokaŭ palityčnaha — mocny apovied byłoha palitviaźnia
«Niekatoryja momanty ŭspłyvali ŭ hałavie, jak u kino». Aleh Hruździłovič — pra svaju knihu ab dzieviaci miesiacach u niavoli
«U jaho niama nijakaj ahresii da režymu». Palitviazień, jaki siadzieŭ z Eduardam Babarykam, raskazaŭ pra jaho
Ciapier čytajuć
Viadomy partret Kahanca akazaŭsia savieckim fejkam, zatoje znajšłosia adzinaje fota archieołaha Tatura. Razhadanyja fotatajamnicy Biełaruskaha muzieja ŭ Vilni
Kamientary