To kozy, to suviazisty, to kascy. U Čerykavie ŭžo dva razy sprabavali zakłaści park kala voziera, dy ŭsio nie pa kani korm
U Čerykavie na pustcy kala voziera ŭ rajonie vulic Kavalova i Sormaŭskaj užo nieadnarazova sprabavali vysadzić sadžancy lipy i biarozy, kab stvaryć parkavuju zonu. Adnak kožny raz umiešvajucca roznyja abstaviny, i praca ŭrešcie idzie ŭ hłum, piša rajonnaja hazieta «Vieśnik Čerykaŭščyny».
Piać hadoŭ tamu sadžancy lipy tut vysadžvali pad kiraŭnictvam namieśnika staršyni rajvykankama. Adnak nie ŭličyli, što siudy lubiła vadzić paśvić svoj kaziny statak miascovaja žycharka z domu niepadalok. Skončyłasia tym, što žyvioły paabjadali parastki, i jany zasochli.
Uvosień 2021 hoda miascovy žychar Viktar Ramanaŭ, kiraŭnik adnaho z hramadskich abjadnańniaŭ, pasprabavaŭ pasadzić park druhi raz. Hetym razam sadžali lipy i biarozy, i kozy ŭ spravu nie ŭmiešvalisia: ź ichnimi haspadarami praviali tłumačalnuju rabotu. Ale było kamu škodzić i biez koz.
«Prykładna praz tydzień paśla pasadki niekalki dziasiatkaŭ sadžancaŭ było vyrvana z karaniami, — raspavioŭ vydańniu Viktar Ramanaŭ. — Na nastupny hod na miescy pasadki zastałosia kala 10 sadžancaŭ, astatnich navat vydranymi nie akazałasia».
Namieśnik staršyni Čerykaŭskaha rajvykankama, jaki kuryruje pytańni budaŭnictva i žyllova-kamunalnaj haspadarki, Dźmitryj Klimiankoŭ vykazaŭ zdahadku, čym moža tłumačycca hetaja prykraja źjava.
«Z dośviedu skažu: časam my sutykajemsia z tym, što hramadzianie prapanoŭvajuć azielanić toj ci inšy ŭčastak u horadzie abo inšych nasielenych punktach rajona, ale, jak vyśviatlajecca paźniej, u hetych miescach pralahajuć roznaha rodu kamunikacyi, jakija nie sumiaščalnyja z pasadkami dreŭ.
Nakolki mnie viadoma, u miescy, pra jakoje idzie havorka, taksama pralahajuć linii suviazi, na vyznačanaj adlehłaści ad jakich nie mohuć być pasadžanyja i raści drevy. Heta patrabavańnie pavinna abaviazkova vykonvacca».
Ale i dziesiaci sadžancam, jakija ŭpisalisia ŭ patrabavańni suviazistaŭ pa adlehłaści, spakojnaha žyćcia nichto nie zabiaśpiečyŭ:
pałovu ich sioleta prosta skasili padčas čarhovaj kaśby ŭzbočyn.
Ciapier rajonnaje načalstva razvažaje: ci varta ŭvohule zakładać park la hetaha voziera, ci ŭžo chaj budzie jak jość. Kali vynik razvah budzie stanoŭčy, to ŭvosień, mahčyma, pasprabujuć zrabić heta ŭžo treci raz.
Ciapier čytajuć
Chto taja biełaruska, jakuju ekstradavali ŭ ZŠA dla suda za kantrabandu detalaŭ dla samalotaŭ6
Chto taja biełaruska, jakuju ekstradavali ŭ ZŠA dla suda za kantrabandu detalaŭ dla samalotaŭ
«Kab Biełaruś nie addali Pucinu ŭ jakaści suciašalnaha pryza». Cichanoŭskaja zaklikaje ŭklučyć biełaruskaje pytańnie ŭ mirnyja pieramovy Ukrainy i Rasii3434
Kamientary