Cichanoŭskaja raspaviała, u jakim statusie budzie dziejničać paśla 2025 hoda
Napiaredadni treciaj hadaviny pačatku pratestaŭ suprać falsifikacyi vynikaŭ prezidenckich vybaraŭ u Biełarusi DW parazmaŭlała ź lidarkaj apazicyi Śviatłanaj Cichanoŭskaj.
Siarod inšaha žurnalisty spytali Cichanoŭskuju, u jakim statusie jana budzie dziejničać paśla prezidenckich vybaraŭ, jakija čakajucca ŭ Biełarusi ŭ 2025 hodzie.
— Lubyja vybary ŭ Biełarusi ciapier — heta fars i imitacyja. Pakul u krainie taki hłyboki palityčny i humanitarny kryzis, kali ludziej padviarhajuć represijam za ich mierkavańnie, pra svabodnyja i sumlennyja vybary nie moža iści i havorki. Jakimi b [biełaruskija ŭłady] ni «namalavali» vyniki vybaraŭ, kali jany, viadoma, buduć, my zaklikajem suśvietnuju supolnaść nie pryznavać ich, a biełarusaŭ — ihnaravać vybary. My budziem pravodzić adpaviednuju svaju kampaniju. Łukašenka moža «namalavać» sabie ŭsio, što zachoča. Jon heta rabiŭ šmat hadoŭ, ale biełarusy nie vierać, — skazała Cichanoŭskaja.
Pavodle jaje, tak jak vybary bieź pieramien u Biełarusi nie mohuć ličycca lehitymnymi, bo ŭ 2020 hodzie Łukašenka prajhraŭ vybary, ale ŭtrymaŭsia va ŭładzie dziakujučy tyranii i padtrymcy Uładzimira Pucina, to jana budzie praciahvać pracu ŭ tym ža statusie, u jakim znachodzicca i ciapier.
Na pytańnie, što zastajecca siońnia biełarusam, akramia čakańnia, u tym liku pieramohi Ukrainy ŭ vajnie, Cichanoŭskaja skazała, što «heta nie čakańnie, kali ludzi siadziać i čakajuć, kali ich chtości pryjdzie i vyratuje». Pavodle jaje, ludzi rychtujucca, u Biełarusi isnuje padpolny ruch. Tak, jon nie masavy, bo za lubyja prajavy niazhody ludziej sadžajuć u turmu na kałasalnyja terminy, ale ludzi arhanizoŭvajucca ŭ maleńkija jačejki ŭnutry krainy, adbyvajecca kamunikacyja pamiž tymi, chto vyjechaŭ, i tymi, chto zastaŭsia.
— Ja zhadvaju reakcyju ludziej, kali Łukašenka zachvareŭ, potym kali PVK «Vahnier» pajšła na Maskvu. Adrazu ž miljon zapytaŭ: u nas hatovy płan, davajcie nam instrukcyi, my hatovy. Heta značyć, kali nadydzie toj momant, akno mahčymaściaŭ, vy ŭbačycie, što ludzi nie prosta siadzieli i čakali, ludzi rychtavalisia. Viadoma, pieramoha Ukrainy daść nam vialikuju mahčymaść skarystacca hetaj situacyjaj, ale nielha vyklučać, što pieramieny ŭ Biełarusi mohuć nastupić i raniej, čym pieramoha Ukrainy. <…> My skarystajemsia luboj mahčymaściu, kab źmianić situacyju ŭ krainie, — dadała jana.
Kamientary