Sudździa Tałačynskaha rajsuda pajšła na pavyšeńnie. Raniej jana sudziła za palityku
Natalla Barysaviec zaraz budzie kiravać sudździami susiedniaha rajona: jana pryznačanaja staršynioj Sieńnienskaha rajonnaha suda. Pamiž rajcentrami Tałačyn i Sianno ŭsiaho 50 km, piša «Viciebskaja viasna».
Jašče 21 lipienia Natalla Barysaviec praciahvała raspraŭlacca z palityčnymi apanientami ŭ Tałačynskim rajonie. Tady jana prysudziła štraf pamieram 1110 rubloŭ šmatdzietnaj maci, pakaraŭšy jaje za «raspaŭsiud ekstremisckich materyjałaŭ». A litaralna praz dva tydni jaje ŭžo pradstaŭlali na novaj pasadzie novamu kalektyvu — jana stała staršynioj Sieńnienskaha rajonnaha suda. Byłuju staršyniu hetaha suda Inu Dosavu pieraviali ŭ šarahovyja sudździ.
Na starym miescy pracy ŭ Tałačynskim rajsudzie Natalli Barysaviec daručali raźbirać palityčnyja administracyjnyja spravy. Tak, štrafam pamieram 30 bazavych vieličyń jana pakarała maci traich dziaciej Viktoryju Kazun za toje, što taja mieła na svajoj staroncy ŭ «Adnakłaśnikach» paviedamleńni adnaho sa ŚMI, pryznanaha «ekstremisckim».
Taksama Barysaviec aštrafavała na 2590 rubloŭ Vitala Šałupina, elektramanciora z pasiołka Kochanava, za toje, što ŭ sacyjalnaj sietcy Facebook jon raźmiaściŭ vyjavu bieł-čyrvona-biełych pałos. Mužčynu pryznali vinavatym u niesankcyjanavanym pikietavańni «z metaj vykazvańnia svaich asabistych pohladaŭ na padziei hramadska-palityčnaha žyćcia».
10 krasavika Natalla Barysaviec asudziła da aryštu na 7 sutak žycharku Tałačyna Kaciarynu Vasileŭskuju za raspaŭsiud «ekstremisckich» materyjałaŭ u internecie. Akramia taho, sudździa pastanaviła kanfiskavać «pradmiet administracyjnaha pravaparušeńnia» — mabilny telefon iPhone 6S. Pad aryšt žančyna trapiła za padpisku na internet-staronku z nazvaj NEXTA.
Sudzili ludziej i za «abrazu» samoj Natalli Barysaviec. Sud Frunzienskaha rajona Minska 15 vieraśnia 2021 hoda vynies prysud žycharcy Tałačynskaha rajona Hańnie Chadnievič u vyhladzie abmiežavańnia voli biez nakiravańnia va ŭstanovu adkrytaha typu terminam na dva hady.
U chodzie sudovaha raźbiralnictva tady prahučała, što, majučy namier na pasiahalnictva na aŭtarytet i honar sudździ, 30 listapada 2020 hoda ŭ Minsku na vulicy Čajłytki praz mabilny telefon u sietcy «Adnakłaśniki» ŭ hrupie «Vusaty tarakan» žančyna raźmiaściła paviedamleńnie, u jakim dapuściła źniavahu sudździ, čym padarvała prestyž dziejnaści sudovaj sistemy.
Sudździa Natalla Barysaviec była pryznanaja paciarpiełaj u hetaj spravie. Jaje dapytvali praz skajp, i jana kazała, što była ŭ šoku, kali daviedałasia pra kamientary, jakija ŭbačyli susiedzi, svajaki i znajomyja. Tamu adčuła vialikija maralnyja pakuty, jakija acaniła ŭ 3 000 rubloŭ, zapatrabavaŭšy kampiensacyju. Taksama jana patrabavała pryznačyć samaje strohaje pakarańnie dla abvinavačvanaj.
U vyniku sud pastanaviŭ, što Hanna Chadnievič maje vypłacić Natalli Barysaviec 1000 rubloŭ.
Ciapier čytajuć
Jak skłaŭsia los vypusknikoŭ, jakimi žurfak hanaryŭsia 10 hadoŭ tamu? Historyja adnaho ŭračystaha kałaža17
Kamientary
Ale spadaryni Barysaviec varta razumieć, što jana maładziejšaja za Łukašenku i jon, nachutčej, pamre raniej za jaje. A moža raniej jahonaj śmierci składucca spryjalnyja ŭmovy dla źmieny ŭłady. I paśla jaje źmieny Barysaviec abaviazkova budzie padvierhnutaja lustracyi, u vyniku jakoj usie jaje vysiłki ŭ prysłuhoŭvańniu režymu Łukašenki akažucca marnymi. Čas, jaki jana zajmałasia palityčnymi represijami i karała biełaruski narod pavodle pryncypu "nie da zakonaŭ" navat nie budzie joj zaličany ŭ pracoŭny staž. Nie kažučy ŭžo pra adkaznaść pavodle artykuła Kryminalnaa kodeksa ab vyniasieńni zaviedama niepravavych prysudaŭ.