Pucin prapanavaŭ pabudavać pamiž Maskvoj i Minskam chutkasnuju čyhunačnuju mahistral
Prezident Rasii Uładzimir Pucin płanuje abmierkavać z Alaksandram Łukašenkam prajekt budaŭnictva vysakachutkasnaj čyhunačnaj mahistrali pamiž stalicami dźviuch krain, paviedamiła TASS.
Jak skazaŭ Pucin, hetaje pytańnie ŭžo, maŭlaŭ, abmiarkoŭvałasia z meram Maskvy Siarhiejem Sabianinym i kiraŭnikami rasijskich bankaŭ. Papiarednie ŭ bankach acanili prajekt jak ekanamična pierśpiektyŭny i hatovyja padklučycca da jaho realizacyi.
«Minski kirunak vielmi zapatrabavany byŭ by i našymi hramadzianami i hramadzianami Biełarusi», — ličyć Pucin.
Jak adznačaje vydańnie Office Life, u Rasii budaŭnictva vysakachutkasnych mahistralaŭ viadziecca ŭžo daŭno, i tam nazapašany vialiki vopyt realizacyi padobnych prajektaŭ. Praŭda, takija mahistrali tam nie ŭ poŭnaj stupieni adpaviadajuć standartam Mižnarodnaha sajuza čyhunak.
Što da Biełarusi, to ŭ nas madernizavanych čyhunačnych šlachoŭ dla vysakachutkasnaha ruchu pakul niama. Kali chutkaść ruchu na niekatorych maršrutach pavyšajuć, to heta za košt zapusku bolš sučasnych ciahnikoŭ i skaračeńnia kolkaści prypynkaŭ na šlachu. Dziakujučy hetamu, naprykład, čas pajezdki pa maršrucie Minsk-Homiel źmienšyŭsia bolš čym na hadzinu.
Raniej abmiarkoŭvałasia pytańnie ŭdziełu Biełarusi ŭ prajekcie budaŭnictva chutkasnaj čyhunačnaj mahistrali pamiž Piekinam i Bierlinam, jakaja pavinna była prajści praz Maskvu i Minsk. Ale ŭ suviazi z hieapalityčnymi avanturami Kramla heta pytańnie, zdajecca, nadoŭha straciła aktualnaść.
Kamientary