Rasijskija trymalniki jeŭrabondaŭ padali ŭ rasijski sud na Minfin Biełarusi. Minsk prosić pieranieści spravu z Maskvy da siabie ci chacia b u Łondan
Minfin Biełarusi vystupiŭ suprać razhladu sprečki pa jaho jeŭrabondach u Rasii i prapanavaŭ sudzicca nakont papier u Łondanie ci ŭ Minsku. Raniej ź iskam da viedamstva na $310 tys. źviarnuŭsia adzin z rasijskich trymalnikaŭ papier, piša RBK.
Ministerstva finansaŭ Biełarusi paviedamiła, što razhledzieć sprečku pa jeŭraablihacyjach krainy možna ŭ sudzie Minska ci navat Łondana, jak taho patrabuje pieršapačatkovaja emisijnaja dakumientacyja, pa jakoj byli vypuščany kaštoŭnyja papiery.
Takuju zajavu zrabiŭ pradstaŭnik viedamstva na pasiadžeńni ŭ Masharsudzie, dzie papiarednie razhladajucca pretenzii rasijskaha pryvatnaha inviestara da Minfina Biełarusi, pieradaje karespandent RBK. Jon padaŭ pazoŭ u suviazi z tym, što praz sankcyi vypłaty pa bondach pierastali dachodzić da rasijskich trymalnikaŭ papier.
«Umovy abodvuch praśpiektaŭ emisij utrymlivajuć arbitražnuju ahavorku, što sprečki vyrašajucca zhodna z arbitražnym rehłamientam Łondanskaha arbitražnaha suda — LCIA [London Court of International Arbitration]», — ukazaŭ jon. Technična i z punktu hledžańnia prava taki razhlad mahčymy, niahledziačy na toje, što Vialikabrytanija ŭviała sankcyi ŭ dačynieńni i Biełarusi, i Rasii, padkreśliŭ pradstaŭnik Minfina.
Jašče adzin varyjant jurysdykcyi, u jakoj moža być razhledžana sprava, — Biełaruś. Zhodna z Kišynioŭskaj kanviencyjaj ab pravavoj dapamozie, ratyfikavanaj Rasijaj, kampietentnymi źjaŭlajucca sudy, jakija znachodziacca pa miescy dziejnaści adkazčyka, heta značyć pa ahulnym pravile nieabchodna pravodzić raźbiralnictva ŭ Biełarusi, rastłumačyŭ pradstaŭnik Minfina. Rasijskija sudy takuju sprečku razhladać nie mohuć, zaklučyŭ jon i chadajničaŭ ab spynieńni razhladu spravy ŭ Masharsudzie.
Taksama pradstaŭnik adkazčyka ŭ cełym vykazaŭ niazhodu z patrabavańniami istca.
Pretenzii pryvatnaha inviestara Alaksandra Marčankava datyčać dvuch vypuskaŭ jeŭraablihacyj Biełarusi z pahašeńniem u 2030 i 2031 hodzie, jak vynikaje z materyjałaŭ spravy. Pazoŭnik patrabuje ad Minfina Biełarusi daterminova pahasić nabytyja im ablihacyi, bo mižnarodnaje ahienctva Moody's pryznała defołt pa dziarždoŭhu krainy.
Patrabavańni, jakija datyčać daterminovaha pahašeńnia papier składajuć $280 tys. Akramia taho, Marčankaŭ patrabuje ad biełaruskaha Minfina sumu ŭžo vypłačanych pa papierach kuponaŭ u pamiery $17 tys., a taksama prosić vypłacić jamu pracenty za vykarystańnie jaho hrašovych srodkaŭ i kampiensavać sudovyja vydatki. Ahulnyja patrabavańni istca — kala $ 310 tys.
Pradstaŭnik Minfina nahadaŭ, što Biełaruś nie admaŭlałasia ad vypłat. U adpaviednaści z unutranaj pastanovaj, jany robiacca na śpiecyjalny rachunak u Biełarusbanku. Rasijskija inviestary mohuć atrymać hetyja hrošy, padaŭšy ŭ Minfin dakumienty, jakija paćviardžajuć vałodańnie kaštoŭnymi papierami, i adkryŭšy rachunak u banku.
Ale takija vypłaty praktyčna nie ažyćciaŭlajucca, raspavioŭ RBK pryvatny inviestar Siarhiej Sazonaŭ, jaki taksama źjaŭlajecca trymalnikam biełaruskich jeŭrabondaŭ i prysutničaŭ na pasiadžeńni.
Pa słovach Sazonava, u jaho jość taki rachunak, ale ŭ vypłatach na jaho Minfin admoviŭ.
«Vypłaty hrašovych srodkaŭ trymalnikam jeŭraablihacyj nie buduć adnoŭlenyja da zaviaršeńnia ŭsich unutrydziaržaŭnych pracedur pa ŭniasieńni źmianieńniaŭ u sumiesnuju pastanovu ŭrada i Nacyjanalnaha banka Biełarusi», — havorycca ŭ adkazie biełaruskaha Minfina na zvarot Sazonava (kopija dakumienta jość u RBK).
Inviestaru viadoma, što niekalkim trymalnikam bondaŭ, jakija adkryli rachunki, usio ž udałosia atrymać častku vypłat da śniežnia 2022 hoda, paśla hetaha ŭsie pieraličeńni byli spynienyja.
Kamientary