Ahienctva Fitch abviaściła defołt pa niekatorych biełaruskich jeŭrabondach
Ahienctva Fitch Ratings paniziła rejtynh čatyroch suvierennych jeŭraablihacyj Biełarusi z uzroŭniu «C» da «D» — defołtnaha. Pra heta paviedamlajecca na sajcie ahienctva.
U Fitch panižeńnie rejtynhaŭ jeŭraablihacyj patłumačyli niekalkimi faktarami, siarod jakich klučavym była apłata Minskam daŭhavych abaviazalnictvaŭ u biełaruskich rublach. «Heta supiarečyć dakumientacyi pa ablihacyjach, jakaja nie dapuskaje raźlikaŭ u alternatyŭnych valutach», — zajavili ŭ ahienctvie.
Biełaruś užo niekalki razoŭ raźličvałasia pa jeŭraablihacyjach u nacyjanalnaj valucie. U Minfinie tłumačyli, što zachoŭvajucca «niespryjalnyja źniešnija ŭmovy», tamu hrošy ŭ nacvalucie byli pieraličanyja na rachunak, adkryty ŭ Biełarusbanku. Dostup da rachunku byŭ dadzieny płaciežnamu ahientu — łondanskamu Sicibanku.
Da takoj schiemy apłaty Minfinu pryjšłosia źviarnucca z-za sankcyj, uviedzienych suprać Nacbanka, i z-za taho, što raźlikova-klirynhavaja infrastruktura zachodnich bankaŭ «niazdolnaja zabiaśpiečvać daviadzieńnie vypłat» da ŭsich trymalnikaŭ biełaruskich jeŭraablihacyj.
Raniej ahienctvy S&P Global Rating, Moody's i Fitch Ratings pryznali defołt pa biełaruskich jeŭraablihacyjach. Heta taksama adbyłosia z-za taho, što Biełaruś praviała płaciež pa jeŭraablihacyjach u biełaruskich rublach. U Ministerstvie finansaŭ zajavili, što abjaŭleńnie defołtu nosić «pravakacyjny charaktar», a taksama što asobnyja rejtynhavyja ahienctvy ihnarujuć vidavočnyja fakty ŭ dačynieńni da vykanańnia Biełaruśsiu abaviazacielstvaŭ pa jeŭraablihacyjach.
Akramia taho, u viedamstvie raskrytykavali zachodniuju raźlikova-klirynhavuju sistemu. Tam adznačyli, što jana «sama ŭ defołcie», tamu što nie moža harantavać trymalnikam jeŭraablihacyj ich prava na vykanańnie abaviazacielstvaŭ.
Ciapier čytajuć
Čamu ŭ biełaruskaj turmie tak mocna chudziejuć? Tłumačym3
Kamientary