Supracoŭniki abłasnoha Upraŭleńnia hramadzianstva i mihracyi pry padtrymcy AMAPa vyjavili ŭ Kałodziščach niezakonnych mihrantaŭ ź Indyi, paviedamlaje MUS.
U pryvatnym domie biełaruski pražyvali 40 zamiežnikaŭ. U našu krainu jany zajechali naziemnym transpartam z Rasii, dalej płanavali prajści ŭ Łatviju. Biełaruskija vizy ŭ ich adsutničali, havorycca ŭ paviedamleńni MUS.
Nielehały pryciahnutyja da administracyjnaj adkaznaści, pryniaty rašeńni ab prymusovym vydvareńni ich z krainy. Zatrymany dla vyśviatleńnia asoby 14 čałaviek, jakija nie mieli dakumientaŭ.
Pravodzicca pravierka dziela ŭstanaŭleńnia arhanizatara kanałaŭ niezakonnaj mihracyi, dadaje MUS.
Apošnija tydni asnoŭny kirunak nielehalnaj mihracyi — Łatvija, dzie niama płotu. Na miažy Polščy i Litvy ŭ apošnija dva tydni fiksujecca minimum parušeńniaŭ.
U lipieni MUS zajaviła pra zatrymańnie čatyroch hrup takich zamiežnikaŭ.
U minuły paniadziełak ministry ŭnutranych spraŭ Polščy, Litvy, Łatvii i Estonii zapatrabavali ad Biełarusi vyvadu hrupy «Vahnier», a taksama advodu mihrantaŭ ad miažy i adpraŭki ich u krainy pachodžańnia.
Namieśnik ministra ŭnutranych spraŭ Polščy Maciej Vonsik 29 žniŭnia paćvierdziŭ, što raźličvaje na źmiakčeńnie palityki Minska. Jon znoŭ nahadaŭ pra hrupu «Vahnier», a taksama pra źmiakčeńnie mihracyjnaj palityki. Cisk na miažu pavinien być pamienšany, skazaŭ polski čynoŭnik.
«Kali Biełaruś nie choča być izalavanaj, to musić pačać supracoŭničać. Heta vidavočna pavinna być apłačana Biełarusi. Moža być, adkryjem častku pamiežnych pierachodaŭ, zakrytych ciapier. Ale kali supracoŭnictva i reakcyi ź inšaha boku nie budzie, to ŭ peŭny momant usie try krainy, Polšča, Litva i Łatvija, zakryjuć usie pamiežnyja pierachody, nie tolki darožnyja, ale i čyhunačnyja, i Biełaruś faktyčna budzie adrezanaja ad Jeŭropy», — reziumavaŭ Vonsik.
Ciapier čytajuć
Dyrektarka etałonnaha kałhasa ŭ Dobrušy 12 hadoŭ chavała padziež i źbivała padnačalenych. Adnaho sprabavała nakarmić siłasam23
Kamientary