U siecivie «chavajuć» Kadyrava. Ale siońnia jon apublikavaŭ videa z saboju — upieršyniu za dva tydni
U niadzielu ŭ sacsietkach kiraŭnika Čačni zjaviłasia videa, u jakim Ramzan Kadyraŭ upieršyniu asabista reahuje na čutki ab surjoznych prablemach sa zdaroŭjem, jakija raspaŭsiudžvajucca čačenskaj dyjasparaj i paćvierdžanyja ŭkrainskaj vyviedkaj. Da hetaha času apošnija videa z Kadyravym, na jakich možna vyznačyć čas zdymki, zjaŭlalisia ŭ jaho akaŭntach i na respublikanskim dziaržkanale bolš za dva tydni tamu, jak śviedčyć analiz «Ahientstva».
Na videa, apublikavanym dniom u niadzielu, Kadyraŭ pad daždžom idzie pa asfaltavanaj darožcy, na im — daždžavik. Na adnym z dvuch apublikavanych videa vidać budynak, padobny da rezidencyi Kadyrava ŭ Hroznym.
Pa danych servisaŭ nadvorja, u niadzielu ŭ Hroznym — kala 16 hradusaŭ, doždž.
U paście pad videa havorycca: «Vielmi raju ŭsim, chto ŭ internecie nie moža adroźnić praŭdu ad chłuśni, prahulacca na śviežym pavietry, pryvieści dumki ŭ paradak».
Adnak na samim videa Kadyraŭ pramaŭlaje bolš abstraktny tekst, jon kaža, što słuchaje Karan i što prajšoŭ paru kiłamietraŭ.
Čutki ab rezkim paharšeńni zdaroŭja Kadyrava pačali raspaŭsiudžvacca ŭ čaćvier uviečary: adno z takich paviedamleńniaŭ zjaviłasia ŭ apazicyjnym čačenskim telehram-kanale NIYSO, jaki ŭ noč na 15 vieraśnia paviedamiŭ, što Kadyraŭ upaŭ u komu.
Na nastupny dzień ukrainskaje vydańnie «Obozrievatiel» paviedamiła sa spasyłkaj na krynicy ŭ čačenskaj dyjaspary, što Kadyraŭ užo niekalki dzion znachodzicca ŭ komie. Pavodle infarmacyi vydańnia, kiraŭnika Čačni samalotam vazili ŭ Maskvu, ale tam jamu nie zmahli dapamahčy. Ciapier jaho płanujuć adpravić na lačeńnie za miažu, jak miarkujecca, u AAE, napisaŭ «Obozrievatiel».
Pradstaŭnik Hałoŭnaha ŭpraŭleńnia raźviedki Ukrainy Andrej Jusaŭ paćvierdziŭ vydańniu infarmacyju ab ciažkim stanie Kadyrava.
Praź niekalki hadzin paśla zajavy Jusava ŭ sacsietkach Kadyrava i jaho pamočnika Umara Daudava zjaviłasia 10-siekundnaje videa, na jakim Kadyrava pakazvajuć sa śpiny. Kali zapisana heta videa, zrazumieć niemahčyma.
Da niadzieli apošnija videa ŭ sacsietkach Kadyrava, na jaho aficyjnym sajcie i na sajcie ČHTRK «Hrozny», pa jakich možna paćvierdzić čas zdymki, byli datavanyja 1 vieraśnia.
Paśla 1 vieraśnia Ramzan Kadyraŭ nie zjaŭlaŭsia na videa ci fota, jakija źviazanyja z aktualnymi padziejami. U jaho kanałach takija padziei kamientavalisia tolki tekstavymi paviedamleńniami.
Na adzinym videa, źviazanym z aktualnaj padziejaj — vosieńskimi vybarami, Kadyrava nie było.
8 vieraśnia ŭ sacsietkach było apublikavana videa prahułki ź siamjoj i jaho prabiežki, 9 vieraśnia — zapis z unukam Jusufam, 10 vieraśnia — rolik z sustrečy z mamaj, 12 vieraśnia — videa zvarotu da kiraŭnika ŭrada Čačni Mahamieda Daudava. Ni na adnym ź videa Kadyraŭ nie pramaŭlaje ni słova. Identyfikavać čas zapisu rolikaŭ niemahčyma.
Ciapier čytajuć
«Pieraapranuŭsia ŭ amapaŭca i dyryžyravaŭ čornaj dubinkaj». Adzin z zasnavalnikaŭ «Volnaha choru» — pra akcyi ŭ handlovych centrach u 2020‑m i pracu ŭ fiłarmonii ŭ Litvie44
Kamientary