U Minsku pakazali mietanavy Geely Emgrand 7. Takija aŭto mohuć zacikavić taksistaŭ i firmy, ale jeść niuans
Na aŭtamabilnaj vystavie «AŭtaEkspa», jakaja dniami prachodziła ŭ Minsku, «BiełDžy» pakazaŭ Geely Emgrand 7, jaki pracuje na mietanie. Taki aŭtamabil dazvalaje pierasoŭvacca ŭ dva razy tańniej, čym na bienzinie. Da taho ž heta jašče i ekałahična.
Charaktarystyki navinki ad «BiełDžy» nie raskryvajucca, jak i cana. Tym nie mienš, vyhladaje, što biełaruska-kitajski vytvorca nastrojeny surjozna. Prezientacyja mietanavaha Geely Emgrand 7 nieŭzabavie adbudziecca ŭ RF. Rasijskaj aŭdytoryi aŭtamabil płanujuć pradstavić na Pieciarburhskim mižnarodnym hazavym forumie, jaki projdzie z 31 kastryčnika pa 3 listapada.
Zvyčajny Geely Emgrand 7, jaki pracuje na bienzinie kaštuje ad 49 200 rubloŭ, što pa biahučym kursie kala $14 650. Heta robić Emgrand adnym z samych tannych novych aŭto, jakija siońnia pradajucca na biełaruskim rynku. Viersija, jakaja budzie pryznačana dla pracy na mietanie, budzie kaštavać daražej, ale naŭrad ci mienavita heta značna paŭpłyvaje na popyt.
Kaštuje haz-mietan usiaho 1 rubiel 6 kapiejek za 1 kub. m. U toj čas jak litr dyzielnaha paliva abo bienzina AI-95 — 2,37 rub. Nizki košt mietanu robić mašyny, jakija na im pracujuć, vielmi pryvabnymi dla tych, chto šmat jeździć.
Surazmoŭca ź liku taksistaŭ adznačaje, što mnohija jaho kalehi ź cikavaściu čakajuć, kali takoje aŭto źjavicca ŭ prodažy, a hałoŭnaje, kolki jano budzie kaštavać.
«Z padobnymi taryfami mietan možna nazvać paratunkam dla taksistaŭ. Ale ŭ pracy na mietanavych aŭtamabilach jość adzin vialiki minus — u nas vielmi mała zapravačnych stancyj. Časam, kab zapravić aŭtamabil, treba pa 30 i bolej chvilin pravieści ŭ čarzie», — skardzicca taksist.
Pa jahonych słovach, kala 80-90% transpartu na mietanavych zapraŭkach składajuć aŭtamabili taksi.
Prablema niedachopu hazavych zapravak ź mietanam nie novaja. U Minsku takich zapravak čatyry. Va ŭsich abłasnych centrach aproč Viciebska pa dźvie, a ŭ Viciebsku tolki adna. Usiaho pa Biełarusi naličvajecca kala 30 zapravak, dzie aŭtamabil možna zapravić pryrodnym hazam.
U ciapierašni čas pryrodny haz źjaŭlajecca samym ekałahična čystym matornym palivam. Tamu jaho vykarystańnie dazvalaje źnižać nie tolki vydatki na paliva, ale i vykidy škodnych rečyvaŭ u atmaśfieru.
Vyhladaje, što dla taho, kab mietanavaja Geely mieła sapraŭdy vialiki popyt, pryčym nie tolki siarod taksistaŭ i arhanizacyj, Biełarusi treba raźvivać infrastrukturu mietanavych AHNKS. Bo ŭ inšym vypadku takija aŭtamabili buduć nie cikavyja dla vialikaj častki biełarusaŭ, pakolki ŭ šerahu rehijonaŭ banalna niama, dzie zapravić taki aŭtamabil.
Ciapier čytajuć
Čamu ŭ pačatku 20 stahodździa estoncy, litoŭcy i łatyšy stvaryli dziaržavu, a biełarusy — nie? Adkazvaje Cieraškovič9
Kamientary