«Ja nie chaču pracavać!» Redakcyja Sieńnienskaj rajonki vykładaje roliki z takimi pryznańniami
Rajonnaja hazieta «Hołas Sieńnienščyny» sprabuje zacikavić čytačoŭ nietryvijalnym źmiestam: zdymaje dla tyktoku žartaŭlivyja roliki pra redakcyju i pra toje, što supracoŭniki nie suprać uchilicca ad pracy.
Adzin sa zručnych momantaŭ dla hultajstva — sychod u adpačynak hałoŭnaj redaktarki Łarysy Mukamołavaj.
Jak vynikaje z nastupnaha videarolika, hałoŭnaja redaktarka «Hołasa Sieńnienščyny» i sama nie suprać pałajdačyć.
Niechta sa źbiantežanych padpisčykaŭ u kamientarach spytaŭ, ci čuła spadarynia Mukamołava, jaki huk nakładzieny na hetaje videa. «Jana sama i prapanavała», — adkazali z redakcyi.
Najčaściej u rolikach pra niežadańnie pracavać zdymajecca Ała Jakaŭleva, redaktarka internet-sajta rajonki. Adno z takich videa padpisana tak: «Kali pakazali pa kamierach, što raniej syšła z pracy».
Darečy, mienavita redaktary sajtaŭ atrymali sioleta «śpieczadańnie» kiraŭnicy hałoŭnaha ŭpraŭleńnia ideałahičnaj raboty i pa spravach moładzi Viciebskaha abłvykankama Maryny Navickaj. Padčas štohadovaj narady kiraŭnikoŭ rajonak jana skazała nastupnaje: «Svavolcie, na toje vy i žurnalisty, kab pa-roznamu danosić materyjał». Praŭda, čynoŭnica mieła na ŭvazie nie banalnyja žarty, a nieabchodnaść u zabaŭlalnaj formie danosić da toj častki hramadstva, jakaja atrymlivyje naviny z sacsietak, «cikavy, patrebny dziaržaŭny paradak dnia». I ŭ pryvatnaści, praz TikTok, jaki raiła zavieści ŭsim redakcyjam u Viciebskaj vobłaści.
U «Hołasa Sieńnienščyny» svoj kanał u TikTok źjaviŭsia jašče ŭ 2021 hodzie, Praktyčna ŭsie pieršyja videaroliki byli humarystyčnymi, pryśviačalisia ŭnutranamu žyćciu redakcyi, i tema pra «nie chaču pracavać» stała adnoj z hałoŭnych.
«Kali ŭ piatnicu pryjšoŭ na pracu, ale ŭžo čakaješ kanca pracoŭnaha dnia», — padpisany adzin z rolikaŭ.
«Złosnuju redaktarku», jakaja nie daje spakoju žurnalistam, u pieršych videarolikach hrała tahačasnaja kiraŭnica vydańnia Halina Žukava.
Kamientary