Pamior były ministr zamiežnych spraŭ i kandydat u prezidenty Čechii Kareł Švarcenbierh

Pamior były ministr zamiežnych spraŭ (2007—2009, 2010—2013) i hanarovy staršynia libieralna-kansiervatyŭnaj partyi TOP 09 Kareł Švarcenbierh.

Vydańnie Echo24 sa spasyłkaj na krynicu ŭ siamji Švarcenbierha piša, što apošnija dvoje sutak palityk znachodziŭsia ŭ ciažkim stanie i ŭ režymie štučnaha snu.

Švarcenbierha šmat razoŭ vymušanyja byli špitalizavać z-za niavyznačanych prablem sa zdaroŭjem. Ale jon mieŭ znosiny z žurnalistami padčas znachodžańnia ŭ špitali — na minułym tydni jon kamientavaŭ prysud byłomu deputatu TOP 09 Daminiku Fery.

28 kastryčnika Švarcenbierh nie ŭdzielničaŭ u cyrymonii ŭručeńnia dziaržaŭnych uznaharod, kali prezident krainy Pietr Pavieł uznaharodziŭ jaho ordenam Biełaha Lva. Orden dla jaho pryniaŭ syn Jan.

Švarcenbierh, viadomy ŭ palityčnych i hramadskich kołach jak Prync, naradziŭsia ŭ Prazie ŭ 1937 hodzie. Dziacinstva pravioŭ u Paŭdniovaj Čechii. Paśla kamunistyčnaha pieravarotu ŭ 1948 hodzie majomaść jaho siamji skanfiskavali, pryličyŭšy rod da «niepažadanaj arystakratyi», i Švarcenbierhi schavalisia ŭ susiedniaj Aŭstryi.

Švarcenbierh nie zabyvaŭ svajoj radzimy navat u viry hramadskaha žyćcia Vieny. U adnym sa svaich zamkaŭ jon zasnavaŭ Čechasłavacki dakumientacyjny centr — archiŭ zabaronienaj na toj čas litaratury. U 1984 hodzie jon staŭ staršynioj Mižnarodnaha Chielsinkskaha kamiteta pravoŭ čałavieka, zajmaŭsia padtrymkaj čechasłavackaha dysidenctva.

Paśla 1989 hodu jon staŭ na bok lidara «aksamitnaj revalucyi» Vacłava Havieła, ź jakim jaho na toj čas užo źviazvała daŭniaje siabroŭstva. Uletku 1990 jon staŭ kancleram Havieła.

Z 1996 hodu Švarcenbierh vydavaŭ upłyvovy palityčny štotydniovik Respekt.

Pik palityčnaj karjery Kareła Švarcenbierha pryjšoŭsia na 2013 hod, kali jon supraćstajaŭ Miłašu Ziemanu na prezidenckich vybarach. U 2015-m Zieman, jaki pieramoh, zajaviŭ, što «va Ukrainie idzie hramadzianskaja vajna», i heta vyklikała vostruju krytyku, u tym liku z boku Švarcenbierha, jaki nazvaŭ heta adkrytaj vajnoj Rasiei suprać Ukrainy.

Kareł Švarcenbierh padtrymlivaŭ demakratyčnuju supolnaść Biełarusi, paśladoŭna krytykavaŭ režym Alaksandra Łukašenki i vystupaŭ suprać śmiarotnaha pakarańnia. Uvosień 2014 hodu jon naviedaŭ Biełaruś. Ličyŭ, što Jeŭropie varta było źniać sankcyi z aficyjnaha Miensku paśla ŭviadzieńnia maratoryju na śmiarotnaje pakarańnie.

U 2018-m Kareł Švarcenbierh krytykavaŭ ideju pabudovy restaracyi ŭ Kurapatach pad Mienskam. Jon pryhadaŭ u kamientary «Svabodzie» historyju z Čechii, dzie byŭ padobny vypadak. Kala kancentracyjnaha cyhanskaha łahiera časoŭ II Suśvietnaj vajny ŭ Paŭdniovaj Čechii kamunisty ŭ 70-ja hady pabudavali śvinakompleks. Heta spravakavała pratesty, ale šmat hadoŭ situacyja nie vyrašałasia. Narešcie ŭrad vykupiŭ śvinarnik va ŭładalnika, vyrašyŭ źnieści kompleks dy pastavić pomnik.​

Pavialičyć

U 2018-m hodzie Švarcenbierha ŭznaharodzili miedalom da 100-hodździa BNR — «na znak pryznańnia zasłuhaŭ dziela biełaruskaj niezaležnaści i demakratyi».

• 1
• 0
• 0
• 1
• 0
• 13
• 1
• 0