Jeŭrasajuz dazvoliŭ kanfiskacyju rasijskich aktyvaŭ jeŭrapiejskimi kampanijami, u jakich Pucin adabraŭ biznes u Rasii
Rasijskim uładam dahetul udavałasia brać pad kantrol biznes zachodnich kampanij, jakija vyrašyli syści z krainy, bieź jakich-niebudź zachadaŭ u adkaz z boku paciarpiełych. Ale ciapier lidary Jeŭrapiejskaha sajuza, damoviŭšysia pra 12-y pakiet sankcyj, navažylisia vykarystoŭvać zamarožanyja ŭ ES srodki dla vypłaty kampiensacyj jeŭrapiejskim kampanijam, jakija stracili aktyvy ŭ Rasii, piša The Moscow Times.
Dahetul u Jeŭrasajuzie tolki zamarožvali aktyvy fizičnych i jurydyčnych asob, jakija trapili ŭ sankcyjnyja śpisy. Razmovy pra ich kanfiskacyju vialisia, vyvučalisia i jurydyčnyja mahčymaści, ale adčužać ułasnaść jeŭrapiejskaje zakanadaŭstva nie dazvalaje.
Ciapier ES uvodzić vyklučeńnie: kali rasijskaje padraździaleńnie jeŭrapiejskaj kampanii było ŭ prymusovym paradku pieradadziena va ŭłasnaść abo pad kantrol Rasijskaj Fiederacyi i jano znachodzicca ŭ sankcyjnym śpisie, to možna budzie zabrać jaho aktyvy i akcyi dla, «siarod inšaha, vypłaty ŭzhodnienaj adekvatnaj kampiensacyi» maciarynskaj kampanii.
Kampiensacyja paciarpiełaj jeŭrapiejskaj kampanii ŭ vypadku prymusovaha adabrańnia jaje aktyvu ŭradam Rasijskaj Fiederacyi «vyznačajecca sudovym abo administracyjnym čynam abo ŭstanaŭlivajecca zakonam», havorycca ŭ rašeńni ES. Asobna ahavorvajecca, što heta vyklučeńnie nie adnosicca da aktyvaŭ, jakija zachoŭvajucca ŭ centralnych depazitaryjach (heta značyć da reziervaŭ Centrabanka Rasii).
ZŠA taksama niadaŭna pačali farmulavać zakanadaŭstva dla kanfiskacyi dziaržaŭnych aktyvaŭ Rasii, pierš za ŭsio reziervaŭ CB. U listapadzie adpaviedny zakonaprajekt byŭ uchvaleny Kamitetam zamiežnych spraŭ Pałaty pradstaŭnikoŭ Kanhresa. U ES tydzień tamu Kamitet pa palityčnych pytańniach Parłamienckaj asamblei Rady Jeŭropy adnahałosna pryniali miemarandum ab kanfiskacyi rasijskich dziaržaŭnych aktyvaŭ.
«Mis Biełaruś» usio bolš nahadvaje konkurs pryhažości ŭ haremie23
Kamientary